پنجابی نوں سیاست دے شعبے وچ سیاسی شعور ودھانا پے نا اے۔

اک گل پنجابیاں نوں یاد رکھنی چائی دی اے کہ بین الاقوامی طاقتاں دے کھیل دا اثر قوماں تے وی پیندا اے۔ ایس ویلے پنجاب دے اگے پچھے بین الاقوامی طاقتاں دا کھیل ھو رے آ اے۔ ھر کسے دا اپنا اندازہ ھوندا اے۔ میرے اندازے دے مطابق ایس کھیل دے نتیجے وچ یا تے بلوچستان نوں پاکستان تو وکھرا کر دتا جانا اے یا فر کشمیر تے ھندوستانی پنجاب نے ھندوستان تو وکھرے ھو کے پاکستان نال الحاق کر لینا اے۔

ھووے جو وی پر ایس ھون نا ھون وچ سب توں وڈا کردار مسلمان پنجابی دا ای ھونا اے۔ ایس لئی پنجابیاں نوں جوش دے نال نئیں حوش نال کم لینا پینا اے۔ صرف مسلمان پنجابی نوں ای نئیں ' عیسائی پنجابی ' ھندو پنجابی تے سکھ پنجابی نوں وی حوش نال کم لینا پینا اے۔ پر ایدھے لئی وی پنجابیاں وچ سیاسی شعور تے پنجابیاں دا سیاسی طور تے مظبوط ھونا بوھت ضروری اے۔

پاکستان بنن تو پہلوں وی بین الاقوامی کھیل ھویا سی ' جیس دے کرکے پاکستان بنیا۔ پر اوس ویلے وی سیاست دے شعبے وچ سیاسی شعور دے نہ ھون دے کرکے پنجابیاں نے جوش ای وکھایا ' حوش نال کم نہ لیتا۔ ایس کرکے ای اے 20 لکھ پنجابی مروا بیٹھے ' 2 کروڑ پنجابی دربدر کروا بیٹھے ' پنجاب وی ونڈوا بیٹھے۔ فائدھ یا تے غیر پنجابی ھندو چک گئے تے یا غیر پنجابی مسلمان۔

مسلمان پنجابی 72 ورھیاں تو پاکستان نوں بچان وچ وی لگے ریندے نے تے بنان وچ وی۔ پر فے وی پاکستان توں بار دے دشمن تے اپنے تھاں ' پر اے غیر پنجابی مسلمان پاکستانی وی' اک پاسے پنجاب تے پنجابیاں نوں گالاں کڈھدے ریندے نے تے دوجے پاسے اے غیر پنجابی مسلمان پاکستانی ' پنجاب تے پنجابیاں دی آں جڑاں وڈھن وچ لگے ریندے نے۔ وجہ ایس دی اے وے کہ پنجابیاں وچ ھجے تک نہ سیاسی شعور اے تے نہ پنجابی ھجے تک سیاسی طور تے مظبوط ھویا اے۔

پنجابی نے زراعت ' ھنرمندی ' تجارت ' صنعت ' سول بیوروکریسی تے ملٹری بیوروکریسی دے شعبے وچ مھارت حاصل کرکے اپنے آپ نوں مضبوط کیتا اے تے صحافت دے شعبے وچ مھارت حاصل کرکے اپنے آپ نوں مضبوط کر رے آ اے۔ سیاست دے شعبے وچ ھجے تک پنجابی نے مھارت حاصل نئیں کیتی۔ ایس لئی ھجے تک سیاست دے شعبے وچ پنجابی مضبوط نئیں اے۔

زراعت ' ھنرمندی ' تجارت ' صنعت ' سول بیوروکریسی تے ملٹری بیوروکریسی دے شعبے دا تجربہ رکھن والے پنجابی سیاسی ذھن ای نئیں رکھدے۔ ایس لئی جد سیاست کردے نے تے سیاست دے ناں تے کاروبار کردے نے یا فے نوکری ای کردے نے۔ ایس لئی نہ پنجابیاں دے سماجی ' پنجاب دے اقتصادی ' پنجاب تے پنجابیاں دے معاشی تے سیاسی حق دی گل کردے نے۔ نہ پنجاب دی تعلیمی زبان پنجابی کرن دی گل کردے نے۔ نہ پنجاب دی سرکاری زبان پنجابی کرن دی گل کردے نے۔ نہ آپ وی پنجاب دے دفتراں تے پنجاب دی اسمبلی وچ پنجابی زبان وچ گل کردے نے۔ نہ اے گل کردے نے کہ پاکستان وچ پنجابیاں دے غیر پنجابی مسلماناں نال کیس طراں دے تعلقات ھونے چائی دے نے تے گوانڈ وچ جیڑے غیر مسلمان پنجابی نے ' اناں نال کیس طراں دے تعلقات ھونے چائی دے نے؟

سیاسی ذھن نہ ھون دے کرکے ' سیاسی سوچ نہ ھون دے کرکے ' سیاسی حکمت عملی نہ ھون دے کرکے ' غیر سیاسی ذھن والے پنجابی ' سیاست کرن لئی ' سیاسی اثر و رسوخ حاصل کرن لئی ' مال خرچ کردے نے یا فے برادری تے علاقے دی بنیاد تے ووٹ لیندے نے تے پنجابی قوم نوں برادریاں تے علاقیاں وچ ونڈدے نے۔ ایس لئی جیس طراں پنجابی نے زراعت ' ھنرمندی ' تجارت ' صنعت ' سول بیوروکریسی تے ملٹری بیوروکریسی دے شعبے وچ مھارت حاصل کرکے اپنے آپ نوں مضبوط کیتا اے تے صحافت دے شعبے وچ مھارت حاصل کرکے اپنے آپ نوں مضبوط کر رے آ اے۔ اوسے طراں سیاست دے شعبے وچ وی مھارت حاصل کرکے سیاست دے شعبے وچ وی پنجابی نوں مضبوط ھونا پینا اے تے پنجابیاں وچ سیاسی شعور ودھانا پینا اے۔

پنجابیاں نوں اے سمجھنا پینا اے کہ سیاست دا کھیل تن طراں دے بندے کھیل سکدے نے تے باقی تماشبین یا رولا پان والے ھوندے نے۔

سیاست دا کھیل؛

1۔ اک تے او کھیل سکدے نے جنہاں نوں سیاسی پروگرام بنانا آندا ھووے۔

2۔ دوجے او کھیل سکدے نے جنہاں نوں بنائے گئے سیاسی پروگرام تے عمل کروانا آندا ھووے۔

3۔ تیجے او کھیل سکدے نے جنہاں دا عوام نال رابطہ ھووے تے او بنائے گئے کسے سیاسی پروگرام دے اتے عوام نوں کٹھا کر سکن۔