سیاست دے شعبے وچ وی پنجابی نوں مضبوط ھونا پینا اے۔

پنجابیاں وچ قومپرستی بوھت تیزی نال ودھ رئی اے۔ ایس لئی قومپرست پنجابی چاھندے نے کہ؛ ھر پنجابی ' پنجابی بولے۔ پنجاب دی تعلیمی زبان پنجابی ھووے۔ پنجاب دی سرکاری زبان پنجابی ھووے۔ پنجاب دے دفتراں تے پنجاب دی اسمبلی وچ پنجابی زبان وچ گل کیتی جاوے۔ ھر پنجابی سیاستدان ' پنجابیاں دے سماجی ' پنجاب دے معاشی ' پنجاب تے پنجابیاں دے سیاسی حق دی گل کرے۔ پر اے کم سیاست دا اے تے پنجابی نے ھجے تک سیاست دے شعبے وچ اپنے آپ نوں مضبوط نئیں کیتا۔

پنجابی نے زراعت ' ھنرمندی ' تجارت ' صنعت ' سول بیوروکریسی تے ملٹری بیوروکریسی دے شعبے وچ مھارت حاصل کرکے اپنے آپ نوں مضبوط کیتا اے تے صحافت دے شعبے وچ مھارت حاصل کرکے اپنے آپ نوں مضبوط کر ریا اے۔ سیاست دے شعبے وچ ھجے تک پنجابی نے مھارت حاصل نئیں کیتی۔ ایس لئی ھجے تک سیاست دے شعبے وچ پنجابی مضبوط نئیں اے۔

زراعت ' ھنرمندی ' تجارت ' صنعت ' سول بیوروکریسی تے ملٹری بیوروکریسی دے شعبے دا تجربہ رکھن والے پنجابی سیاسی ذھن ای نئیں رکھدے۔ ایس لئی جد سیاست کردے نے تے سیاست دے ناں تے کاروبار کردے نے یا فے نوکری ای کردے نے۔ ایس لئی نہ پنجاباں دے سماجی ' پنجاب دے معاشی ' پنجاب تے پنجابیاں دے سیاسی حق دی گل کرے نے۔ نہ پنجاب دی تعلیمی زبان پنجابی کرن دی گل کردے نے۔ نہ پنجاب دی سرکاری زبان پنجابی کرن دی گل کردے نے۔ نہ آپ وی پنجاب دے دفتراں تے پنجاب دی اسمبلی وچ پنجابی زبان وچ گل کردے نے۔

سیاسی ذھن نہ ھون دے کرکے ' سیاسی سوچ نہ ھون دے کرکے ' سیاسی حکمت عملی نہ ھون دے کرکے ' غیر سیاسی ذھن والے پنجابی ' سیاست کرن لئی ' سیاسی اثر و رسوخ حاصل کرن لئی 'مال خرچ کردے نے یا فے برادری تے علاقے دی بنیاد تے ووٹ لیندے نے تے پنجابی قوم نوں برادریاں تے علاقیاں وچ ونڈدے نے۔

قومپرست پنجابیاں دے مشن نوں جے منزل تائیں پہنچانا اے کہ؛ ھر پنجابی ' پنجابی بولے۔ پنجاب دی تعلیمی زبان پنجابی ھووے۔ پنجاب دی سرکاری زبان پنجابی ھووے۔ پنجاب دے دفتراں تے پنجاب دی اسمبلی وچ پنجابی زبان وچ گل کیتی جاوے۔ ھر پنجابی سیاستدان ' پنجابیاں دے سماجی ' پنجاب دے معاشی ' پنجاب تے پنجابیاں دے سیاسی حق دی گل کرے۔ تے فے جیس طراں پنجابی نے زراعت ' ھنرمندی ' تجارت ' صنعت ' سول بیوروکریسی تے ملٹری بیوروکریسی دے شعبے وچ مھارت حاصل کرکے اپنے آپ نوں مضبوط کیتا اے تے صحافت دے شعبے وچ مھارت حاصل کرکے اپنے آپ نوں مضبوط کر ریا اے۔ اوسے طراں سیاست دے شعبے وچ وی مھارت حاصل کرکے سیاست دے شعبے وچ وی پنجابی نوں مضبوط ھونا پینا اے۔

پنجابیاں نوں اے سمجھنا پینا اے کہ قوم دے سماجی تے انتظامی ' معاشی تے اقتصادی حق حاصل کرن لئی سیاست دا کھیل کھیلنا پینا اے۔ سیاست دا کھیل تن طراں دے بندے کھیل سکدے نے تے باقی تماشبین یا رولا پان والے ھوندے نے۔ سیاست دا کھیل؛ اک تے او کھیل سکدے نے جنہاں نوں سیاسی پروگرام بنانا آندا ھووے۔ دوجے او کھیل سکدے نے جنہاں نوں بنائے گئے سیاسی پروگرام تے عمل کروانا آندا ھووے۔ تیجے او کھیل سکدے نے جنہاں دا عوام نال رابطہ ھووے تے او بنائے گئے کسے سیاسی پروگرام دے اتے عوام نوں کٹھا کر سکن۔