سیاست کرن والے گھا کیس نوں پاندے نے تے نواز شریف کی کرے گا؟

بہت سارے لوکاں نوں سیاست دا شوق اے۔ اے بڑی صلاحیت رکھدے نے۔ اناں دی سوچ وی چنگی اے۔ ملک تے قوم نال محبت وی کردے نے۔ بڑے خلوص نال چنگا کم وی کرنا چاھندے نے پر سیاست دا تجربہ نہ ھون دے کرکے اپنے آپ نوں پریشان تے اپنا وقت خراب کردے ریندے نے۔ میں وی کجھ عرصہ سیاست کیتی۔ ایس لئی حال دسدا واں کہ سیاست کرن والے کردے کی نے؟ ایس نال ھوسکدا اے کہ کسے نوں کجھ سمجھ آجاوے تے اوس نوں ایس نال فائدہ ھووے۔ جد میں اسٹوڈنٹ پولیٹکس کردا سی اودوں تجربہ نئیں سی۔ ایس لئی منڈے ای کٹھے کردا ریندا سی۔ اک اک منڈے دے نخرے چکی دے سی۔ ھر اک دے مشورے سنی دے سی۔ ھر اک دے مطالبے سنی دے سی۔ ھر اک دے دکھ سکھ وچ شامل ھونا پیندا سی۔ ھر اک دی آں وکھ وکھ منتاں کردا ھوندا سی۔ تد جاکے الیکشن جتی دا سی۔

فے سٹی پالیٹیکس شروع کر دتی۔ عام بندے بھاویں جنا وی رولا پاندے رین۔ اناں نوں تے گھا ای نئیں پائی دا سی پر میرے انتخابی حلقے وچ جیہڑے گھرانے سی اناں نوں راضی رکھی دا سی تے الیکشن جتی دا سی۔ جیہڑے بندے روسے ریندے سی یا بوھتے مشورے دین تے مطالبے کرن والے ھوندے سن۔ اناں کولوں دور ای رئی دا سی۔ اے پتہ ھوندا سی کہ سارے آں بندی آں تے ووٹ دینے نئیں تے تے کجھ بندی آں نے مخالفت وچ وی ووٹ پانے نے۔ جد کہ میرے مخالف امیدوار دے مخالفاں نے مینوں ووٹ پا دینے نے۔ ایس لئی حساب برابر ای رینا اے۔ انج وی جد گھرانیاں دے ووٹ مل جانے نے تے فے کلے کلے بندے دے نخرے چکن دا فائدہ کی اے؟

فے صوبائی سیاست شروع کر دتی۔ اودوں عام بندے نوں تے کی گھرانیاں دے وڈیاں نوں وی گھا نئیں پائی دی سی۔ اناں نال میل ملاقات کرنی وی پے جاندی سی تے اناں نال کلے کلے نئیں ملی دا سی۔ کٹھ وچ ملی دا سی تاکہ جیہڑا رولا شولا اناں پانا اے او پا پو کے رانجھا راضی کرلین۔ وکھ وکھ صرف اناں نال ملی دا سی جنہاں دے خاندان ھوندے سن۔ بلکہ جیہڑے برادری دے مکھی ھوندے سن۔ ان دا بوھتا خیال رکھی دا سی۔ پر اناں نے وی جد کوئی مشورہ دینا ھوندا سی یا مطالبہ کرنا ھوندا سی ' اودوں اناں نوں آکھی دا سی کہ زبانی دسن دے بجائے لکھ کے دے دو۔

