سوال:
تسی پنجاب دی ونڈ کیوں چاہندے اوہ؟
جواب:
ویکھو جی سرائیکی اک وکھری قوم اے تے اسی اپنی وکھری قوم دی وکھری پچھان چاہندے۔
ایس لئی وکھرا جنوب دکھن آلے پاسے وکھرے صوبے دی لوڑ اے۔
سوال:
تسی کہنا چاہندے اوہ کہ دکھن پنجاب اچ سرائیکی قوم وسدی؟
جواب:
ہاں جی۔
سوال:
مطلب دکھن آلے پاسے رہن آلیاں قوماں یا نسلاں پنجابی نہیں؟
جواب:
ہاں جی۔
سوال:
اچھا پنجابی کیہنوں کہندے اوہ؟
جواب:
جیہڑے وی پربت تے وشکارلے پنجاب چہ وسدے نیں۔ جاٹ ’ راجپوت ’ آرائیں ’ اعوان ’ سید
’ بٹ ’ مغل باقی سارے۔ پنجابی سکھاں دی اولاد نیں۔
سوال:
پر ایہہ ساریاں گوتاں تے دکھن آلی سائڈ تے وی ڈھیر نیں کیہہ اوہ پنجابی نہی؟
جواب:
ہاں جی دکھن چہ وی ایہہ ساریاں گوتاں ہیگیاں نیں پر اوہ پنجابی نہی سرائیکی نیں۔
کیوں جی اوہ سرائیکی بولدیاں نیں۔
سوال: تہڈا مطلب سرائیکی قوم دی اٹ سرائیکی بولی اے؟
جواب:
کہہ سکدے اوہ۔
سوال:
تسی کون ہندے اوہ؟
جواب:
میں بلوچ/پٹھان/سید/ وغیرہ ہوندا۔
سوال:
ہنے تے تسی کیہا تسی سرائیکی اوہ؟
جواب:
بھائی میرے میری بولی سرائیکی اے۔ نسل نہی۔ بولی دا نسل تے قوم نال کیہہ تعلق؟
سوال:
تہاڈا کہن دا مطلب کہ بولی بولن نال تے قوم نہیں بدلدی.؟
جواب:
بھائی توں پاگل تے نہی؟ میرا ایہہ جو خون اے ایہہ بلوچ وی ہو سکدا۔ پٹھان وی ہو
سکدا۔ سید وہ ہو سکدا۔ بولی بولن نال میرا خون تاں نہی بدل جاناں۔ میانوالی دا
پٹھان وی سرائیکی بولدا۔ بہاولپور دے کجھ جٹ وہ سرائیکی بولدے۔ سندھ دے کجھ وڈیرے
وی سرائیکی بولدے۔ کل نوں آکھو گے اوہ سرائیکی ہو گئے؟
سوال:
تہاڈا مطلب ایہہ ہے پنجابی ٹھیک کہندے کہ سرائیکی اک بولی اے قوم یا نسل نہیں؟
جواب:
ایس گل بارے میں کجھ نہیں کہندا میں بلوچ/پٹھان/سید وغیرہ ہاں۔
سوال: اچھا جے تسی بلوچ /سید/پٹھان وغیرہ اوہ تے بولی دا خون نال کوئی تعلق نہی تے
سرائیکی کون نیں؟؟
جواب:
(اک کے) اوہ بھائیا سرائیکی دسیا تے ہے کہ جیہڑے دکھن پنجاب چہ رہندے۔
سوال:
فیر ایہناں دی اک قوم ہون تے باقی پنجاب نالوں وکھ ہون دی اٹ کیہڑی شئے ہے؟۔
جواب:
سرائیکی بولی.
سوال:
بولی دا خون تے نسل نال کیہہ تعلق؟
جواب:
توں نہی سمجھیں گا۔ ایہہ سارے اک دھرتی تے رہندے نیں ایس لئی ؛ دکھن پنجاب۔
سوال:
اچھا تسی کہندے اوہ اک دھرتی تے رہن نال اک قوم بندی؟
جواب:اک حساب تیکر۔
سوال: فیر پنج دریاواں (پنجاب) دی دھرتی تے رہن آلے پنجابی کیوں نہی ؟
جواب:
اوہ بھائی سب دیاں نسلاں وکھو وکھ نیں۔ کوئی جٹ ' کوئی آرائیں ' کوئی سید ' کوئی
راجپوت ' کوئی پٹھان ' کوئی بلوچ ' کوئی اعوان ' کوئی کجھ ' کوئی کجھ۔
سوال:
پر ایہہ ماملہ تے دکھن پنجاب چہ وی اے۔ مڑ اوہ سارے سرائیکی کیوں ؟
جواب:
کوئی ہور سوال کر ۔
سوال:
ایہہ درست ایہہ کہ سرائیکی پنجابی نوں تے پنجابی سرائیکی بولی نوں آرام نال سمجھ
لیندے۔
جواب۔
ہاں جی۔
سوال:
ایس دا مطلب سرائیکی تے پنجابی اک بولی اے؟ سرائیکی اک لہجہ اے پنجابی دا؟
جواب:
نہہ سرائیکی اک وکھری بولی اے۔
سوال:
فیر سرائیکی مقدمہ سرائیکی وچ کیوں نہی لڑدے؟ اڑدو وچ کیوں؟
جواب:
کوئی ہور سوال چا پچھ ۔ بولی توں باہر وی نکل آ۔
سوال:
