ماجھے دے پنجابی نوں اپنے آپ نوں ٹھیک کرنا پینا اے۔

پنجابیاں دا دنیا وچ سب وڈا شھر ماجھے دے علاقے وچ لاھور اے۔ ماجھے دے پنجابی ' خاص طور تے لاھور دے پنجابی دا مسئلہ اے وے کہ؛ اک تے آپ پنجابی دے بجائے اردو ورتدا اے تے دوجا اپنے آپ نوں اکھواندا وی پنجابی دے بجائے پاکستانی اے۔ تیجا ماجھے دے علاقے توں بار رین والے پنجابیاں نوں پنجابی منن دے بجائے غیر پنجابی بنان وچ لگا ریندا اے۔

کشمیر وچ رین والے پنجابی زبان دا لہجہ پہاڑی بولدے نے پر ماجھا انہاں نوں کشمیری آکھدا اے۔ جموں وچ رین والے پنجابی زبان دا لہجہ ڈوگری بولدے نے پر ماجھا انہاں نوں جموں وال آکھدا اے۔ پنڈی وچ رین والے پنجابی زبان دا لہجہ پوٹھوھاری بولدے نے پر ماجھا انہاں نوں پنڈی وال آکھدا اے۔ ھزارہ وچ رین والے پنجابی زبان دا لہجہ ھندکو بولدے نے پر ماجھا انہاں نوں ھزارہ وال آکھدا اے۔ جنوبی پنجاب وچ رین والے پنجابی زبان دا لہجہ ڈیرہ والی ' ملتانی ' ریاستی بولدے نے پر ماجھا انہاں نوں سرائیکی آکھدا اے۔ سندھ وچ رین والے پنجابی زبان دا لہجہ دوآبی ' مالوی ' ڈیرہ والی ' ملتانی ' ریاستی بولدے نے پر ماجھا انہاں نوں سندھی آکھدا اے۔ کراچی وچ رین والے پنجابی زبان دا لہجہ پہاڑی ' ڈوگری ' پوٹھوھاری ' ھندکو ' ڈیرہ والی ' ملتانی ' ریاستی ' دوآبی تے مالوی بولدے نے پر ماجھا انہاں نوں کراچی والے آکھدا اے۔

ماجھے دے پنجابی نوں اپنے آپ نوں ٹھیک کرنا پینا اے۔ ماجھا اردو دے بجائے پنجابی ورتنا شروع کرے۔ ماجھا اپنے آپ نوں پنجابی اکھوانا شروع کرے۔ ماجھے دے علاقے توں بار رین والے پنجابی نوں پنجابی منے۔ اناں سارے پنجابیاں نال سانجھ ودھاوے۔ ماجھا پنجابی نہ بنیا تے فے ماجھا کلا نہ رہ جاووے گا۔ کدھرے سارے کٹھے ھوکے پنجابی نہ بن جان تے ماجھے نوں پاکستانی ای نہ بنا چھڈن۔

ماجھے دے اپنے سیاسی تے سماجی ' معاشی تے انتظامی مسئلے نے تے ماجھے دے علاقے توں بار رین والے پنجابیاں دے وی سیاسی تے سماجی ' معاشی تے انتظامی مسئلے نے۔ ماجھا اناں کولوں اپنے سیاسی تے سماجی ' معاشی تے انتظامی مسئلے آں لئی مدد لوے پر اناں دے سیاسی تے سماجی ' معاشی تے انتظامی مسئلے آں وچ وی مدد کرے۔

جد ماجھے دا ماجھے دے علاقے توں بار رین والے پنجابی ول ای دھیان نئیں تے فے ماجھے دا ماجھے دے علاقے توں بار رین والی آں دوجیاں قوماں ول کی دھیان ھونا اے؟ ماجھا جد ماجھے دے علاقے توں بار رین والے پنجابیاں نال ای سانجھ نئیں کر پا رے آ تے فے ماجھے نے ماجھے دے علاقے توں بار رین والی آں دوجیاں قوماں نال کی سانجھ کرلینی اے؟