سوشل میڈیا دے دور چ جلسیاں تے جلوساں دی اھمیت ختم ھوندی جا رئی اے۔ ھن ڈیموکریسی دے بجائے سائیبوکریسی دا دور شروع ھو ریہیا اے۔
ڈیموکریسی دے دور چ لوکاں دا اجتماع کرکے لوکاں نوں اپنے سیاسی عزائم دی حمایت کرن لئی آمادہ کیتا جاندا سی۔
سائیبوکریسی دے دور چ سوشل میڈیا تے لوکاں دی ذھنی تربیت کرکے لوکاں نوں اپنے سیاسی عزائم دی حمایت کرن دے لئی تیار کیتا جایا کرے گا۔
مستقبل چ سیاسی تحریکاں سڑکاں تے نئیں بلکہ سائیبر تے چلیا کرن گی آں۔ پر؛
1۔ سڑکاں تے تحریک چلان دے لئی "مالی سرمایہ" دی لوڑ ھویا کردی سی۔
2۔ سائیبر تحریک چلان دے لئی "ذھنی صلاحیت" دی لوڑ ھویا کرے گی۔
ڈیموکریسی چ جلسے کروان والیاں دی "نیٹ ورکنگ" ھویا کردی سی۔ جیہڑے "مالی سرمایہ" دی بنیاد تے جلسے کرکے عوام دی آں منڈیاں لا کے عوام دا سودا کریا کردے سن۔
سائیبوکریسی چ سوشل میڈیا استعمال کرن والے "نیٹ ورکنگ" کریا کرن گے۔ جیہڑے "ذھنی سرمایہ" دی بنیاد تے سوشل میڈیا دے ذریعے عوام دی ذھن سازی کرکے عوام دی رھنمائی کریا کرن گے۔
ڈیموکریسی ھووے یا سائیبوکریسی ھووے۔ کھلاڑی "نیٹ ورکنگ" کرنے والے ای ریہن گے۔
البتہ "سرمایہ" دے ذریعے فیس ٹو فیس "نیٹ ورکنگ" کرنے والیاں دے بجائے "ذھنی صلاحیت" دی بنیاد تے سوشل میڈیا تے "نیٹ ورکنگ" کرن وچ فائدہ ھویا کرے گا۔
ڈیموکریسی چ "نیٹ ورکنگ" کرنے لئی پہلے گرائونڈ تے "فیس ٹو فیس" ملاقاتاں کیتیاں جاندیاں سن۔ اوس توں بعد "ذھنی ھم آھنگی" پیدا کرن دی کوشش کیتی جاندی سی۔
جے گرائونڈ تے "فیس ٹو فیس" ملاقاتاں کرکے وی "ذھنی ھم آھنگی" پیدا نئیں ھوندی سی تے فے "نیٹ ورکنگ" وی نئیں ھوندی سی۔
سائیبوکریسی چ "نیٹ ورکنگ" کرنے لئی پہلے سوشل میڈیا تے "ذھنی ھم آھنگی" پیدا کیتی جاووے گی۔ اوس توں بعد گرائونڈ تے "فیس ٹو فیس" ملاقاتاں ھویا کرن گی آں۔
جے سوشل میڈیا تے "ذھنی ھم آھنگی" پیدا نہ ھوئی تے فے گرائونڈ تے "فیس ٹو فیس" ملاقاتاں وی نئیں ھویا کرن گی آں۔
No comments:
Post a Comment