دوستو !!! میرے مضمون لکھن دا مقصد کی اے؟

بندے نوں اپنے لئی وی کجھ کرنا پیندا اے۔ اپنے گھر والے آں تے محلہ داراں لئی وی۔ اپنے خاندان تے اپنے علاقے لئی وی۔ اپنی برادی تے اپنے صوبے لئی وی۔ اپنی قوم تے اپنے ملک لئی وی۔ اے جسمانی طور تے وی کرنا پیندا اے۔ مالی طور تے وی کرنا پیندا اے۔ علمی طور تے وی کرنا پیندا اے پر کرنا اونا ای پیندا اے جیس حساب نال اللہ نے توفیق دتی ھووے۔ نہ اللہ دی دتی ھوئی توفیق توں گھٹ کرنا چائی دا اے تے نہ ای اللہ دی دتی ھوئی توفیق توں ودھ کرن دے چکر وچ پینا چائی دا اے۔ نالے کرنا وی اللہ واسطے ای چائی دا اے۔ ایس لئی فرض سمجھ کے کرنا چائی دا اے۔ کیونکہ اے ای زندگی اے۔ انج کرن نال ای رب راضی ھوندا اے۔ ایس لئی میں اپنے لئی ' اپنے گھر والے آں تے اپنے محلہ داراں ' اپنے خاندان تے اپنے علاقے ' اپنی برادی تے اپنے صوبے ' اپنی قوم تے اپنے ملک لئی جو ھوسکے اللہ دے فضل نال کر رے آ واں۔ پہلے پہلے اپنے ' اپنے گھر تے اپنے محلہ داراں لئی کری دا سی تے جسمانی طور تے کری دا سی۔ فے عمر ودھن نال اپنے خاندان تے اپنے علاقے لئی وی کرنا شروع کردتا تے جسمانی دے نال نال مالی طور تے وی کرنا شروع کردتا۔ فے ھور عمر ' تعلیم تے تجربہ ودھن نال اپنی برادی تے اپنے صوبے لئی وی کرنا شروع کردتا تے جسمانی تے مالی دے نال نال علمی طور تے وی کرنا شروع کردتا۔ فے ھور عمر ' تعلیم تے تجربہ ودھن نال 2012 وچ سوچیا کہ اپنی قوم تے اپنے ملک لئی وی کجھ کرنا چائی دا اے۔

2012 دے آخر توں لے کے پنجابی قوم دے سیاسی شعور نوں ودھا کے پنجابی قوم نوں اک باعزت قوم بنان تے پاکستان وچ ھون والے قوماں دے سماجی فساد نوں مکا کے پاکستان نوں سماجی طور تے مستحکم ملک بنان لئی علمی کم شروع کیتا۔ کیونکہ پاکستان وچ جد سماجی معاملات ٹھیک ھون گے تے فے ای سیاسی معاملات ٹھیک ھون گے۔ جد سیاسی معاملات ٹھیک ھون گے تے فے ای انتظامی معاملات ٹھیک ھون گے۔ جد انتظامی معاملات ٹھیک ھون گے تے فے ای معاشی معاملات ٹھیک ھوت گے۔ جد معاشی معاملات ٹھیک ھون گے تے فے ای پاکستان ترقی کرے گا۔

عرض کرن دا مطلب اے کہ؛ میں پنجابی قوم پرستی لئی جیہڑا وی کم کیتا اے۔ اے اللہ واسطے تے فرض سمجھ کے کیتا اے تے کر رے آ واں۔ ایس دا نہ میں کسے کولوں دامے ' درمے ' سخنے معاوضہ لےآ اے تے نہ لینا اے۔ ایس کم دا اجر میرا رب آپ دیووے گا۔ میں کسے نوں وی اپنے مضمون زبردستی پڑھن نوں نئیں آکھدا۔ بلکہ ھن تے ٹیگ وی کسے نوں نئیں کردا سوائے انہاں دوستاں دے جنہاں آپ آکھیا ھویا اے یا جیہڑے میرے کم وچ میرا ھتھ ونڈان ڈئے نے تے پنجابی قوم پرستی دا کم میرے پروگرام مطابق تے میرے نال رل کے کرنا چاندے نے تے اے کم کرن لئی فیس بک تے ای Punjabi Nationalist Forum بناکے پاکستان دے Zone بناکے Zonal Organizer بنائے ھوئے نے ۔ نہ میں کسے نوں آکھدا واں کہ او ھر حال وچ میری گل منن یا جو میں آکھدا واں او انج ای کرن۔ نہ میں کوئی سیاست کرنی اے کہ پنجابیاں کولوں ووٹ لینے پے جان تے نہ میں کوئی سیاسی پارٹی بنانی اے۔ ایس لئی کسے کولوں چندہ لین یا مالی مدد دی تے لوڑ ای نئیں رہ جاندی۔ بلکہ کسے پنجابی کولوں اپنی تعریف کروان دی یا اپنے آپ نوں عوام وچ مشہور کروان دی وی لوڑ نئیں رہ جاندی۔ ایس توں علاوہ گل اے وی اے کہ؛ اک بندے وچ اینی صلاحیت نئیں ھوندی کہ او 10 توں بوھتے دکھ سکھ والے آں ' 100 توں بوھتے میل ملاقات والے آں ' 1000 توں بوھتے دعا سلام والے آں تے 10000 توں بوھتے جان پہچان والے آں نال واسطہ رکھ سکے۔ جد کہ میرے وڈیاں چھوٹے ھوندے ای اک گل دماغ وچ بٹھا چھڈی سی کہ؛ " پتر لائیے تے توڑ نبھائیے ' نئیں تے نہ لائیے "۔ اللہ دے فضل نال میرے اپنے رشتے داراں تے دوستاں یاراں چوں 10 توں بوھتے ای دکھ سکھ والے تے 100 توں بوھتے ای میل ملاقات والے اللہ نے دتے ھوئے نے۔ تے او ھین وی 30 توں 40 سال پرانے۔ جد کہ دعا سلام وی 1000 توں بوھتیاں نال ای اے پر اناں نال ھن وقت ای نئیں ملدا کہ عوامی تقریبات وچ تے تفریحی مقامات تے جایا جاوے تے پہلوں وانگوں دعا سلام ھوجایا کرے۔ جد کہ جان پہچان دا حال اے وے کہ زیادہ تر لوک ایہو جئے ای نے کہ جناں نال ایس کرکے جان پہچان اے کہ او یا تے برادری دے نے ' یا علاقہ دے نے تے یا کاروبار دے کرکے جان پہچان والے نے پر اناں نوں شکلوں ای پہچانی دا اے پر ناں یاد نئیں ریندے۔

