پارٹ 2 میاں محمد بخش دی سفرالعشق جیہڑی سیف الملوک دے ناں نال مشہور اے۔

حضور سرورکائنات صلى الله عليه وسلم دی نعت

1

واہ کریم صلى الله عليه وسلم اُمّت دا والی، مِہر شفاعت کردا

جِبرائیل جہیے جِس چاکر، نبیاں دا سر کردہ

2

اوہ محبُوب حبّیب ربّانا صلى الله عليه وسلم، حامی روز حشر دا

آپ یتیم یتیماں تائیں ،ہتھ سِرے پر دھردا

3

جے لکھ واریں عطر گُلابوں، دھویئے ِنت زُباناں

نام اُنہاں دے لائق ناہیں، کے قلمے دا کانا

4

نعت اُنہاں دِی لائق پاکی ،کد اساں ناداناں

میں پلیت ندِی وِچ وڑیا ،پاک کرے تن جاناں

5

نال اِشارت ٹُکڑے کیتا، جِس نے چن اسمانی

سُک روڑاں تھیں جِس پڑھایا، کلمہ ذِکر زُبانی

6

مُعجزیوں اُس بُہت ودھائی ،تھوڑی سی مہمانی

لشکر تساّ سبھ رجایا، ہِکسے کاسے پانی

7

صدر نشین دِیوان حشر دا، افسر وِچ اِماماں

کُل نبی مُحتاج اِنہاندے ،نفراں وانگ غلاماں

8

دُنیا تے جد ظاہر ہویا، گھُر یا دین دمامہ

کوہ قافاں نے سیس نِمایا، کوٹ کُفّار تماماں

9

تخت چبارے شاہی کنبے ،ڈھٹّھے کُفر منارے

چھیک دِتّے قُرآن اوہدے نے، اگلے دفتر سارے

10

سبھو نُور اوسے دے نُوروں ،اُس دا نُور حضُوروں

اُس نُوں تخت عرش دا مِلیا ،مُوسیٰ نُوں کوہ طُوروں

11

لَو لَا کَ لَمَا خَلَقتُ الکَونَ ،آیا شان اِنہاں دے

جِنّ اِنسان غُلام فرِشتے، دوئے جہان اِنہاں دے

12

نُور ِمحُمدّ صلى الله عليه وسلم روشن آہا ،آدم جدوں نہ ہویا

اوّل آخر دوئے پاسے، اوہو مل کھلویا

13

پاک جمال اوہدے نوں سِکدے ،روح نبیّاں سندے

حُوراں ملک اُنہاندی خاطر ،خدمت کارن بندے

14

ولی جِنہاں دِی اُمّت سندے، نبیاں نال برابر

اُمّت اُس دِی بنیا لوڑن ،مُرسل ہور اکابر

15

حُسن بازار اوہدے سے یُوسؑف ،بردے ہووکاندے

ذُوالقرؑنین سلُیمؑاں جیسے ،خدمت گار کہاندے

16

عیسؑیٰ خاک اِیہناں دے در دی، گھِن تیمم کردا

تاہئیں دست مُبارک اُس دا ،شافی ہر ضرر دا

17

خال غُلامی اِس دِی والا ،لایا پاک خلیلؑے

جانی نُوں قُربانی کیتا ،مہتر اسما عیؑلے

18

مُوسؑیٰ خضؑر نقیب اِنہاندے، اگّے بھجن راہی

اوہ سلطان مُحمّد صلى الله عليه وسلم والی ،مُرسل ہور سپاہی

19

دہ سے سدّ جنہاں نُوں ہویا، نیڑے آء پیارا

نعت اِنہاں دِی کے کُجھ لِکھّے، شاعر اؤ گنہار

معراج شریف دا ذکر

1

آئی رات مُبارک والی، بھاگ اساڈے جاگے

سجناں تے خُوش مُشکاں ڈُہلیاں، دُشمن سرسُہاگے

2

اسماناں پر تارے رؤشن، شمع چراغ یگانے

سِکدیاں یاراں نُوں آ پُہتے ،سِکّاں دے پروانے

