سیاست کرکے پریشان ھون تے وقت خراب کرن توں بچن دا طریقہ کی اے؟

بہت سارے لوکاں نوں سیاست دا شوق اے۔ اے بڑی صلاحیت رکھدے نے۔ اناں دی سوچ وی چنگی اے۔ ملک تے قوم نال محبت وی کردے نے۔ بڑے خلوص نال چنگا کم وی کرنا چاھندے نے پر سیاست دا تجربہ نہ ھون دے کرکے اپنے آپ نوں پریشان تے اپنا وقت خراب کردے ریندے نے۔ اک اک بندے دے نخرے چکن۔ ھر اک دے مشورے سنن۔ ھر اک دے مطالبے سنن۔ ھر اک دے دکھ سکھ وچ شامل ھون۔ ھر اک دی آں وکھ وکھ منتاں کرن۔ تد جاکے سیاست کرسکدے نے۔

جد کہ مقامی سیاست دا تجربہ رکھن والے دا حال اے ھوندا اے کہ؛ عام بندے بھاویں جنا وی رولا پاندے رین۔ اناں نوں تے او گھا ای نئیں پائدا۔ او بندے دے بجائے گھرانے دے سربراہ نوں راضی رکھدا اے تے سیاست کردا اے۔ جیہڑے بندے روسے ریندے نے یا بوھتے مشورے دین تے مطالبے کرن والے ھوندے نے۔ اناں کولوں دور ای ریندا اے۔ اوس نوں اے پتہ ھوندا اے کہ سارے آں بندے آں تے راضی ھونا نئیں۔ کجھ بندے آں نے مخالفت وی کرنی اے۔ نالے جد بندے آں دے بجائے گھرانے آں دے سربراہ نوں ای راضی رکھنا اے تے فے کلے کلے بندے دے نخرے چکن دا فائدہ کی اے؟

صوبائی سیاست دا تجربہ رکھن والے دا حال اے ھوندا اے کہ؛ عام بندے نوں تے کی گھرانے آں دے سربراہ نوں وی گھا نئیں پاندے۔ اناں نال میل ملاقات کرنی وی پے جاووے تے اناں نال کلے کلے نئیں ملدے۔ کٹھ وچ ملدے نے تاکہ جیہڑا رولا شولا اناں پانا اے او پا پو کے رانجھا راضی کرلین۔ اناں نے جد کوئی مشورہ دینا ھوندا اے یا مطالبہ کرنا ھوندا اے ' اودوں اناں نوں آکھدے نے کہ زبانی دسن دے بجائے لکھ کے دے دو۔ وکھ وکھ صرف اناں نال ملدے نے جیہڑے خاندان دے سربراہ ھوندے نے۔ پر اے صلاح مشورہ اناں نال ای کردے نے تے اناں نال ای دکھ سکھ ونڈدے نے جیہڑے واسطے والے بندے ھوندے نے۔ اے انہاں دی ٹیم ھوندی اے۔

قومی سیاست دا تجربہ رکھن والے دا حال اے ھوندا اے کہ؛ عام بندے نوں تے کی گھرانے آں دے سربراہ نوں تے خاندان دے سربراہ نوں وی گھا نئیں پاندے۔ اناں نال میل ملاقات کرنی وی پے جاووے تے اناں نال کلے کلے نئیں ملدے۔ کٹھ وچ ملدے نے تاکہ جیہڑا رولا شولا اناں پانا اے او پا پو کے رانجھا راضی کرلین۔ اناں نے جد کوئی مشورہ دینا ھوندا اے یا مطالبہ کرنا ھوندا اے ' اودوں اناں نوں آکھدے نے کہ زبانی دسن دے بجائے لکھ کے دے دو۔ وکھ وکھ صرف اناں نال ملدے نے جیہڑے برادری دے سربراہ ھوندے نے۔ پر اے صلاح مشورہ اناں نال ای کردے نے تے اناں نال ای دکھ سکھ ونڈدے نے جیہڑے واسطے والے بندے ھوندے نے۔ اے انہاں دی ٹیم ھوندی اے۔

گل اے وے کہ بندہ 150 بندے آں توں زیادہ بندے آں نال واسطے داری نئیں نبھا سکدا۔ 150 بندے آں توں زیادہ صرف جان پہچان ' دعا سلام یا میل ملاقات ای رکھ سکدا اے۔ دنیا وچ کسے بندے کول وی 150 بندے آں توں ودھ ٹیم نئیں ھوسکدی جیس نال اوس دا ھر ویلے واسطہ رھندا ھووے۔ جنہاں نال او لین دین کردا اے یا دکھ سکھ ونڈدا اے۔ ایس لئی کسے وی بندے دی ٹیم ویکھ کے اندازہ کیا جا سکدا اے کہ او کیس سطح دا سیاسی کھیل کھیلن جوگا اے۔ سیاست دا جیس سطح تے کھیل کھیلنا ھووے اوس سطح توں وڈی سطح دی ٹیم دا میمبر بننا وی ضروری ھوندا اے۔ اپنے توں وڈی سطح دی ٹیم دے لیڈر نال ھر ویلے واسطہ رکھنا پیندا اے۔ اوس کولوں فائدہ چکنا پیندا اے۔ نالے جیہڑے اپنی ٹیم وچ ھون۔ انہاں نال وی ھر ویلے واسطہ رکھنا پیندا اے۔ انہاں نوں فائدہ دینا پیندا اے۔

جنہاں نوں سیاست دا تجربہ نہ ھووے اناں نوں سیاسی شعور نئیں ھوندا۔ ایس لئی او نہ تے کسے دی سیاسی ٹیم دا حصہ بن سکدے نے تے نہ آپ ای قومی تے کی صوبائی سطح تے سیاسی ٹیم بنا سکدے نے۔ او یا تے جذباتی ھوندے نے تے یا فے اپنا اپنا مفاد کڈھدے نے۔ جد کہ اناں دی سیاسی صلاحیت ودھ توں ودھ اپنے علاقے دی مقامی سیاست تک تے سیاسی دلچسپی اپنی برادری تک ھوندی اے پر گلاں صوبائی یا قومی تے کی بین الاقوامی سیاسی معاملات دی آں وی انج کردے نے جداں اے بڑا علم تے تجربہ رکھدے ھون۔ جد کہ زیادہ تر نوں اپنے علاقے توں بار جاکے اپنے صوبے تے ملک دے علاقے ویکھن تے اوتھے دے لوکاں نال مل کے سیاسی ماحول نوں سمجھن دا اتفاق وی نئیں ھویا ھوندا۔

ایس لئی پنجابیاں نوں چائی دا اے کہ پہلے او وکھیا کرن کہ او قومی یا صوبائی سطح دی ٹیم بنا سکدے نے یا کسے قومی یا صوبائی سطح دی ٹیم دا حصہ بن سکدے نے یا مقامی سیاست ای کرسکدے نے۔ اوس توں بعد ٹیم بنان یا کسے ٹیم دا حصہ بن کے ٹیم دے آگو یا ٹیم اگے اپنے مطالبے رکھیا کرن تے مشورے دے آ کرن۔ ٹیم بنائے بغیر یا ٹیم دا حصہ بنے بغیر مشورے دینا یا مطالبے کرنا نرا رولا پانا اے تے ایس نال وقت ای خراب ھوندا اے۔ گل نہ کوئی سندا اے تے نہ کوئی مندا اے۔