اے گلاں میں ایس توں عرض کر ریے آ واں کہ انبکس وچ میسج کر کر کے پنجابی مینوں ایہو جئیاں گلاں آکھدے نے کہ جداں میں پنجابیاں کولوں تنخواہ ' چندہ یا مالی مدد لے کے پنجابی قوم پرستی بارے مضمون لکھ رے آ واں ' ایس کرکے اناں دا نوکر واں یا میں سیاست کرنی اے تے پنجابیاں کولوں مینوں ووٹ چائی دے نے یا میں کوئی سیاسی پارٹی بنانی اے یا عوام وچ مشہور ھونا اے یا میرے کول کوئی دکھ سکھ والا یا میل ملاقات والا یا دعا سلام والا نئیں اے تے میں فیس بک تے لبھدا پھر رے آ واں تے اوھو اے ای نے جناں نوں میں لبھ رے آ واں۔

میری دوستاں نوں گزارش اے کہ؛ جیس نے میری فرینڈ لسٹ تے رینا اے تے رووے نئیں رینا تے نہ رووے۔ تانے ' میہنے ' ٹوکاں ' آکڑ مینوں پسند نئیں۔ ایس کرکے کدی کدی جے کوئی بوھتا ای گل پے جاوے تے فے کسر میں وی نئیں چھڈا تے اوس نوں ان فرینڈ وی کر دناں واں۔ مفت وچ مضمون پڑھن نوں ملدے نے ایس کرکے جیس نے مضمون پڑھنے نے پڑھے تے جیس نے نئیں پڑھنے نہ پڑھے۔ صلاح ' مشورے تے تبادلہ خیال دی حد تک ٹھیک اے پر بد تمیزی نہ کرے ' فضول بحث نہ کرے تے اپنے خیالات میرے تے مسلط کرن دی کوشش نہ کرے۔ فیس بک تے دکھ سکھ والا تے کوئی بن نئیں سکدا۔ نہ میل ملاقات والا بن سکدا اے۔ ودھ توں ودھ دعا سلام والا ای پہلے بنے گا جے کسے نے بننا ھویا تے اے اودوں ای ھوسکدا اے کہ جد ساڈا دوناں دا مزاج یا مفاد آپس وچ ملے گا۔ نئیں تے فیس بک تے اسیں صرف اپنے وچار ای اک دوجے تک اپڑا سکدے آں۔ فیس بک تے لکھاں پنجابی نے ایس کرکے سانوں چائی دا اے کہ جے کسے نال مزاج یا مفاد ملے تے آپس دی گل بات ودھایا کریے نئیں تے اک دوجے تک اپنے وچار اپڑانا ای کافی اے۔ اللہ نے جیہڑا علم مینوں دتا اے اوس نوں مضموناں دی شکل وچ عوام تائیں اپڑانا میرا فرض بن دا اے تے او فرض اللہ دے فضل نال پورا کری جا رے آ واں تے اگے رب سوھنے نے جیس نوں اے مضمون پڑھانے ھون تے اگے دا کم کرانا ھووے اوس لئی رب جانے تے او بندہ جانے۔ میں تے اوداں وی آکھیا ھویا اے کہ میرے مضمون پنجابی قوم دی امانت نے تے اپنے ناں دی مشہوری مینوں چائی دی نئیں۔ ایس لئی جیہڑا پنجابی چاوے میرے مضمون اپنے ای سمجھ کے جتھے مرضی ورتے۔ اصل مقصد پنجابیاں دا سیاسی شعور ودھانا اے تے اے کم ھونا چائی دا اے۔ ایس لئی مضموناں دے مواد تے دھیان رینا چائی دا اے نہ کہ لکھن والے دے ناں تے۔