گھر ' خاندان ' برادری تے قوم دے مسئلے وکھ وکھ ھوندے نے۔

اک جنے توں لے کے قوم تک دے مرحلے اے نے کہ اک ای گھر دے جی کٹھے ھو کے گھر بناندے نے۔ اک ای خاندان دے گھر کٹھے ھو کے خاندان بناندے نے۔ اک ای برادری دے خاندان کٹھے ھو کے برادری بناندے نے۔ اک ای قوم دی آں برادریاں کٹھے ھو کے قوم بناندیاں نے۔ کسے زمانے وچ قوماں دے اپنے اپنے علاقے ھوندے سن پر ریاستاں دی آں سرحداں نوں تسلیم کرن دے عالمی نظام توں بعد ھن ریاست وچ اک توں زیادہ قوماں ھوندیاں نے تے ریاست وچ رین والے ساری ای ریاست دے شہری ھوندے نے۔

جتھے گل گھر دی ھووے ' اوتھے گھر دے سارے ای جی آں نوں گھر دا حصہ ھون دے کرکے اپنا اپنا حصہ پانا چائی دا اے۔ گھر دے لئی اپنے اپنے حصے دا کم کرنا چائی دا اے۔ گھر دے مفاد نوں اگے تے اپنے اپنے ذاتی مفاد نوں پچھے کر دینا چائی دا اے۔ اے سوچنا تے سمجھنا چائی دا اے کہ گھر مظبوط ھووے گا تاں ای اوس نے وی تگڑا رینا اے۔ گھر نوں فائدہ ھووے گا تاں ای اوس نوں وی فائدہ ھووے گا۔ گھر دی عزت ھووے گی تاں ای اوس دی وی عزت ھووے گی۔

جتھے گل خاندان دی ھووے ' اوتھے خاندان دے سارے آں ای گھراں نوں خاندان دا حصہ ھون دے کرکے اپنا اپنا حصہ پانا چائی دا اے۔ خاندان دے لئی اپنے اپنے حصے دا کم کرنا چائی دا اے۔ خاندان دے مفاد نوں اگے تے اپنے اپنے گھراں دے مفاد نوں پچھے کر دینا چائی دا اے۔ اے سوچنا تے سمجھنا چائی دا اے کہ خاندان مظبوط ھووے گا تاں ای گھراں وی تگڑا رینا اے۔ خاندان نوں فائدہ ھووے گا تاں ای گھراں نوں وی فائدہ ھووے گا۔ خاندان دی عزت ھووے گی تاں ای گھراں دی وی عزت ھووے گی۔

جتھے گل برادری دی ھووے ' اوتھے برادری دے ساریاں ای خانداناں نوں برادری دا حصہ ھون دے کرکے اپنا اپنا حصہ پانا چائی دا اے۔ برادری دے لئی اپنے اپنے حصے دا کم کرنا چائی دا اے۔ برادری دے مفاد نوں اگے تے اپنے اپنے خانداناں دے مفاد نوں پچھے کر دینا چائی دا اے۔ اے سوچنا تے سمجھنا چائی دا اے کہ برادری مظبوط ھووے گی تاں ای خانداناں وی تگڑا رینا اے۔ برادری نوں فائدہ ھووے گا تاں ای خانداناں نوں وی فائدہ ھووے گا۔ برادری دی عزت ھووے گی تاں ای خانداناں دی وی عزت ھووے گی۔

جتھے گل قوم دی آجاوے ' اوتھے پنجابی قوم دی آں ساریاں ای برادریاں نوں پنجابی قوم دا حصہ ھون دے کرکے اپنا اپنا حصہ پانا چائی دا اے۔ قوم دے لئی اپنے اپنے حصے دا کم کرنا چائی دا اے۔ قوم دے مفاد نوں اگے تے اپنیاں اپنیاں برادریاں دے مفاد نوں پچھے کر دینا چائی دا اے۔ اے سوچنا تے سمجھنا چائی دا اے کہ قوم مظبوط ھووے گی تاں ای برادریاں وی تگڑیاں رین گی آں۔ قوم نوں فائدہ ھووے گا تاں ای برادریاں نوں وی فائدہ ھووے گا۔ قوم دی عزت ھووے گی تاں ای برادریاں دی وی عزت ھووے گی۔