پنجاب دی تباھی تے پنجابی قوم دی بربادی پہلے 1947 وچ پنجابیاں
دے آپس وچ دھرم دے کرکے لڑن نال ھوئی تے ھن آپس وچ برادری دی بنیاد تے لڑن دے کرکے
ھو رئی اے۔ پنجاب دی آں پنج وڈیاں برادریاں جٹ ' ارائیں ' راجپوت ' گجر ' اعوان ھن
اک دوجے دی آں لتاں نہ کھچن۔ آپس وچ اک دوجے دا ھتھ ونڈان۔ پنجابی قوم دے اک دوجے
دی آں لتاں کھچن دے کرکے ای پنجاب تباہ تے پنجابی قوم برباد ھوئی اے۔ 1947 وچ
پنجاب دی تباھی تے پنجابی قوم دی بربادی کی مسلمان پنجابی ' ھندو پنجابی ' سکھ
پنجابی ' عیسائی پنجابی دی تباھی تے بربادی نئیں سی؟ ھن پنجاب دی تباھی
تے پنجابی قوم دی بربادی کی جٹ ' ارائیں ' راجپوت ' گجر ' اعوان دی تباھی تے
بربادی نئیں اے؟
پنجاب دی آں 5 وڈی آں برادریاں جٹ ' ارائیں ' راجپوت ' گجر '
اعوان دی مت مری ہوئی اے۔ جے اے برادریاں دے چکر وچ پے کے اک دوجے دی آں لتاں کھچن
دے بجائے آپس وچ سانجھ کرکے پنجابی قوم بن کے اک دوجے دا ہتھ ونڈان تے فے پنجاب وی
خوشحال ہو جاوے تے پنجابی قوم دی وی عزت ہون لگ پووے تے پنجاب وچ رین والی آں دوجی
آں چھوٹیاں پنجابی برادریاں وی برادریاں دے کھیڑے چوں نکل جان تے پنجابی قوم تے
باروں آکے راج کرن والے آں نوں وی پنجاب تے راج تے پنجابی قوم نوں ذلیل کرن دی ہمت
نہ ہووے۔ فے پنجابی قوم تے پنجاب وچ رین
والے دوجے لوک وی امن ' انصاف ' پیار تے محبت نال رین گے تے پنجاب دی خوشحالی تے
پنجابی قوم دی عزت تے دھیان دین گے۔
پنجابی قوم دی جٹ ' ارائیں '
راجپوت ' گجر ' اعوان وغیرہ ' مختلف برادریاں نوں چائی دا اے کہ؛ ذات تے برادری تک
محدود رہ کے آپس وچ محاذ آرائی کرن دے بجائے ' پنجابی قوم پرست بن کے اپنا دھیان
پنجاب دی زمین ' زبان ' تہذیب ' ثقافت تے دے کے ' پنجابی قوم نوں سیاسی تے سماجی
طور تے مضبوط قوم تے پنجاب نوں معاشی تے اقتصادی طور تے مستحکم دیش بنان تے پنجاب وچ
رین والے دوجے لوکاں نوں وی چائی دا اے کہ؛ پنجاب دی دھرتی ' پنجابی زبان ' پنجابی تہذیب تے پنجابی ثقافت
وچ اپنے آپ نوں ضم کرکے بابا فرید ' بلھے شاہ ' وارث شاہ دے نقش قدم دی پیروی کردے
ھوئے پنجابی زبان ' تہذیب ' ثقافت دے فروغ ' پنجابیاں دے سماجی احترام ' پنجابی
قوم دے سیاسی استحکام تے پنجاب دی خوشحالی وچ اپنا کردار ادا کرن۔
No comments:
Post a Comment