پنجاب دے سیاسی سوچ رکھن والے پنجابی قوم پرستاں لئی سوچن والی گل۔

پنجاب دے سیاسی سوچ رکھن والے پنجابی قوم پرستو!!! پاکستان ای نئیں ' پاکستان دے سارے صوبے وی کثیرالاقومی نے۔ کراچی وچ جنے پنجابی ریندے نے ' اوس توں زیادہ اردو اسپیکنگ ھندوستانی مھاجر پنجاب وچ ریندے نے۔ خیبر پختونخواہ وچ جنے پنجابی ریندے نے ' اوس توں زیادہ پٹھان پنجاب وچ ریندے نے۔ بلوچستان وچ جنے پنجابی ریندے نے ' اوس توں زیادہ بلوچ پنجاب وچ ریندے نے۔

پاکستان دی 60٪ آبادی پنجابی اے ' ایس لئی پنجاب دی سب توں وڈی آبادی تے پنجابی ای اے ' پر کراچی دی وی دوجی وڈی آبادی پنجابی اے' دیہی سندھ دی وی دوجی وڈی آبادی پنجابی اے ' خیبر پختونخواہ دی وی دوجی وڈی آبادی پنجابی اے' بلوچستان دے پشتون علاقے دی وی دوجی وڈی آبادی پنجابی اے ' بلوچستان دے بلوچ علاقے دی وی دوجی وڈی آبادی پنجابی اے۔

جیہڑے پنجابی کراچی وچ ریندے نے او اردو وی بولنا جاندے نے ' پنجابی وی بولدے نے تے اپنے آپ نوں اکھواندے وی پنجابی نے۔ جیہڑے پنجابی دیہی سندھ وچ ریندے نے او سندھی وی بولنا جاندے نے ' پنجابی وی بولدے نے تے اپنے آپ نوں اکھواندے وی پنجابی نے۔ جیہڑے پنجابی خیبر پختونخواہ وچ ریندے نے او پختو وی بولنا جاندے نے ' پنجابی وی بولدے نے تے اپنے آپ نوں اکھواندے وی پنجابی نے۔ جیہڑے پنجابی بلوچستان دے پشتون علاقے وچ ریندے نے او پشتو وی بولنا جاندے نے ' پنجابی وی بولدے نے تے اپنے آپ نوں اکھواندے وی پنجابی نے۔ جیہڑے پنجابی بلوچستان دے بلوچ علاقے وچ ریندے نے او بلوچی وی بولنا جاندے نے ' پنجابی وی بولدے نے تے اپنے آپ نوں اکھواندے وی پنجابی نے۔

جیہڑے پنجابی پنجاب وچ ریندے نے او زیادہ تر اردو بولدے نے تے اپنے آپ نوں اکھواندے وی پاکستانی نے۔ جیہڑے پنجابی پنجاب وچ ریندے نے انہاں نوں تے پنجاب دی لسانی ' ثقافتی ' معاشی تے سیاسی ترقی لئی جدوجہد کرنی چائی دی اے۔ جیہڑے پنجابی کراچی ' دیہی سندھ ' خیبر پختونخواہ ' بلوچستان دے پشتون علاقے ' بلوچستان دے بلوچ علاقے وچ ریندے نے ' اوہ کی کرن؟ مسئلہ اے وے کہ؛

1۔ کراچی ' دیہی سندھ ' خیبر پختونخواہ ' بلوچستان دا پنجابی جے ریندا ای کراچی ' دیہی سندھ ' خیبر پختونخواہ ' بلوچستان وچ اے تے فے اوس نوں نہ پنجاب دی فکر کرنی چائی دی اے تے نہ پنجابی زبان ' ثقافت تے رسم رواج دی۔ انہاں نوں جتھے ریندے نے اوتھے دی زبان ' ثقافت تے رسم رواج وچ رچ وس جانا چائی دا اے؟

2۔ کراچی ' دیہی سندھ ' خیبر پختونخواہ ' بلوچستان دا پنجابی ریندا تے کراچی ' دیہی سندھ ' خیبر پختونخواہ ' بلوچستان وچ اے پر اوس نوں فکر پنجاب دی تے پنجابی زبان ' ثقافت تے رسم رواج دی کرنی چائی دی اے۔ کیونکہ جتھے او ریندے نے اوتھے دی زبان ' ثقافت تے رسم رواج وچ رچ وس کے وی اوتھے دے رین والیاں اناں نوں سمجھنا پنجابی ای اے تے رکھنا وی اوپرے آں ونگ ای اے؟

پنجاب وچ رین والے پنجابی قوم پرستاں نوں پنجابی قوم پرستی دی گل کردے آں اے خیال رکھنا چائی دا اے کہ پاکستان وچ پنجاب توں بار رین والے پنجابی کی کرن؟

سیاسی تے معاشی مفادات دی وجہ نال پنجاب دا پنجابی وکھ اے۔ کراچی ' دیہی سندھ ' خیبر پختونخواہ ' بلوچستان دے پشتون علاقے تے بلوچستان دے بلوچ علاقے دا پنجابی وکھ وکھ اے۔ پنجاب ' کراچی ' دیہی سندھ ' خیبر پختونخواہ ' بلوچستان دے پشتون علاقے تے بلوچستان دے بلوچ علاقے دے پنجابیاں دے اپنے اپنے سیاسی تے معاشی مفادات نے پر پنجابی ھون دے کرکے اک دوجے دے دکھ سکھ ونڈنے چائی دے نے۔ ایس نال پنجابیاں نوں سیاسی تے معاشی فائدہ ھووے گا ' نئیں تے پنجابیاں نوں سیاسی تے معاشی نقصان ھووے گا تے پنجابی قوم وی کمزور ھووے گی۔

جیہڑے پنجابی کراچی ' دیہی سندھ ' خیبر پختونخواہ ' بلوچستان ریندے نے او اپنے زور تے ریندے نے کوئی پنجاب دے پنجابیاں دے موڈے تے چڑہ کے نئیں ریندے۔ بلکہ پنجاب دے اناں پنجابیاں دی آں کراچی ' دیہی سندھ ' خیبر پختونخواہ ' بلوچستان وچ حرکتاں دے کرکے ذلیل ھوندے نے جیہڑے کراچی ' دیہی سندھ ' خیبر پختونخواہ ' بلوچستان وچ سرکاری نوکری ' ٹھیکیداری تے وپار کردے آں لٹ مار تے فراڈ کرکے واپس پنجاب نٹھ آندے نے۔

پنجاب دا پنجابی اک تے پہلوں ای سیاسی نئیں بلکہ کاروباری ذھن رکھدا اے ' دوجا پنجاب دے پنجابی نال نہ کراچی دے مھاجر دی بندی اے ' نہ دیہی سندھ دے سندھی دی بندی اے ' نہ خیبر پختونخواہ دے پٹھان دی بندی اے ' نہ بلوچستان دے پشتون علاقے دے پٹھان دی بندی اے تے نہ بلوچستان دے بلوچ علاقے دے بلوچ دی بندی اے۔ ایس لئی جے پنجاب دا پنجابی ' کراچی ' دیہی سندھ ' خیبر پختونخواہ ' بلوچستان دے پشتون علاقے تے بلوچستان دے بلوچ علاقے دے پنجابیاں نال سانجھ نہ کر سکیا تے فے پنجاب نال ھووے گا کی تے پنجابی قوم دا بنے گا کی؟