اوس توں بعد سیاست ای چھڈ دتی کہ کی لوڑ اے خاہ مخواہ سیاست دے لئی لوکاں دے نخرے چکن دی۔ مشورے سنن دی۔ مطالبے سنن دی۔ میل ملاقاتاں کردے رین دی۔ جیہڑے بندے واسطے والے نے اناں نال ای صلاح مشورہ کرنا چائی دا اے تے اناں نال ای دکھ سکھ ونڈنا چائی دا اے۔ جے کدی سیاست کرنی وی پے گئی تے ٹیم موجود ھونی اے تے سیاست والا کھاتا کھولن وچ کیہڑی دیر لگنی اے۔ اے حوالہ ایس توں دے رے آ واں کہ نواز شریف میرے وانگوں کوئی عام بندہ نئیں اے۔ ملک دا 3 واری وزیرِ اعظم رے آ اے۔ اوس نے خانداناں یا برادریاں نوں راضی نئیں رکھنا۔ اوس دے پاکستان وچ قومی تے پاکستان توں بار بین الاقوامی سطح تے تعلقات نے۔

ایس لئی نواز شریف نے اپنا کھیل کھیلنا اے نہ کہ پنجابیاں دی سیوا کرنی اے۔ (میں وی مضمون لکھ چھڈدا واں پر پنجابیاں دے نخرے نئیں چک ھوندے ایس لئی عملی سیاست نئیں کردا۔ جے کدی عملی سیاست کیتی وی تے فے میرے کول واسطے والے بندے تے ھین ای۔ جنہاں نال صلاح مشورہ ھوندا رھندا اے تے اناں نال ای دکھ سکھ وی ونڈی دا اے۔ انہاں واسطے والے بندی آں توں علاوہ مینوں او بندے وارا کھان گے جیہڑے اپنی اپنی برادری وچ اثر رکھدے ھون۔ اک اک جنے یا ودھ توں ودھ اپنے گھر یا خاندان ' محلے یا علاقے تک اثر رسوخ رکھن والے بندی آں دے نخرے تے میرے کولوں وی چک نئیں ھونے)۔

گل اے وے کہ بندہ 150 بندی آں توں زیادہ بندی آں نال واسطے داری نئیں نبھا سکدا۔ 150 بندی آں توں زیادہ صرف جان پہچان ' دعا سلام یا میل ملاقات ای رکھ سکدا اے۔ دنیا وچ کسے بندے کول وی 150 بندی آں توں ودھ ٹیم نئیں ھوسکدی جیس نال اوس دا ھر ویلے واسطہ رھندا ھووے۔ ایس لئی کسے وی بندے دی ٹیم ویکھ کے اندازہ کیا جا سکدا اے کہ او کیس سطح دا سیاسی کھیل کھیلن جوگا اے۔

سیاست دا جیس سطح تے کھیل کھیلنا ھووے اوس سطح توں وڈی سطح دی ٹیم دا میمبر بننا وی ضروری ھوندا اے۔ جد میں سیاست کردا سی اودوں جیس سطح تے کھیل کھیلدا سی۔ اوس سطح توں وڈی سطح تے سیاست دا کھیل کھیلن والے لیڈر دی ٹیم دا حصہ بن جاندا سی۔ اوس نال ھر ویلے واسطہ رھندا سی۔ اوس کولوں فائدہ چکدا سی تے جیہڑے میری ٹیم وچ ھوندے سی۔ جنہاں دا ھر ویلے میرے نال واسطہ رھندا سی۔ او میرے کولوں فائدہ چکدے سن۔

اسٹوڈنٹ پولیٹکس توں لے کے صوبائی سطح تک عملی سیاست تے اوس توں بعد قومی سطح تے سرسری سیاست کرن دے کرکے میرا پاکستان دے سارے ای صوبیاں وچ جانا ھوندا ریا۔ پنجابیاں توں علاوہ پٹھان ' ھندکو ' بلوچ ' بروھی ' سماٹ تے ھندوستانی مھاجر عوام دے نال نال سیاستداناں تے صحافیاں نال جان پہچان ' دعا سلام تے میل ملاقات ھوندی رئی۔ بہت ساریاں نال رابطے تے واسطے وی ھوگئے۔

