نواز شریف نے پنجاب تے راج کرکے وی پنجابیاں نوں انہاں دی زبان نہیں دتی۔

نواز شریف نوں نہ رھنما بننا آیا نہ حکمراں۔ صرف حکومت وچ رھنا نصیب ھویا۔ اوہ وی ایس لئی کہ پاکستان دا سیاسی ماحول لسانی اے۔ پنجابی ' سندھیاں دی پارٹی پی پی پی ' پٹھاناں دی پارٹی پی ٹی آئی ' اردو بولن والے ھندوستانیاں دی پارٹی ایم کیو ایم نوں تے مینڈیٹ دیندے نئیں۔ ایس لئی پنجابیاں دی پارٹی ن لیگ نوں مینڈیٹ دے دیندے  نے۔

پنجاب چوں قومی اسمبلی دیآں 150 سیٹاں نے۔ پاکستان دی وفاقی حکومت بنآن دے لئی 137 سیٹاں دی لوڑ ھوندی اے۔ جیہڑیاں پنجاب چوں ای مل جاندیآں  سن۔ ایس لئی نواز شریف نوں پاکستان دا وزیرِ اعظم بننا نصیب ھوجاندا سی۔ پر نواز شریف نہ تے رھنما بن کے سارے پاکستان دے ن لیگ دے کارکناں دی سیاسی تربیت کرکے پاکستان دے عوام نوں سیاسی سوچ ' سمجھ تے شعور دے پایا۔ نہ حکمراں بن کے پاکستان دے حکومتی اداریاں دی کارکردگی بہتر کرکے پاکستان نوں مظبوط ' مستحکم تے خوشحال بنا پایا۔

نواز شریف نوں رھنمائی کرنا نہ آن دے کرکے ن لیگ دے کارکناں دی سیاسی تربیت نئیں ھو پائی۔ جیس دی وجہ توں پاکستان دی عوام سیاسی سوچ ' سمجھ تے شعور توں محروم اے۔

نواز شریف نوں حکمرانی کرنا نہ آن دی وجہ توں پاکستان دے حکومتی اداریاں دی کارکردگی بہتر نئیں ھو پائی۔ جیس دی وجہ توں پاکستان مظبوط ' مستحکم تے خوشحال نئیں ھو پایا۔

ایس توں وی بوھتا وڈا مسئلہ اے وے کہ؛

نواز شریف 1985 توں لے کے ' 30 سال دے عرصے تک پنجاب تے راج کیتا۔ بلکہ حقیقت اے وے کہ پنجابی نے 30 سال دے عرصے تک نواز شریف نوں پنجاب تے راج کروایا۔ جد کہ پنجابیاں دے مینڈیٹ دے کرکے ای نوا شریف نوں پاکستان تے وی 3 واری راج کرن دا موقع ملیا۔ پر؛

اے نواز شریف دی پنجاب دے نال زیادتی اے کہ 30 سال تک پنجاب تے راج کرکے وی پنجاب دے حکومتی اداریاں دی کارکردگی بہتر کرکے پنجاب نوں مظبوط ' مستحکم تے خوشحال نئیں بنایا۔ جد کہ نواز شریف نے 30 سال دے عرصے وچ پنجابیاں دی رھنمائی کرکے پنجابیاں دی سیاسی سوچ ' سمجھ تے شعور وچ اضافہ وی نئیں کیتا۔

بلکہ نواز شریف نے انگریزاں دے دور توں پنجاب تے مسلط کیتی گئی اردو زبان نوں پنجاب چوں ختم کرکے پنجابیاں نوں انآں دی زبان وی نئیں دتی۔ تاکہ پنجابی اپنے بچیاں نوں اپنی ماں بولی وچ تعلیم دلوا سکن   تے دفتری معاملات نوں اپنی ماں بولی وچ ای انجام دے سکن۔ جد کہ پنجاب دی تعلیمی تے دفتری زبان پنجابی ھو جان نال پنجابی تہذیب ' ثقافت تے رسم و رواج نے وی فروغ پا جانا سی تے پنجابی قوم نے وی پنجابی زبان دے لہجیاں تے پنجابی برادریاں دے جھیڑیاں چوں نکل کے سماجی ' معاشی تے سیاسی طور تے مظبوط ' مستحکم تے خوشحال قوم بن جانا سی۔ نالے پاکستان دیآں دوسریآں قوماں دے نال وی سیاسی ' سماجی ' معاشی اختلافات سلجھا لینے سی۔

