جیہڑے پنجابی ' پنجابیاں دے کٹھے ھون دا رولا پاندے نے۔ پنجابیاں چ اتحاد دے ھون دا رونا روندے نے۔ پنجابیاں نوں گڑاؤنڈ تے کم کرن دا آکھدے ریندے نے۔ اے پنجابی ' پنجابیاں دی تباھی تے بربادی کر رئے نے تے "پنجابی قوم پرستی" دا کم کرن والیاں تنظیماں دا وقت خراب کردے نے۔
ایس دی وجہ اے وے کہ؛ عملی طور تے نہ انہاں چ "پنجابیاں لئی نیٹ ورک" بنان دی صلاحیت اے تے نہ کسے "پنجابی نیٹ ورک" چ شامل ھون دی عادت اے۔ اے "تنظیم" دے بجائے "ھجوم" والا ماحول پسند کردے نے۔
اے آپ وی کلے ریندے نے تے دوجیاں نوں وی کلے رکھنا چاھندے نے۔ ایس دی وجہ اے وے کہ؛ انہاں نوں "نہ لانی آندی اے تے نہ نبھانی آندی اے"۔ جد کہ انہاں نوں اے وی نئیں پتہ کہ "کلا بندہ ککھ برابر ھوندا اے"۔
اے اصل چ بغیر علمی صلاحیت دے اپنے آپ نوں "دانشور" تے بغیر مالی وسائل دے اپنے آپ نوں "اثر و رسوخ والا" سمجھن والے لوکی ھوندے نے۔ انہاں چ زیادہ توں زیادہ مقامی سطح دا علمی شعور تے مالی وسائل ھوندے نے۔ انج دے لوکاں دی قوم چ نہ عزت ھوندی اے تے نہ اھمیت ھوندی اے۔
قوم نوں بربادی چوں کڈھن لئی "منجی تھلے ڈانگ" پھیرنا وی ضروری اے تے انج دے لوکاں نوں "لگام" پائے بغیر قوم نوں سماجی عزت ' انتظامی بالادستی ' معاشی خوشحالی ' اقتصادی ترقی نئیں دوائی جاسکدی۔
ایس لئی پی این ایف دی "لیڈرشپ" انہاں نوں انہاں دے حال تے چھڈ کے "پی این ایف" دی "تنظیم سازی" تے دھیان رکھے۔
جیس طراں دُدھ چ "مکھن" گھٹ تے "لسی" بوھتی ھوندی اے۔ انج ای قوماں چ وی کم والے بندے (مکھن) گھٹ تے رولا پان یا صلاحواں دین والے (لسی) بوھتی ھوندی اے۔
جیوں دُدھ چوں "مکھن" کڈھن لئی؛
1۔ دُدھ نوں پہلے "کاڑھنا" پیندا اے
2۔ فے "جاگ" لانا پیندا اے۔
3۔ فے "رڑکنا" پیندا اے۔
4۔ فے جاکے کدھرے "مکھن" نکلدا اے۔
قوم چوں کم دے بندے کڈھن لئی وی انج ای کرنا پیندا اے۔
پنجابی نیشنلسٹ فورم (پی این ایف) دی لیڈرشپ "پنجابی قوم دا مکھن" اے۔
No comments:
Post a Comment