اچھا بولی توں ہٹ کے دکھن پنجاب دی منگ کرن دا ہور کی کارن؟
جواب:
ایس دی اک وجہ تاں وسائل دی کانی ونڈ اے۔ دکھن پنجاب نوں فنڈ نہی لبھدے۔ سکیماں
کوئی نہی۔ سکول کالج کوئی نہی۔ سڑکاں کوئی نہی ۔
سوال: پر ایہہ گل تے ریکارڈ تے ہیگی کہ پشلیاں ساریاں واریاں چھڈو کلا پشلے پنج
ورہیاں چہ ایتھے دے اسمبلی ممبراں نوں ودھیرے فنڈ ملے۔ اوہ آپ مندے وی نیں ایہہ
گل۔ اتوں ہائی وے صوبیاں دے وشکار تجارت تے آن جان لئی وڈے روٹ وی دکھن پنجاب چہ
نیں۔ سکول کالج جیہڑے بنے نے اوہ وی خالی پئے۔ فرنیچر گرونڈاں چہ رلدا۔ جا کے راجن
پور دا کڑیاں دا کالج ای ویکھو۔ بچے لوکی لہور ' ملتان ' ڈی جی خان ٹر جاندے نیں۔
اوتھے ٹکن گے تے ترقی ہوے گی؟
جواب: ساہڈے ممبراں دی کوئی سندا نہی اسمبلی چی۔
سوال: پر یوسف رضا گیلانی تے آپ وزیر اعظم رہیا۔ شاہ محمود وزیر خارجہ رہیا۔ کئی
وار وزیر ریہا۔ فاروق لغاری صدر ریہا۔ مصطفی کھر ' فضل الرحمان ' جاوید ہاشمی تے
ہور وڈھے وڈھے لیڈر دکھن توں نیں تے ایس حکومت چہ تے وزیر اعلی وی تہاڈا۔ وزیر
اعظم وی ایس پٹی دا۔ وزیر داخلہ وی۔ خسرو بختیار وی وزیر تے اوہدا بھرا وی۔ تے ہور
وی بہت سارے وزیر تے کرتا دھرتا۔ جہانگیر ترین نوں ویکھن لئو۔ کی ایہہ سارے دکھن
نو رل کے ترقی نہی دے سکے؟
جواب: (چپ)
سوال:
چلو ایہہ دسوجے وسائل دی شکایت جیہڑی دوہانوں مسوس ہندی سدھار لئی جائے تے فیر تے
ونڈ دی لوڑ کوئی نہی؟
جواب:
نہی ونڈ فیر وہ ہونی۔ صوبہ بہت وڈا۔
سوال:
مسلہ وڈے دا ایہہ کہ اختیارات دی تھلڑے درجے تیکر اپڑ دا۔ تے لوڑاں تے وسیلہ دی
بوہے دے لاگے اپڑ دا؟
جواب:
بھئی جو وی اے صوبہ وڈا اے۔
سوال:
انج تے ملک وی وڈا اے۔ تے جے ماملا انتظام ' وسیل تے لوڑاں دا نہی رقبے دا ایہہ تے
کل نوں تسی کہو گے ایہنوں وی نکا کرو۔ جے لوڑاں ای انصاف نال ناں ملن تے رقبے
بھانویں جنے مرجی نکے کر کے شہراں دے صوبے بنا لئو۔ ماڑے نوں کی لبھناں؟
جواب:
اسی سارے سرائیکی (اک بولی) قوم ہاں تے رل مل بہنواں گے۔
سوال: (کوڑ تے حیرانی نال) ہنے تسی کیہا کہ بولی بولن نال قوم نہی بدلدی۔ تسی
بلوچ/ پٹھان/ سید اوہ۔ ایسے طراں باقی پنجابی قوماں نوں تسی سکھاں دی اولاد کہندے
اوہ ( حالانکہ فکرآلی گل کوئی نہیں اسلام برصغیر چی سکھازم توں پہلے آجاتے بابا
گرو نانک ہوری اک مسلمان جٹ نال کم کردے سی تے اسلام توں متاثر ہو کے اوہناں
سکھازم دی اٹ رکھی۔ تے جے من وی لیا جاوے کہ پنجابی سکھاں دی اولاد ہن تے یاد رکھو
اسلام توں پہلاں سبھے کافر تے کجھ ہور ہائے) فیر سرائیکی ہے کون؟؟؟؟؟؟
جواب: تسی سارے پنجابی انتہا پسند تے تنگ ذہن اوہ۔ سرائیکی وزیر اعلی برداشت نہی
ہندا پیا دہاتھوں۔
سوال: پر اوہ تے بلوچ اے؟
(حیرانی نال بیہوش)
نوٹ:
رولے تے کوڑ توں پہلاں ونڈ دے سر کڈھویں لیڈر محسن لغاری دا انٹرویو ویکھ لینا۔
لنک سہولت لئ پہلے کمنٹ وچ۔ تے ایس توں بعد منو کہ سرائیکی اصل چہ ڈیروی/ملتانی
پنجابی لہجہ اے تے اوتھے وسن آلے لوکی پنجاب نیں۔ اوہناں دی سادگی توں فیدا چک کے
کجھ لیڈر اپنا کٹا کھول رہے نیں۔ ایہناں ہی لیڈران دیاں دلیلاں وں اتے پالش کیتا
گیا اے ۔
No comments:
Post a Comment