میرے سیاسی تجربے دے مطابق پنجابی عوام تے کی پنجابی سیاستداناں تے صحافیاں وچ وی سیاسی شعور نئیں اے۔ ایس لئی اے نہ تے کسے دی سیاسی ٹیم دا حصہ بن سکدے نے تے نہ آپ ای قومی تے کی صوبائی سطح تے سیاسی ٹیم بنا سکدے نے۔ اے یا تے جذباتی ھوندے نے تے یا فے اپنا اپنا مفاد کڈھدے نے۔ جد کہ اناں دی سیاسی صلاحیت ودھ توں ودھ اپنے علاقے دی مقامی سیاست تک تے سیاسی دلچسپی اپنی برادری تک ھوندی اے پر گلاں صوبائی یا قومی تے کی بین الاقوامی سیاسی معاملات دی آں وی انج کردے نے جداں اے بڑا علم تے تجربہ رکھدے ھون۔ جد کہ زیادہ تر نوں پنجاب توں بار جاکے پاکستان دے علاقے ویکھن تے اوتھے دے لوکاں نال مل کے سیاسی ماحول نوں سمجھن دا اتفاق وی نئیں ھویا ھوندا۔

جتھے تک گل نواز شریف دی اے تے نواز شریف کولوں عام پنجابی نوں کوئی فائدہ نئیں ھونا۔ نواز شریف کولوں فائدہ اناں نوں ھونا اے جیہڑے نواز شریف دی ٹیم دا حصہ ھون گے۔ ھن نواز شریف کھیل کی کھیلدا اے؟ ایس دا ھجے پتہ نئیں۔ نواز شریف نے پنجابیاں کولوں پچھ کے کھیل نئیں کھیلنا تے ٹیم دے 150 بندے وی اوس نے او ای بنانے نے جیہڑے اوس دے کھیل وچ اوس لئی کم دے ھون گے۔ نالے نواز شریف نے سیاست دا کھیل اپنی سطح توں وڈی سطح تے سیاست دا کھیل کھیلن والے لیڈر دی ٹیم دا حصہ بنے بغیر نئیں کھیلنا۔ وجہ اے وے کہ؛ ایداں کیتے بغیر نواز شریف کولوں پاکستان دی قومی سیاست دا کھل کھیلیا ای نئیں جانا۔

جتھے تک گل پنجابی عوام دی اے تے پنجابی عوام وچ نخرے بوھتے ھوندے نے پر ووٹ انہاں نے ضرور پانے ھوندے نے۔ جیس کول وڈی ٹیم ھووے او پنجابی عوام نوں ذلیل کرکے وی حکومت تے بنا ای لیندا اے۔ ایس توں علاوہ گل اے وی اے کہ پنجابیاں وچ اے گل بوھتی اے کہ پنجابی جیس نوں پسند نہ کرن اوس دے مخالف نوں ووٹ پاندے نے۔ اے اک بیماری اے جیہڑی بغض ' حسد یا کینہ پروری دے کرکے ھوندی اے۔ ایس ویلے پاکستان وچ سب توں وڈی ٹیم تے فوج اے۔ فوج توں بعد سیاسی لیڈراں کول ٹیماں نے تے او صرف 4 ای سیاستدان نے جنہاں کول قومی سطح دی آں ٹیماں نے۔ 1۔ نواز شریف 2۔ آصف زرداری 3۔ پرویز مشرف 4۔ عمران خان۔ پنجابی عوام نوں وی اناں چاراں چوں اک نوں ووٹ پانے پینے نے۔

ایس لئی پنجابیاں نوں چائی دا اے کہ پہلے او وکھیا کرن کہ او کسے قومی یا صوبائی ٹیم دا حصہ بن سکدے نے۔ ضلع یا تحصیل دی سطح دی ٹیم دا حصہ بن سکدے نے۔ یونین کونسل یا محلے دی سطح دی ٹیم دا حصہ بن سکدے نے۔ اوس توں بعد اوس ٹیم دا حصہ بن کے ٹیم دے آگو یا ٹیم اگے اپنے مطالبے رکھیا کرن تے مشورے دے آ کرن۔ ٹیم دا حصہ بنے بغیر مشورے دینا یا مطالبے کرنا نرا رولا پان اے تے ایس نال وقت ای خراب ھوندا اے۔ گل نہ کوئی سندا اے تے نہ کوئی مندا اے۔