پاکستان وچ زیادہ تر
پٹھان خیبر پختونخوا ' بلوچ بلوچستان ' سندھی دیہی سندھ تے ھندوستانی مھاجر کراچی
وچ ریندے نے۔ ایس لئی پنجاب وچ رین والے پٹھان ' بلوچ ' سندھی تے ھندوستانی مھاجر
نوں پنجابی نئیں منیا جاندا۔ کیونکہ پنجاب وچ رین والے پٹھان ' بلوچ ' سندھی تے
ھندوستانی مھاجر دا مسئلہ اے وے کہ؛ او پنجاب وچ رے کہ وی پنجابی نئیں بن دے تے
ناں ای اناں نوں پنجاب نال یا پنجابیاں نال ھمدردی ھوندی اے۔ پنجاب وچ رے کے وی
اناں نوں اپنے اصل وطن دے پنجاب دے گوانڈ وچ ھون دے کرکے اپنے صوبے نال تے اپنی
قوم دے لوکاں نال ای دلچسپی ھوندی اے۔
ایہو جیہا حال اناں
پنجابیاں دا وی اے جیہڑے پنجاب دے گوانڈ والے علاقیاں خیبر پختونخوا ' بلوچستان '
دیہی سندھ تے کراچی وچ ریندے نے۔ جد کہ پنجاب وچ دوجیاں قوماں نوں اپنے اصل وطن تے
قوم توں دور ھون دے کرکے پنجاب وچ رے کے پنجابی بننا پیندا اے۔ اوہ پنجاب
دی زمین نوں اپنی دھرتی سمجھدے نے تے پنجابی قوم دے دکھ سکھ نوں اپنا دکھ سکھ سمجھدے
نے۔ ایس لئی اوہ پنجابی زبان ' تہذیب ' ثقافت اختیار کرکے پنجابی قوم وچ رچ بس جاندے
نے۔ پنجابی بن جان دے کرکے انہاں نوں پنجاب دے نال تے پنجابیاں دے نال محبت تے ھمدردی
ھوجاندی اے۔ ایس لئی ساری دنیا وچ اوہ جتھے وی جان انہاں نوں پنجابی ای سمجھیا جاندا
اے تے منیا وی جاندا اے۔
ایس توں علاوہ جے پنجاب
وچ رین والے پٹھان ' بلوچ ' سندھی تے ھندوستانی مھاجر نوں پنجابی منیا جاوے تے فے؛
کی خیبر پختونخوا وچ رین والے پنجابی نوں پٹھان ' بلوچستان وچ رین والے پنجابی نوں
بلوچ ' دیہی سندھ وچ رین والے پنجابی نوں سندھی تے کراچی وچ رین والے پنجابی نوں
مھاجر منیا جاوے؟ گل اے وے کہ؛ قوم دا فرد ھونا تے کسی صوبے دا رھائشی ھونا
دو وکھ وکھ گلاں نے۔ پاکستان
دے سارے صوبیاں وچ ای ھن قوماں رل مل کے رہ رئیاں نے۔ ایس کرکے پاکستان دا کوئی وی
صوبہ ھن کسے اک قوم دا صوبہ نئیں اے۔ پنجاب ھن پنجاب وچ رین والے پٹھان ' بلوچ '
سندھی تے ھندوستانی مھاجر دا وی صوبہ اے تے خیبر پختونخوا ' بلوچستان ' سندھ تے
کراچی ھن پنجابیاں دے وی صوبے نے۔
No comments:
Post a Comment