اک جنے توں لے کے قوم تک دے مرحلے۔

اک جنے توں لے کے قوم تک دے مرحلے اے نے کہ؛ اک ای گھر دے جی کٹھے ھو کے گھر بناندے نے۔ اک ای خاندان دے گھر کٹھے ھو کے خاندان بناندے نے۔ اک ای برادری دے خاندان کٹھے ھو کے برادری بناندے نے۔ اک ای قوم دی آں برادریاں کٹھے ھو کے قوم بناندیاں نے۔ شہریت ' نسل تے مذھب دا معاملہ قوم توں وکھ ھوندا اے۔ جد کہ خاندان ' برادری ‘ ذات ' قبیلے دی ضرورت وکھ وکھ اے۔

میرا ناں شھباز اے۔ میری برادری میرے دادکے آں تے ناکے آں دے خانداناں تے مشتمل اے۔ میری ذات رامے اے۔ میرا قبیلا ارائیں اے۔ میری قوم پنجابی اے۔ میری شہریت پاکستانی اے۔ میری نسل سامی اے۔ میرا مذھب اسلام اے۔

مسلمان بھانویں کسے وی خاندان ' برادری ‘ ذات ' قبیلے ' قوم ' شہریت یا نسل دا ھووے۔ او امتِ محمدی ﷺ دا حصہ ھوندا اے۔ خاندان ' برادری ‘ ذات ' قبیلا ' قوم ' شہریت ' نسل ھر مسلمان دی وکھری وکھری ھوندی اے پر امت اک ای اے۔

نسلاں دے لوکی بہت سارے علاقیاں وچ کھلر گئے نے تے انہاں نسلاں دے خاندان اوس اوس علاقے وچ برادریاں ‘ ذاتاں ' قبیلے بنا کے اوس علاقے دی قوم دا حصہ بن چکے نے۔ ایس لئی اک ای نسل دے لوکاں دی آں قوماں وکھ وکھ نے۔

مختلف خانداناں ' برادریاں ‘ ذاتاں ' قبیلے آں دے لوکی جیہڑے زمین دے ایہو جئے خطے وچ رھندے نے ' جتھے اناں دی اکو جئی زبان ' اکو جئی تہذیب تے اکو جئی ثقافت ھووے۔ انہاں دی نسل یا انہاں دا مذھب بھاویں جو وی ھووے۔ اناں نوں اک قوم آکھیا جاندا اے۔

کسے زمانے وچ قوماں دے اپنے اپنے علاقے ھوندے سن پر ریاستاں دی آں سرحداں نوں تسلیم کرن دے عالمی نظام توں بعد ھن ریاست وچ اک توں زیادہ قوماں ھوندیاں نے تے ریاست وچ رین والے ساری ای ریاست دے شہری ھوندے نے۔ ایس کرکے پنجابی قوم دے لوکی پاکستانی قوم نئیں نے بلکہ پاکستان دے شہری نے۔

پاکستان دے سارے ای شہری قومیت دے خانے وچ "پاکستانی" لکھ دے نے۔ ایس دی وجہ اے وے کہ کسے زمانے وچ قوماں دے اپنے اپنے علاقے ھوندے سن پر ریاستاں دی آں سرحداں نوں تسلیم کرن دے عالمی نظام توں بعد ھن ریاست وچ اک توں زیادہ قوماں ھوندیاں نے پر بین الاقوامی طور تے قومیت دا مطلب شہریت ' مطلب کہ کیس ملک دا شہری اے ' لے آ جاندا اے۔ نہ کہ او لوک لئے جاندے نے جنہاں دی اکو جئی زبان ' اکو جئی تہذیب تے اکو جئی ثقافت ھووے۔ ایس لیے قومیت دے خانے وچ "پاکستانی" لکھن دا مطلب ھوندا اے کہ اے پاکستان دا شہری اے۔ ایس دا بندے دے خاندان ' برادری ‘ ذات ' قبیلے ' قوم نال کوئی واسطہ نئیں ھوندا۔