Thursday, 16 March 2017

کراچی دے پنجابیاں نوں مردم شماری بارے سنیہا۔

کراچی دے پنجابی مردم شماری 2017 ویلے
مادری زبان پنجابی دے خانے وچ TICK کرن۔

ماضی وچ کراچی وچ رین والے سارے ای پنجابیاں دی زبان
مادری زبان دے خانے وچ پجابی نئیں لکھی جاندی رئی۔
ایس لئی ھن آپ اپنے قلم نال (پنسل نال نئیں) مادری زبان پنجابی دے خانے وچ TICK کرن

کراچی وچ رین والے پڑھے ' لکھے تے سمجھدار پنجابی ھمت کرن تے عام پنجابیاں نوں سمجھان کہ؛
پنجابی TICK کرن نال ای پتہ چلے گا کہ کراچی وچ پنجابی کنے نے۔

پنجاب دا علاقہ بوت وڈا اے تے پنجاب دی زمین تے پنجابی زبان دے بوت سارے لہجے بولے جاندے نے پر سارے لہجے زبان دے حساب نال پنجابی زبان ای نے؛

1۔ جھنگ ' فیصل آباد ' ساھیوال ' خانیوال ' وھاڑی ' بھاولنگر ' چشتیاں وچ جھنگچوی پنجابی بولی جاندی اے۔

2۔ ملتان وچ ملتانی پنجابی بولی جاندی اے۔

3۔ لودھراں ' بھاولپور ' رحیم یار خان وچ ریاستی پنجابی بولی جاندی اے۔

4۔ بھکر ' لیہ ' مظفر گڑھ وچ تھلوچی پنجابی بولی جاندی اے۔

5۔ ڈیرا غازی خان ' راجن پور وچ ڈیرہ والی پنجابی بولی جاندی اے۔

6۔ خوشاب ' میانوالی ' اٹک ' چکوال ' ڈیرا غازی خان تے ڈیرا اسماعیل خان دے کجھ حصیاں وچ شاھپوری پنجابی بولی جاندی اے۔

7۔ چکوال وچ دھنی پنجابی بولی جاندی اے۔

8۔ پشاور ' اٹک ' نوشہرہ ' مانسہرہ ' بالاکوٹ ' ایبٹ آباد ' مری ' مظفرآباد وچ ھندکو پنجابی بولی جاندی اے۔

9۔ جہلم ' گجر خان ' راولپنڈی ' مری ھلز ' مظفرآباد وچ پوٹھوھاری پنجابی بولی جاندی اے۔

10۔ لاہور ' شیخوپورہ ' گوجرانوالہ ' منڈی بہاؤالدین ' وزیرآباد ' سیالکوٹ ' نارووال ' گجرات ' قصور ' اوکاڑا ' پاکپتن ' امرتسر ' ترن تارن صاحب ' گرداسپور وچ ماجھی پنجابی بولی جاندی اے۔

11۔ جالندھر ' ھوشیارپور ' شھید بھگت سنگھ نگر (نون شہر) ' کپورتھلا وچ دوآبی پنجابی بولی جاندی اے۔

12۔ لدھیانہ ' موگا ' سنگرور ' برنالہ ' فریدکوٹ ' پٹیالہ ' فتح گڑھ صاحب ' مانسہ ' سری مکتسر صاحب ' انبالا ' بھٹنڈہ ' گنگا نگر ' ملیر کوٹلہ ' روپر ' فیروزپور ، حصار ، سرسہ ' کروکشیترہ وچ مالوی پنجابی بولی جاندی اے۔

13۔ کھرار ' کورالی ' روپر ' نورپور بیدی ' مورنڈہ ' پیل ' راجپورہ ' سمرالا وچ پوادی پنجابی بولی جاندی اے۔

14۔ جموں وچ ڈوگری پنجابی بولی جاندی اے۔

مردم شماری وچ زبان دے لہجے نئیں پر زبان لکھی جانی اے۔
ایس لئی کراچی وچ رین والے اناں ساریاں ای علاقیاں دے پنجابی مادری زبان دے خانے وچ پنجابی ای TICK کرن۔