پنجابی قوم پرستی دا کم کرن والے دوستاں نوں صلاح

پنجابی قوم پرستی دا کم کرن والے دوستو !!! پہلی گل اے وے کہ؛ پاکستان وچ پنجابی قوم پرستی بوت ودھ چکی اے۔ دوجی گل اے وے کہ؛ ھن پنجابی قوم پرستاں نوں سیاسی پلیٹ فارم تے کٹھا کرن لئی پنجابی قوم پرست سیاسی پارٹیاں وی بنن لگ پئیاں نے۔ تیجی گل اے وے کہ؛ سیاسی پارٹی بنان لئی ضروری ھوندا اے کہ؛ سیاسی پروگرام وی ھووے تے سیاسی پروگرام تے عمل کروان والے بندے وی ھون۔ جد کہ سیاسی پروگرام تے عمل کروان والے او بندے منظم وی ھون تاکہ اپنے اپنے حصے دا کم کر سکن تے اپنا اک "آگو" وی بنان۔ تاکہ اپنے اپنے حصے دا کم کرن والے بندیاں نوں "آگو" ولوں ضرورت دے مطابق سیاسی پروگرام وی ملدا رووے۔ "آگو" ولوں اناں وچ آپس دا تعاون وی کروایا جاووے تے آپس وچ اختلاف ھون ویلے اناں وچ "آگو" ولوں مصالحت وی کروائی جاسکے۔

چوتھی گل اے وے کہ؛ ھجے او پنجابی قوم پرست سیاسی پارٹیاں بنا رئے نے جنہاں نوں عملی سیاست کرن دا تجربہ نئیں اے۔ ایس لئی اناں کول نہ تے پاکستان دی سطح دا پنجابی قوم پرستی والا سیاسی پروگرام اے تے نہ سیاسی پروگرام تے عمل کروان والے پاکستان دی سطح دے سیاسی بندے نے پر اناں نوں شوق چڑھیا ھویا اے کہ؛ اناں نوں پنجابی قوم دا "آگو" منیا جاوے۔ جیس دے کرکے سیاسی پارٹیاں بنان دے نال نال پنجابی قوم پرست آپس وچ لڑ وی رئے نے۔ ایس لئی پنجابی قوم پرست سیاسی پارٹیاں بنان دی صرف خانہ پری ھو رئی اے۔ اے وی سیاسی عمل دا حصہ اے تے سیاسی کامیابی حاصل ھون توں پہلے والی منزل اے کہ؛ اے عمل لوکاں نوں تجربہ دے کے لوکاں دا سیاسی شعور ودھا دیندا اے تے لوکی اپنی سیاسی غلطیاں کولوں سکھ کے صحیح سیاسی کم کرن دا طریقہ جان جاندے نے۔

پنجویں گل اے وے کہ؛ 2020 وچ پنجابی قوم پرست سیاسی پارٹی بنے گی جیس وچ عملی سیاست دا تجربہ رکھن والے پنجابی ھون گے۔ جیہڑے پہلے ای سیاسی پارٹیاں دے عہدیدار ' ایم پی اے ' ایم این اے ' سنیٹر ' صوبائی تے مرکزی وزیر یا مشیر بن دے رئے نے۔ اناں کول پاکستان دی سطح دا پنجابی قوم پرستی والا سیاسی پروگرام وی ھووے گا تے اناں کول اوس سیاسی پروگرام تے عمل کروان والے بندے وی ھون گے۔ او اپنا اک "آگو" وی بنان گے۔ اناں دے 2020 وچ پاکستان دی سطح دی پنجابی قوم پرست سیاسی پارٹی بنان توں بعد جیہڑیاں پنجابی قوم پرست سیاسی پارٹیاں ھن بنیاں ھوئیاں نے اناں دی اھمیت نئیں رینی۔

ایس لئی میری پنجابی قوم پرستی دا کم کرن والے دوستاں نوں عرض اے کہ؛ جیس وچ جنی صلاحیت اے ' او پنجابی قوم پرستی دا اوناں ای کم کرکے اپنے ولوں پنجابی قوم لئی اپنا حصہ پاووے۔ نئیں تے پنجابی قوم پرستی دا کم کرن والے آپس وچ لڑن نال نقصان اپنا ای کرن گے۔ پنجابی قوم پرستی دا کم تے ھن رکنا نئیں اے۔ ایس لئی سیاسی صلاحیت والے نوویں لوک آکے پنجابی قوم پرستی دا کم سمبھال لین گے تے ایس ویلے سیاسی صلاحیت توں بغیر صرف شوق یا جذبہ دی بنیاد تے پنجابی قوم پرستی دا کم کرن والے پرانے دوست صرف اپنی اپنی داستان ای دسیا کرن گے۔

ھن تک پنجابی قوم پرستی نوں "فالو" کرن والے لکھاں دی تعداد وچ تیار ھو چکے نے۔ قوم پرستی نوں "سپورٹ" کرن والے ھزاراں دی تعداد وچ تیار ھو چکے نے۔ پنجابی قوم پرستی لئی "ورک" کرن والے سینکڑاں دی تعداد وچ تیار ھو چکے نے۔ ھن 2019 وچ پنجابی قوم پرستاں دی "قیادت" کرن والے درجناں دی تعداد وچ تیار ھون گے۔

2020 وچ درجناں دی تعاد وچ پنجابی قوم پرستاں دی "قیادت" کرن والے آں چوں بہت سارے پنجابی قوم پرستاں دی "قیادت" کرن والے وکھ وکھ پنجابی قوم دی سماجی یا سیاسی یا معاشی ترقی دا "پروگرام" بنان دے بجائے اپنا اک "آگو" بنا کے پنجابی قوم دے لئی سماجی ‘ سیاسی ‘ معاشی ترقی دا قومی سطح تے "سانجھا پروگرام" بنان گے۔

اوس "سانجھے پروگرام" نوں سینکڑاں دی تعاد وچ پنجابی قوم پرستی لئی "ورک" کرن والے پنجابی قوم پرستاں دے ذریعے ھزاراں دی تعداد وچ پنجابی قوم پرستی نوں "سپورٹ" کرن والے پنجابی قوم پرستاں کولوں "سپورٹ" کروان گے۔ جد کہ لکھاں دی تعداد وچ پنجابی قوم پرستی نوں "فالو" کرن والے اوس "پروگرام" نوں "فالو" کرن گے۔ ایس دا اثر کروڑاں پنجابیاں تے ھووے گا تے کروڑاں پنجابی اوس "پروگرام" تے "عمل" کرن گے۔ ایس لئی کروڑاں پنجابیاں دے اک ای "عمل" کرن نال پنجابی قوم دے لئی قومی سطح تے بنایا جان والا سماجی ‘ سیاسی ‘ معاشی ' ترقی دا "پروگرام" قومی سطح تے کامیابی حاصل کرے گا۔ انشاء اللہ