Tuesday 10 April 2018

سیاسی علم تے سیاسی تجربے توں بغیر قوم دا آگو نہ بنو نہ بناؤ

جیہڑا بندہ سیاسی علم تے سیاسی تجربے توں بغیر قوم دا آگو بن جاوے او بندہ قوم دی بربادی لئی کافی اے۔ پنجاب دی ونڈ ویلے سیاسی سوچ دے بجائے مذھبی جذبات دی بنیاد تے ماسٹر تارا سنگھ سکھ پنجابیاں دے آگو بنے ھوئے سن۔ ماسٹر تارا سنگھ نے سیاسی شعور نہ ھون دے کرکے سکھ پنجابیاں نال او حال کیتا کہ سکھ پنجابی ھجے تک رل رئے نے۔

کجھ اے ای حال ایس ویلے سیاسی علم تے سیاسی تجربے توں بغیر زبان پرستی دی بنیاد تے لوکاں دی توجہ حاصل کرن والے زبان پرست پنجابی لکھاری ' پنجابی شاعر ' پنجابی زبان تے ثقافت لئی کم کرن والے زبان پرست کرن دے چکر وچ نے۔ اناں دا حال اے وے کہ اناں نوں اپنی برادری تے اپنے صوبے دے ای نئیں پر اپنے خاندان تے اپنے علاقے دے سیاسی ' سماجی ' معاشی تے انتظامی معاملات وی سمجھ نئیں آندے ھونے پر پنجابی زبان تے ثقافت لئی کم کرن دے کرکے اپنے آپ نوں پنجابی قوم پرست آکھ کے گلاں اے پنجانی قوم دے سیاسی ' سماجی ' معاشی تے انتظامی معاملات دی آں کردے نے۔

پنجابی زبان تے پنجابی ثقافت لئی کم کرن والے کجھ پنجابی لکھاری ' پنجابی شاعر تے پنجابی زبان پرست ' پنجابی زبان تے پنجابی ثقافت دا کم کرن دے نال نال نواز شریف تے ن لیگ دی مخالف کرن دا کم وی ودھ ودھ کے کردے نے۔ بندہ اناں لکھاریاں ' شاعراں تے پنجابی قوم پرستاں (حالانکہ اے پنجابی قوم پرست نئیں زبان پرست نے) کولوں پچھے کہ نواز شریف نے اناں دی مجھ چوری کیتی اے؟ یا فے اے دسن کہ فلانے سیاسی لیڈر نے پنجاب تے پنجابیاں لئی نواز شریف توں بوھتا چنگا سیاسی ' سماجی ' معاشی تے انتظامی کم کیتا سی؟

پاکستان دے بنن توں بعد نواز شریف پاکستان وچ پہلا بندہ اے جیہڑا پنجاب چوں سیاستدان وی بنیا تے پاکستان دا حکمران وی بنیا۔ اناں پنجابی قوم پرستاں نوں لیاقت علی خان توں لے کے زرداری تک پنجابیاں تے حکومت کرن والے مھاجر ' پٹھان ' سندھی ' بلوچ دی سیاست تے حکمرانی چنگی لگی پر جے غلطی نال کوئی پنجابی سیاست وچ آ کے حکمراں بن ای گیا اے تے او رڑکدا اے۔ عقل دی گل تے اے ھوسکدی اے کہ؛ اے نواز شریف جے گھٹیا سیاستدان تے نالائق حکمراں اے تے ایس دے بجائے کسے دوجے چنگے جئے پنجابی سیاستدان دا ناں دسن؟ پر گل اے وے کے اناں نوں پنجابی سیاستدان تے حکمران نئیں چائی دا کیونکہ 1000 سال توں (سوائے 50 سال دی سکھ سلطنت دے) اے پنجابی سیاستدان تے حکمران دی آں لتاں کھچن دے عادی نے تے غیر پنجابی سیاستدان تے حکمران دی جی حضوری وچ اناں نوں سواد آندا اے۔

سیاست اک کھیل اے۔ اے کھیل شطرنج وانگوں اے۔ ایس کھیل وچ شطرنج وانگوں ھر مھرے دی چال وکھری ھوندی اے۔ اے کھیل مقامی سطح دا وی ھوندا اے۔ صوبائی سطح دا وی ھوندا اے تے قومی سطح دا وی ھوندا اے۔ قومی سطح دی سیاست دا کھیل قوماں نوں بنا وی دیندا اے تے برباد وی کر دیندا اے۔ ایس لئی سیاسی علم تے سیاسی تجربے توں بغیر پنجابی زبان تے پنجابی ثقافت لئی کم کرن والے پنجابی لکھاریاں ' پنجابی شاعراں تے پنجابی زبان پرستاں لئی چنگی گل تے اے ای وے کہ پنجابی زبان تے پنجابی ثقافت دا کم کرن۔ پنجاب تے پنجابی قوم دے سیاسی ' سماجی ' معاشی تے انتظامی معاملات بارے او پنجابی گل کرن جنہاں نوں سیاست دے صوبائی سطح تے قومی سطح دے کھیل دا علم تے سیاسی تجربہ اے۔ جد کہ عام پنجابی نوں وی چائی دا اے کہ پنجاب تے پنجابی قوم دے سیاسی ' سماجی ' معاشی تے انتظامی معاملات بارے اناں پنجابیاں دی گل سنن تے سمجھن جنہاں نوں سیاست دا علم اے  تے او سیاسی تجربہ وی رکھدے نے۔

No comments:

Post a Comment