قوم دی حالت لوکاں دی آں عادتاں دے مطابق ھوندی اے

إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ (13:11)

الله کسے قوم دی حالت نئیں بدلدا جد تک او  اناں عادتاں نوں نہ بدلے جیہڑیاں اوس وچ ھین۔ (11-13)

زوال پذیر قوماں وچ زیادہ تر بندیاں دی خواھش ھوندی اے کہ اناں کول پیسہ ھووے تے پاور ھووے تاکہ لوکی اناں دے اگے پچھے پھرن تے اناں اگے جی جی کرن۔ کیونکہ زیادہ تر لوکاں دی عادت ھوندی اے کہ او پیسے والے تے پاور والے بندیاں نوں اھمیت دیندے نے۔ او پیسے والے بندیاں دے اگے پچھے پھردے نے تے پاور والے آں دے اگے جی جی کردے نے۔

لوکاں دے پیسے والے بندیاں دے اگے پچھے پھرن دے کرکے فے سیاست وی پیسے والے بندے ای کردے نے۔ ایس لئی حکومت وچ وی فے زیادہ تر پیسے والے بندے آجاندے نے۔ جد اناں پیسے والے بندیاں نوں حکومت دی پاور وی مل جاندی اے تے فے لوکی اناں دے اگے پچھے پھرن دے نال نال اناں اگے جی جی وی کرن لگ پیندے نے۔

زوال پذیر قوماں وچ علم والے بندے وی ھوندے نے۔ جے لوکی پیسے دے بجائے علم والے بندیاں ول دھیان کرن لگ پین تے فے لوکی علم والے بندیاں دی عزت کرن لگ پیندے نے۔ جیس دے کرکے لوکاں وچ پیسے والے بندیاں دی اھمیت گھٹ جاندی اے۔ ایس لئی لوکی پیسے والے بندیاں دے اگے پچھے پھرن دے بجائے علم والے بندیاں دے اگے پچھے پھرن لگ پیندے نے۔ ایس دے کرکے پیسے والے بندے سیاست کرکے حکومت دی پاور وی حاصل نئیں کر پاندے۔ جیس دے کرکے فے لوکی نہ صرف پیسے والے بندیاں دے اگے پچھے نئیں پھردے بلکہ اناں اگے جی جی وی نئیں کردے۔

لوکاں دے علم والے بندیاں ول دھیان دین دے کرکے۔ علم والے بندیاں نوں عزت دین دے کرکے۔ علم والے بندیاں دے اگے پچھے پھرن دے کرکے علم والے بندے سیاست وی کرن لگ پیندے نے۔ جیس دے کرکے حکومت وچ وی علم والے بندے آجاندے نے۔ جد اناں علم والے بندیاں نوں حکومت دی پاور وی مل جاندی اے تے فے عام لوکی وی پاور والے بندیاں دے اگے جی جی کرن دے عادی ھون دے کرکے اناں علم والے بندیاں دے اگے جی جی کرن لگ پیندے نے۔ جد کہ الله قوم دی حالت بدلن لئی قوم نوں زوال چوں کڈھن لگ پیندا اے تے عروج دین لگ پیندا اے۔ ایس لئی علم والے بندیاں دے حکومت کرن دے کرکے ملک ترقی کرن لگ پیندا اے تے قوم خوشحال ھون لگ پیندی اے۔

قَالَ لَهُمْ نَبِيُّهُمْ إِنَّ اللّهَ قَدْ بَعَثَ لَكُمْ طَالُوتَ مَلِكًا قَالُوَاْ أَنَّى يَكُونُ لَهُ الْمُلْكُ عَلَيْنَا وَنَحْنُ أَحَقُّ بِالْمُلْكِ مِنْهُ وَلَمْ يُؤْتَ سَعَةً مِّنَ الْمَالِ قَالَ إِنَّ اللّهَ اصْطَفَاهُ عَلَيْكُمْ وَزَادَهُ بَسْطَةً فِي الْعِلْمِ وَالْجِسْمِ وَاللّهُ يُؤْتِي مُلْكَهُ مَن يَشَاء وَاللّهُ وَاسِعٌ عَلِيمٌ (2:247)

اناں نوں اناں دے نبی نے آکھیا کہ؛ الله نے تواڈے تے طالوت نوں بادشاہ بنایا اے۔ انہاں نے آکھیا کہ؛ اے ساڈے تے بادشاھی کیویں کر سکدا اے؟ جد کہ اسیں ایس توں بوھتے بادشاھی دے حقدار آں۔ کیونکہ ایس نوں مال تے دتا نئیں گیا۔ نبی نے آکھیا کہ الله نے ایس نوں تواڈے لئی ایس لئی کھڑا کیتا اے کہ ایس نوں بوھتا علم دتا اے تے صحت مند جسم دتا اے۔ الله اپنا ملک جیس نوں چاھوے دیندا اے۔ اللہ نوں بوھت زیادہ گلاں دی جانکاری اے۔(247-2)