Friday, 7 April 2017

پنجابی نوں اپنا ذھن وی پنجابی بنانا چائی دا اے۔

پنجابی او وے جیہڑا پنجاب وچ ریندا اے یا پنجاب توں بار کتے وی ریندا اے پر اوس دی زبان ' ثقافت ' تہذیب تے رسم و رواج پنجابی ھووے بھاویں اس دا دھرم تے نسل کجھ وی ھووے۔ پنجاب وچ رے کے وی جیس دی زبان ' ثقافت ' تہذیب تے رسم و رواج پنجابی نہ ھون اوپنجاب دا رین والا اے پر پنجابی نئیں۔

پنجابیت اے وے کہ پنجاب تے پنجابی قوم دی سماجی ' سیاسی ' معاشی تے اقتصادی ترقی واسطے کوشش تے جدوجہد کیتی جاوے۔ پنجابی زبان بولن والا ' ثقافت ' تہذیب تے رسم و رواج اختیار کرن والا جے پنجاب تے پنجابی قوم دی سماجی ' سیاسی ' معاشی تے اقتصادی ترقی واسطے کوشش تے جدوجہد نہ کرے تے او پنجابی تے ھے پر اوس وچ پنجابیت نئیں اے۔

تجربے توں پتہ چلیا اے کہ بوت سارے غیر پنجابیاں '  پنجابی بول بول کے '  پنجابیاں اگے اے ظاھر کیتا کہ او پنجابی نے تے اوناں اپنی سیاست تے سازشاں نال  پنجاب تے پنجابیاں نوں سماجی ' سیاسی ' معاشی ' اقتصادی طور تے تباہ تے برباد کرکے رکھ چھڈیا۔ جد کہ بوت سارے پنجابیاں وی '  پنجابی بول بول کے '  ذھن پنجابی نہ ھون دے کرکے  پنجاب تے پنجابیاں نوں سماجی ' سیاسی ' معاشی ' اقتصادی طور تے تباہ تے برباد کرکے رکھ چھڈیا۔

 پنجابی لئی پنجابی بولنا تے انج ای ضروری اے  پر  پنجابی بولن دے نال نال  پنجابی نوں اپنا ذھن وی پنجابی بنانا چائی دا اے۔ پنجابی ذھن صرف پنجابی بولدا ای نئیں۔ پنجابی ذھن سوچدا وی پنجابی وچ ای اے۔ پنجابی ذھن پنجاب تے پنجابیاں دے سماجی ' سیاسی ' معاشی ' اقتصادی مسئلے آں تے وی دھیان رکھدا اے۔ پنجابی ذھن پنجاب تے پنجابیاں دے سماجی ' سیاسی ' معاشی ' اقتصادی مسئلے آں تے غور وی کردا اے۔ پنجابی ذھن پنجاب تے پنجابیاں دے سماجی ' سیاسی ' معاشی ' اقتصادی مسئلے آں نوں حل کرن دی کوشش وی کردا اے۔