3

وحی وکیل لیایا سدّا ،نالے گھوڑا جوڑا

آملِیے ہِک جوڑ مُحمّدﷺ، تینُوں قُرب نہ تھوڑا

4

ہر دم سِک تُساڈی سانُوں ،آئی رات مِلن دی

سد گھلیوں وڈیائی دے کے ،عزّت ودھّی سجن دِی

5

لوح قلم اسماناں زمیاں ،دوزخ جنت تائیں

کُرسی عرش مُعلیٰ ویکھیں ،سیر کریں سبھ جائیں

6

عزّت قُرب تُساڈا ویکھن ،حُوراں ملک پیارے

نالے رُوح نبیاں سندے ،ہون سلامی سارے

7

دوزخ جنّت وِچ اسماناں ،جو خلقُ اللہ وسدی

پاک جمال تُساڈے کارن، ہر دی جان ترسدی

8

ویکھ جمال حبیب صلى الله عليه وسلم میرے دا ،صدقے صدقے جاون

شرف سعادت پاون سارے ،شُکر بجا لیاون

9

ہویا سوار بُراقے اُتّے ،اوہ سلُطان عرب دا صلى الله عليه وسلم

چائی واگ مُحبّت والی ،ٹُریا راہ طلب دا

10

لے لے نذراں ملدے اگّوں، رُوح تمام نبیاں

خِدمت اندر حاضر ہوئے ،بدھّے لک ولیاّں

11

سے سنگار کیتے سبھ حُوراں ،منگل گاون کھلیاں

اج جنجاں دا لاڑا آیا ،مل مل رکھو گلیاں

12

اَسریٰ دا سرگشت سرے تے، افسر سی لولا کی

طٰہٰ تے یٰسین پھُلّاں دا ،سہرا شرم تے پاکی

13

سوہنی جھنڈ مُعنبر سر تے، چمکے نُور دُخانوں

سُرمہ سی مازَاغَ اکھّیں وِچ ،گل تعویذ قُرآنوں

14

نعت درُود صلوٰۃ سلاموں ،چھٹیاں جھُولن قطاراں

صلی اللہ علیہ وسلم ،کرن نقیب پکُاراں

15

چھوڑ اسماناں زِمیاں تائیں، سرور صلى الله عليه وسلم گیا اگیرے

جتھّے وحی نہیں ونج سکدا ،ہٹ بیٹھا کر ڈیرے

16

سرور نے فرمایا اُس نُوں ،جے تُوں ساتھی میرا

چل اگیرے نال اساڈے، کیوں بیٹھوں کر ڈیرا

17

کیتی عرض فرشتے حضرت ،کؤن اسیں بے چارے

جے ہِک گِٹھ اگیرے ہوواں، سڑ جاندے پر سارے

18

نئیں مجال اساڈی اگّے، چمکن نُور تجلّے

ایسا قُرب تُسانُوں لائق، جاؤ ہِک ہکلّے

19

جتّھے قدم تُساڈا اوتھے ،ہور نئیں کوئی پُجدا

اہل کمال جلال محُمدّ صلى الله عليه وسلم ،تُوں ہی تُو ہیں سُجھدا

20

سبھ کسے تھیں گئے اگیرے ،چاء چاء پردے نُوری

قَابَ قؤسین اَو ادنیٰ تائیں، پایا شان حضُوری

21

جانی نال ملے دِل جانی ،وِتھ نہ رِہیاّ ذرّہ

خلعت تُحفے ہدیے لے کے، آئے پھیر مقّررہ

22

ایسا نبی جنہاں دا والی ،سو اُمّت کیوں جھُرسی

عیب گُناہ خطایاں بابت، کیوں دوزخ ول ٹُرسی

23

کے کُجھ نعت تُساڈی آکھاں، خلقت دے سردارا

لاکھ صلوٰۃ سلام تیرے تے، لاکھ درُود ہزارا

24

تُدھ پر ہون درُود اللہ دے ،آل اؤلاد تیری تے

پیرواں اصحاباں اُتّے، بھی بنُیاد تیری تے

25

پیر مُرید صدیق اکبر سن، پہلے یار پیارے

