Saturday 9 June 2018

پنجابی بولن تے لکھن دے بجائے اردو نوں پنجابی کیوں ورتدے نے؟

پنجابی زبان دی پرورش صوفی بزرگاں بابا فرید ' بابا نانک ' شاہ حسین ' سلطان باہو ' بلھے شاہ ' وارث شاہ ' خواجہ غلام فرید ' میاں محمد بخش کیتی۔ ایس لئی پنجابی زبان دا پس منظر روحانی ھون دے کرکے پنجابی زبان وچ علم ' حکمت تے دانش دے خزانے نے جیہڑے اخلاقی کردار نوں بہتر کرن تے روحانی نشو نما دی صلاحیت رکھدے  نے۔

پنجابی زبان ھر پنجابی بولنا جاندا اے۔ جے کسے نوں پنجابی بولنی ای نئیں آندی تے فے او پنجابی کیس طراں ھو سکدا اے؟ اے ھور گل اے کہ پنجابی اپنی ماں بولی گھٹ بولدے نے تے اردو بوھتی ورتدے ریندے نے۔ ای کوئی چنگی گل نئیں اے۔ پنجابی نوں اپنی ماں بولی ای بولنی چائی دی اے تے اردو اودوں ای ورتنی چائی دی اے جداں لوڑ پین تے پنجابی نوں انگریزی یا کوئی ھور زبان ورتنی پیندی اے۔ پر پنجابیاں وچ اردو ورتن دے بجائے اپنی ماں بولی بولن دی عادت اودوں ای پائی جاسکدی اے جد پنجابیاں دا سیاسی شعور ودھدے ' پنجابیاں دا ذھن پنجابی بن جاوے تے پنجابیاں وچ قوم پرستی جاگ جاوے۔

سیاست دا مقصد ھوندا اے کہ؛ اپنی قوم دے سماجی تے معاشی جد کہ اپنی دھرتی دے انتظامی تے اقتصادی مسئلے حل کیتے جان۔ جہدے لئی لوڑ ھوندی اے کہ اپنی قوم نوں قوم پرست بنایا جاوے۔ ایس لئی پنجابیاں کولوں پنجابی زبان وچ نریاں جگتاں تے شعر و شاعری کروان دے بجائے پنجابیاں دا سیاسی شعور ودھایا جاوے ' پنجابیاں دا ذھن پنجابی بنایا جاوے تے پنجابیاں وچ قوم پرستی جگائی جاوے۔ وقت لنگھن نال جیویں جیویں پنجایاں وچ سیاسی شعور ودھدا جاوے گا اوویں اوویں پنجابیاں دا ذھن وی پنجابی بندا جاووے گا تے پنجابی آپ ای پنجابی قوم پرست بندے جان گے۔ فے پنجابی دوجی زبان دے بجائے اپنی ماں بولی وی آپ ای بوھتی بولن تے لکھن لگ پین گے تے اردو ورتنا چھڈ دین گے۔

پنجایاں وچ سیاسی شعور ودھائے بغیر ' پنجابیاں دے ذھن نوں پنجابی بنا کے پنجابیاں نوں پنجابی قوم پرست بنائے بغیر ' پنجابیاں نوں پنجابیاں دے سماجی تے معاشی ' پنجاب دے انتظامی تے اقتصادی مسئلے حل کروان تے لائے بغیر ' پنجابیاں نوں نرا پنجابی بولن تے لکھن تے مجبور کرن نال ' پنجابیاں کولوں پنجابی زبان وچ جگتاں تے شعر و شاعری کروان نال ' نہ پنجابی نوں سماجی تے معاشی فائدہ ھونا اے۔ نہ پنجاب نوں انتظامی تے اقتصادی فائدہ ھونا اے۔ نہ پنجایاں وچ سیاسی شعور ودھنا اے۔ نہ پنجابیاں دے ذھن پنجابی بننے نے۔ نہ پنجابیاں وچ پنجابی قوم پرستی جاگنی اے۔ نہ پنجابیاں نے دوجی زبان دے بجائے اپنی ماں بولی ای بوھتی بولن تے لکھن لگ پینا اے۔ نہ اردو نوں ورتنا چھڈنا اے۔

No comments:

Post a Comment