لاھور ھن مودودی تے سرسید دے پیروکاراں کولوں جان چھڈانا چاندا اے۔

سرسید احمد خان دا پوتا سید سر مسعود راس سی۔ پڑپوتا محمود راس سی جیہڑا پاکستان بنن توں بعد گجرات آگیا تے اوس دے گھر 1969 نوں اوس دا پتر مراد راس جمیا جیہڑا تعلیم حاصل کرن لئی لاھور آگیا۔ مراد راس دا دادا مسعود راس 1929ء توں علی گڑھ مسلم یونیورسٹی دا وائس چانسلر رے آ۔ مسعود راس انجمن ترقی اردو دا وی صدر سی۔

مراد راس بینک وچ نوکری کردا سی تے 2013 وچ پی ٹی آئی دے ٹکٹ تے ماڈل ٹاؤن چوں ایم پی اے بنیا تے 2018 وچ مڑ کے الیکشن جت کے پنجاب دا وزیرِ تعلیم بن گیا۔ مراد راس دا آکھنا اے کہ پنجابیاں دی زبان اردو اے۔ ایس لئی 2020 توں پنجاب دے اسکولاں وچ انگریزی ختم کرکے پنجابیاں دے بچیاں نوں اردو وچ تعلیم دتی جاوے گی۔ اے ھور گل اے کہ پنجابیاں دے بچیاں نوں انگریزی سکھن دا تے فائدہ اے پر اردو سکھن دا کوئی فائدہ نئیں اے۔

پنجابیاں نوں مراد راس تے غصہ کرن دے بجائے مراد راس دی تعریف کرنی چائی دی اے کہ؛ پنجاب دا وزیرِ تعلیم بنن توں بعد مراد راس اپنے وڈیاں دے مشن تے عمل کردے آں ھوئیاں اردو نوں وادھا دے رے آ اے۔ پنجابیاں دے بچے جے اپنی ماں بولی دے بجائے اردو بولن گے تے فے اردو بولن والے ھندوستانی مھاجراں دی پنجاب تے سماجی ' سیاسی تے انتظامی بالادستی رووے گی۔ پنجابی ذھنی طور تے غلام بنے رین گے۔ ایس لئی مراد راس نے پنجابیاں نوں "نتھ" پائی ھوئی اے تے "تن" کے رکھیا ھویا اے۔

اے اصول اے کہ جیس طبقے دا علاقے دے وڈے شھر تے راج ھووے او ای اوس علاقے دے لوکاں تے راج کردا اے۔ پنجابیاں دا دنیا وچ سب توں وڈا شھر لاھور اے۔ پاکستان بن دے آں ای؛ اک تے مولانا مودودی نے لاھور تے قبضہ کرکے پنجابیاں نوں پنجابی دے بجائے مسلمان بنان دا کم شوع کردتا۔ اے کم کرن لئی مودودیت دے فلسفے دی پیروی کرن نوں مسلمان ھون لئی بنیاد بنایا۔ جد کہ پنجابی صوفیا کرام دے پیروکار سن۔ دوجا علی گڑہ دے اردو بولن والے ھندوستانی مھاجراں نے لاھور تے قبضہ کرکے پنجابیاں نوں پنجابی دے بجائے پاکستانی بنان دا کم شروع کردتا۔ اے کم کرن لئی اردو نوں پاکستانیاں دی زبان ھون نوں بنیاد بنایا۔ جد کہ پنجابیاں دی زبان پنجابی سی۔

پنجابیاں دا حال اے وے کہ؛ پنجابی بنو۔ پنجابی پڑھاؤ۔ دا رولا پاندے ریندے نے تے پنجابی زبان نوں پنجاب دی تعلیمی تے دفتری زبان بنان دی آں منتاں کردے ریندے نے۔ پنجابیاں نوں اے سمجھ ای نئیں آندی کہ؛ کھو چوں بوکے کڈھن نال کجھ نئیں ھونا۔ کھو چوں کتا کڈھنا پینا اے۔ ایس لئی لاھور والے مودودی دے پیروکاراں کولوں جان چھڈان گے تاں ای پنجابی بن سکن گے۔ لاھور والے سرسید دے پیروکاراں کولوں جان چھڈان گے تاں ای پنجابی بولن لگن گے۔ لاھوریاں نوں سدھی سدھی گل کرنی چائی دی اے کہ؛ لاھور ھن مودودی دے پیروکاراں تے سرسید دے پیروکاراں کولوں جان چھڈانا چاندا اے۔ آپ ای لاھوری پنجابی وی بنن لگ پین گے تے پنجابی وی بولن لگ پین گے۔