نواز شریف نوں 30 سال وچ وی اے سمجھ نئیں آیا کہ؛

جد پنجابی بچے اپنی بیسک ایجوکیشن اوس زبان وچ لے سکدے نے جیڑی او گھر وچ بولدے نے ' جیڑی اناں دی ماں بولی اے۔ ھائیر ایجوکیشن ' انٹرنیشنل لینگویج انگلش وچ ای لینی چائی دی اے تے انگلش وچ ای لے رئے نے۔ فے اک اوپری زبان اردو ' جیہڑی انڈس ویلی سویلائزیشن دی نئیں بلکہ گنگا جمنا کلچر دی زبان اے ' اوس نوں سکھن یا بولن دی لوڑ کی اے؟

کی بچے اپنی ماں بولی وچ گل بوھتی سمجھدے نے یا دوجی بولی وچ؟

اے گل کردے کردے ای بنگالی وکھ ہو گئے۔

اے گل سندھی ' پٹھان ' بلوچ آکھ رئے نے۔

اے گل ای پنجابی قوم پرست کہہ رئے نے۔

نواز شریف نوں اے گل کددوں سمجھ آوے گی کہ؛

پنجابی قوم دنیا دی نوویں سب توں وڈی قوم اے۔

پنجابی قوم جنوبی ایشیا دی تیجی سب توں وڈی قوم اے۔

پنجابی مسلمان مسلم امہ دی تیجی سب توں وڈی برادری اے۔

پنجابیاں دی پاکستان وچ آبادی 60 فیصد اے۔

پنجابی زبان پاکستان دی 80 فیصد آبادی بولنا جاندی اے۔

پنجابی زبان پاکستان دی 90 فیصد آبادی سمجھ لیندی اے۔

تے فے پنجابیاں دے بچیاں نوں پنجابی میڈیم وچ نہ پڑھا کے پنجابیاں دے بچیاں نوں "دولے شاہ دے چوھے" کیوں بنایا جا ریا اے؟

کی نواز شریف نے سپریم کورٹ دا فیصلہ پڑھیا اے؟

جیس وچ سپریم کورٹ نے اپنے فیصلے دی تمہید وچ آکھیا اے کہ:

1۔ عدالت نے مشاہدہ کیتا اے کہ؛ حکومتِ پنجاب ' پنجابی زبان نوں اوس دا مقام دوان وچ ناکام رئی اے تے پنجابی زبان نوں حصولِ علم دا ذریعہ بنان دے لئی کوئی خاطر خواہ اقدامات نئیں کیتے۔

2۔ دستور وچ دتے گئے ذاتی وقار دے حق دا لازمی تقاضہ اے کہ؛ ریاست ھر مرد و زن شہری دی زبان نوں چاھے اوہ قومی ھووے یا صوبائی ' اک قابلِ احترام زبان دا درجہ ضرور دیوے۔

3۔ جد ریاست ایس گل تے اڑ جاوے کہ؛ اوہ زباناں جیہڑیاں پاکستان دے شہریاں دی اکثریت بولدی اے ' ایس قابل نئیں نے کہ اناں وچ ریاست دے کم انجام پا سکن تے فے ریاست اناں شہریاں نوں حقیقی معنی وچ انہاں دے انسانی وقار توں محروم کر رئی اے۔

4۔ اس گل وچ کوئی شک نئیں کہ؛ انفرادی یا اجتماعی وقار تے تعلیم اک دوجے نال جڑے ھوئے نے۔ تعلیم ' جیہڑی کہ اک بنیادی حق اے ' براہ راست زبان نال تعلق رکھدی اے۔

کی نواز شریف نوں پتہ اے کہ؛

یونیسکو جے آ ادارہ وی ' جیہڑا اقوامِ متحدہ دا تعلیمی ' سائنسی تے ثقافتی ادارہ اے ' ایس گل دی تائید کردا اے کہ؛ بچے نوں اوس دی اپنی زبان وچ ای تعلیم دتی جانی چائی دی اے۔ کیونکہ اپنی زبان ای اوہ زبان اے جیہڑی بچہ اپنے گھر تے ماحول توں سکھدا اے تے اوس دے پرچھاویں تھلے ای پروان چڑھدا اے۔

کی نواز شریف نوں پتہ اے کہ؛

پنجابی زبان دی پرورش صوفی بزرگاں بابا فرید ' بابا نانک ' شاہ حسین ' سلطان باہو ' بلھے شاہ ' وارث شاہ ' خواجہ غلام فرید ' میاں محمد بخش کیتی۔ ایس لئی پنجابی زبان دا پس منظر روحانی ھون دے کرکے پنجابی زبان وچ علم ' حکمت تے دانش دے خزانے نے جیہڑے اخلاقی کردار نوں بہتر کرن تے روحانی نشو نما دی صلاحیت رکھدے نے۔