جے پاکستان وچ مارشل لاء نہ آیا تے فے سیاسی کھیل کی ھووے گا؟

سیاست دے کھیل دے کھلاڑی ' مقامی ' صوبائی ' قومی تے بین الاقوامی ھوندے نے۔ پاکستان وچ ایس ویلے قومی تے بین الاقوامی کھلاڑیاں دا سیاسی کھیل ھو ریا اے۔ سیاست دے مقامی تے صوبائی کھلاڑیاں دا ایس سیاسی کھیل وچ تماش بین ھون توں علاوہ ھور کوئی کردار نئیں۔

پاکستان دے سیاسی کھیل وچ تن وڈے بین الاقوامی کھلاڑی امریکہ ' چین تے روس نے جد کہ تن وڈے قومی سیاسی کھلاڑی نواز شریف ' عمران خان تے آصف زرداری نے۔ نواز شریف کول پاکستان دی وفاقی حکومت توں علاوہ پنجاب ' بلوچستان ' کشمیر تے گلگت بلتستان دی حکومت وی اے۔ عمران خان کول خیبر پختونخواہ دی حکومت اے تے آصف زرداری کول سندھ دی حکومت اے۔

پاکستان دی فوج دا ادارہ تے سپریم کورٹ دا ادارہ پاکستان دے آئینی تے ریاستی ادارے نے۔ جمہوری تے سیاسی نظام نوں چلان لئی آئینی تے ریاستی ادارے آں نوں سیاست وچ پھسن توں دور رکھنا ضروری ھوندا اے پر آئینی تے ریاستی ادارے آں وچ کم کرن والے آں چوں جے کوئی سیاسی کھلاڑی بن جان تے فے آئینی تے ریاستی ادارے آں نوں سیاست زدہ ھون توں بچانا اوکھا ھو جاندا اے۔

پانامہ کیس دی سپریم کورٹ وچ جیس طراں شنوائی ھورئی اے ' اوس دے کرکے پانامہ کیس قانونی توں بوھتا سیاسی کیس بندا جا رے آ اے۔ جیس دے کرکے لگدا اے وے کہ اگے جاکے سپریم کورٹ دے ادارے نے سیاست دی نظر ھو جانا اے۔ اندازہ اے وے کہ پانامہ کیس دے سپریم کورٹ دے بینچ چوں نواز شریف نا اھل ھو جائے گا۔ نواز شریف دی نا اھلی توں بعد نواز شریف دا تجویز کردہ ن لیگ دا ای وزیرِ اعظم بن جانا اے۔ پنجاب ' بلوچستان ' کشمیر تے گلگت بلتستان دی حکومت وی ن لیگ دی ای رینی اے پر پانامہ کیس دے خلاف سپریم کورٹ وچ اپیل کرن توں بعد سپریم کورٹ دے فل بینچ چوں نواز شریف بحال ھو جاوے گا۔

ایس ویلے نواز شریف کول حکومت تے ھے پر طاقت نئیں اے۔ طاقت قانون نال ملدی اے۔ قومی اسمبلی وچ تے نواز شریف قانون سازی کر سکدا اے پر سینٹ وچ نئیں۔ مارچ 2018 وچ نواز شریف نوں سینٹ وچ وی اکثریت مل جانی اے تے نواز شریف نے سینٹ وچ قانون سازی کرن دے نال نال آئین وچ تبدیلی کرن دی پوزیشن وچ وی آجانا اے۔ ایس دے کرکے مارچ 2018 توں بعد نواز شریف کول حکومت ای نئیں ھونی ' طاقت وی ھونی اے تے فے طاقتور حکمران بنن توں بعد نواز شریف نے چک پھٹے دینے نے۔ عمران خان تے آصف زرداری نے آپس وچ کٹھے ھو کے وی نواز شریف دا مقابلہ نئیں کر سکنا۔

جے ایس کھیل دے وچ کدھرے پاکستان وچ مارشل لاء نہ آیا تے فے اگلے 2018 دے الیکشن دا مسئلہ وی نئیں رے نا۔ او تے فے نواز شریف نے جت ای جانا اے۔ 2018 دے الیکشن وچ نواز شریف نے پاکستان دی وفاقی حکومت ' پنجاب تے بلوچستان دی حکومت توں علاوہ پختونخواہ دی حکومت وی بنا لینی اے۔ آصف زرداری نے جے نواز شریف نال نہ وگاڑی تے فے سندھ دی حکومت نواز شریف نے آپ ای نئیں بنانی تاکہ کراچی وچ ایم کیو ایم نوں پی پی پی دی حکومت ای سمبھالدی رووے تے نواز شریف پاکستان دی وفاقی حکومت توں علاوہ پنجاب ' بلوچستان ' کشمیر تے گلگت بلتستان دی حکومت دے نال نال پختونخواہ دی حکومت نوں وی ٹھیک ٹھاک طریقے نال چلاوے۔