حق جنہاں دے ثَانِیَ اثنَینِ، اِذ ھُمَا فِی الغَارِ

26

یار دُوجا فارُوق عمُر سی ،عدل کیتا جس چھڑکے

ایہہ شیطان رجیم رُلایا، پنجے اندر پھڑکے

27

شب بیدار غنی سی ترِیجا، جامع جو قرآنی

عثُمان ذُوالنورین پیارا ،مہتر یُوسف ثانی

28

چوتھا یار پیارا بھائی ،خاصہ دِل دا جانی

دُلدُل دا اسوار علی ہے ،حیدر شیر حقانی

29

لَحمُکَ لَحمِی دَمُّکَ دَمّیِ، شان جِنہاندے آیا

سخی بہادر جگ وِچ نادر ،جِس دا عالی پایہ

30

ذُوالفِقار جنہاں نُوں اُتری ،خلعت فقر حضُوروں

جُمل جہان ہوئی رُشنائی شاہ ،مرداں دے نُوروں

31

جمدّڑیاں سن جس دے اگے، بُتّاں سیس نوائے

خیبر کوٹ کفار گِڑائیوس ،ڈنکے دین وجائے

32

ستّر دو بہتر واریں ،راہ اللہ دے وِکیا

دوئے امام دِتے راہ مولیٰ، پھیر صبر کر ٹِکیا

33

رباّ اِنہاں اِماماں پِچھّے، جو گُل لال نبی دے

پاک شہید پیارے تیرے ،افسر آل نبی دے

34

ہِکناں عِشق تیرے دے پیتے، بھر بھر زہر پیالے

خنجر جھاگ مُحبّت والی، ہِکناں بدن حلالے

35

ہوندی قُوّت زور نہ لایا، بیٹھے من رضائیں

پانی باجھ پیاسے چلّے ،دِین دُنی دے سائیں

36

عِشق تیرے وِچ گھائل ہوئے، مائل حُسن ازل دے

سر ِدِتّے پر سِی نہ کِیتی، شادی کر کر چلدے

37

پِیر سَنے وِچ نِیر عِشق دے، بیڑا میرا تاریں

میں عاجز مسکِین بندے نُوں، نال اِیمانے ماریں

38

توڑے رد سوال کریسیں ,توڑے عرض قبُولے

میں بھی دوہیں جہانی پھڑیا, دامن آل رسُولے

39

یا نبی اللہ جے کُجھ دِتّا ، قدر تینُوں ربّ والی

ذرِّے جِتنا گھٹدا ناہیں، ہتّھوں ہوندا عالی

40

اؤگنہار طُفیل تُساڈے ،اسیں بہشتیں جائیے

رحمت اتے لقاء مہر دا، پاک جنابوں پائیے

41

ہور کسے کُجھ نیکی ہوسی، توشہ خرچ قبر دا

مینُوں ہکّو نام تُساڈا ،گہنا روز حشر دا

42

تینُوں قوّت بخشی مؤلیٰ ،سبھ خلقت بخشاویں

ہوندے زور سوال نہ موڑیں، نبی کریم کہاویں

43

دوست دُشمن چنگا مندا جے ،کوئی ہوئے سوالی

کد کریماں دے در اُتّوں ،مُڑ آوے ہتھ خالی

44

رکھّی جھول تُساڈے اگّے، پاؤ خیر یتیماں

اؤ گنہار کُوچجیں بھریا ،بخشیں نبی کریما

45

کیتی بے فرمانی تیری ،بُھلاّ پھریوس راہوں

نام اللہ دے بخش بے ادبی، نہ کر پکڑ گُناہوں

46

سُخن نہیں کوئی ہوندا میں تھیں، تیری شان قدر دا

طٰہٰ تے یٰسین الٰہی ،صفت تُساڈی کردا

47

بُہت عزّت لؤلاکی تینُوں، کے میں صِفت سنُاواں

آل اصحاب سمیت سلاماں، ہور درُود پچُاواں

48

آل اؤلاد تیری دا منگتا، میں کنگال زیانی

پاؤ خیر مُحمّد تائیں ،صدقہ شاہ جیلانی