Friday, 2 June 2017

قوم کیس نوں کہندے نے؟ قوم پرستی کی ھوندی اے؟ قوم پرست کی کردا اے؟

قوم کیس نوں کہندے نے؟

مختلف نسلاں ' ذاتاں ' برادریاں ' قبیلے آں ' مذھباں دے لوکی جیہڑے زمین دے ایہو جئے خطے وچ رھندے نے ' جتھے اناں دی اکو جئی زبان ' اکو جئی تہذیب تے اکو جئی ثقافت ھووے۔ اناں نوں اک قوم آکھیا جاندا اے۔

قوم پرستی کی ھوندی اے؟

قوم دی زبان ' قوم دی تہذیب ' قوم دی ثقافت ' قوم دی زمین ' قوم دے لوکاں ' دے نال محبت کرن نوں تے اناں لئی قربانی دین نوں قوم پرستی آکھیا جاندا اے۔ 

اے اک عقیدہ اے کہ انہاں دی قوم دے لوکاں دی عزت ' قوم دی زمین دی حفاظت ' قوم دی تہذیب دا احترام ‘ قوم دی ثقافت دا وقار ' قوم دی زبان دی اھمیت ' دنیا دے دوجے کماں توں زیادہ ضروری اے۔ 

قوم دے وچ قوم پرستی دے کرکے ای دوجی قوم دی زبان ' دوجی قوم دی تہذیب ' دوجی قوم دی ثقافت تے دوجی قوم دے لوکاں دے مفادات نوں ' اناں دی زمین تے نالے اناں دی قوم دے لوکاں تے غلبے نوں ' محسوس کیتا جاتدا اے۔ جیس دے کرکے قوم دے حقاں دا دفاع کرن دی کوشش کرن والی سوچ جاگن لگ پیندی اے۔ 

جنہاں قوماں وچ قوم پرستی نہ ھووے او قوماں نہ تے دوجیاں قوماں دے غلبے نوں محسوس کردیاں نے تے نہ ای اناں وچ اپنی قوم دے مفادات دا دفاع کرن دی سوچ جاگدی اے۔

قوم پرست کی کردا اے؟

قوم پرست اپنی قوم دا سیاسی شعور ودھاندا اے تاکہ قوم دے حقاں دا دفاع کرن والی سوچ نوں جگائے۔ کیونکہ قوم پرست قوم دے لوکاں ' قوم دی زبان ' قوم دی تہذیب ' قوم دی ثقافت ' قوم دی زمین دے نال محبت کردا اے۔

قوم پرست اپنی قوم دی زمین ' قوم دی ثقافت ' قوم دی تہذیب ' قوم دی زبان '  قوم دے لوکاں دے  مفادات دی حفاظت کردا اے۔ ایس لئی قوم پرست ' قوم دے لوکاں ' قوم دی زبان ' قوم دی تہذیب ' قوم دی ثقافت ' قوم دی زمین دے  مفاد دے لئے اپنے آپ نوں وقف کر دیندا اے۔


قوم پرست ' قوم دا اک وکیل ھوندا اے۔ ایس لئی قوم پرست اپنی قوم دی زمین ' قوم دی ثقافت ' قوم دی تہذیب ' قوم دی زبان '  قوم دے لوکاں دے حقاں دا دفاع کردا اے۔