پنجاب دی ونڈ نے دریا تے دھرم دے تھاں وی ونڈ دتے۔

پنجابی اک قوم اے۔

پنجاب پنجابیاں دا دیش اے۔

پنجابی پنجابیاں دی زباں اے۔

پنجابی رسم رواج پنجابیاں دی شان اے۔

دھرم ھر کسے دا اپنا تے اوس دے رب دا معاملہ ا اے۔

پنجابیاں نے ناشکری کیتی۔

دیش پنجاب دی زمین وچ فساد کیتا۔

دیش تے دھرم وچ فرق نہ رکھ سکے۔

دھرم تے پتہ نئیں عمل کردے وی نے کہ نئیں۔

پر دیش ونڈوا بیٹھے ' وچھوڑے پا بیٹھے۔

پنجاب دی پنج دریاواں دی دھرتی مسلمان پنجابیاں ' ھندو پنجابیاں ' سکھ پنجابیاں تے کرسچن پنجابیاں دی دھرتی سی۔

مسلمان پنجابی ' ھندو پنجابی ' سکھ پنجابی تے کرسچن پنجابی صدیاں توں گوانڈی بن کے رل مل کے پنجاب دی پنج دریاواں دی دھرتی تے ریندے سن۔

1947 وچ پنجاب دی ونڈ دے کر کے مسلمان پنجابی تے کرسچن پنجابی نوں ویسٹ پنجاب مل گیا۔ جد کے ھندو پنجابی تے سکھ پنجابی نوں ایسٹ پنجاب مل گیا۔

سکھ پنجابی دے ویسٹ پنجاب چوں ایسٹ پنجاب جان دے کر کے سکھ پنجابی دے دھرم دے تھاں ویسٹ پنجاب وچ ای رے گئے۔

پنجاب دی دھرتی پنج دریاواں دی دھرتی اے پر 1947 وچ پنجاب دی ونڈ دے کر کے ادھے دریا ایسٹ پنجاب وچ چلے گئے تے ویسٹ پنجاب وچ ادھے دریا ای رہ گئے۔ کیونکہ دریا اوس دا ای ھوندا اے جیس دی زمین تے وگدا اے۔

پنجاب نوں ونڈن ویلے سوچ لینا چائی دا سی کہ پنجاب دی دھرتی دی ونڈ نے پنجاب دے دریاواں تے دھرم دے تھانواں نوں وی ونڈ دینا اے۔

ویسٹ پنجاب دے مسلمان پنجابیاں نوں زمین آباد کرن لئی پانی دی لوڑ اے۔ جیہڑا ایسٹ پنجاب کول اے۔

ایسٹ پنجاب دے سکھ پنجابیاں نوں سکھ دھرم دے تھاواں دی لوڑ اے۔ جیہڑے ویسٹ پنجاب وچ نے۔

کی پنجاب دے دریا تے دھرم دے تھاں ' پنجابیاں نوں تے پنجاب نوں ' اک واری فے جوڑ دین گے؟