Saturday, 17 June 2017

بندے دی نسل ' برادری ‘ ذات ' قبیلے ' قوم ' مذھب تے شہریت وچ فرق کی ھوندا اے؟

مسلمان بھانویں کسے وی نسل ' برادری ‘ ذات  ' قبیلے ' قوم یا شہریت دا ھووے ' او امتِ محمدی ﷺ دا حصہ ھوندا اے۔ نسل ' برادری ‘ ذات  ' قبیلا ' قوم یا شہریت ھر مسلمان دی وکھری وکھری ھوندی اے پر امت اک ای اے۔

میرا ناں شھباز اے۔ میں مسلمان آں۔ میری امت محمدی ﷺ اے۔ میری شہریت پاکستانی اے۔ میری قوم پنجابی اے۔ میرا قبیلا ارائیں اے۔ میری ذات رامے اے۔ میری برادری میرے دادکے آں تے ناکے آں دے خانداناں تے مشتمل اے۔ میری نسل سامی اے۔

اک جنے توں لے کے قوم تک دے مرحلے اے نے کہ اک ای گھر دے جی کٹھے ھو کے گھر بناندے نے۔ اک ای خاندان دے گھر کٹھے ھو کے خاندان بناندے نے۔ اک ای برادری دے خاندان کٹھے ھو کے برادری بناندے نے۔ اک ای قوم دی آں برادریاں کٹھے ھو کے قوم بناندیاں نے۔

مختلف نسلاں ' برادریاں ‘ ذاتاں  ' قبیلے آں ' مذھباں دے لوکی جیہڑے زمین دے ایہو جئے خطے وچ رھندے نے ' جتھے اناں دی اکو جئی زبان ' اکو جئی تہذیب تے اکو جئی ثقافت ھووے۔ اناں نوں اک قوم آکھیا جاندا اے۔

کسے زمانے وچ قوماں دے اپنے اپنے علاقے ھوندے سن پر ریاستاں دی آں سرحداں نوں تسلیم کرن دے عالمی نظام توں بعد ھن ریاست وچ اک توں زیادہ قوماں ھوندیاں نے تے ریاست وچ رین والے ساری ای ریاست دے شہری ھوندے نے۔ ایس کرکے اسیں پاکستانی قوم نئیں آں۔ اسیں پاکستان دے شہری آں۔

قومیت دے خانے وچ اسیں سارے ای "پاکستانی" لکھ دے رہندے آں. ایس دی وجہ اے وے کہ کسے زمانے وچ قوماں دے اپنے اپنے علاقے ھوندے سن پر ریاستاں دی آں سرحداں نوں تسلیم کرن دے عالمی نظام توں بعد ھن ریاست وچ اک توں زیادہ قوماں ھوندیاں نے پر بین الاقوامی طور تے قومیت دا مطلب شہریت ' مطلب کہ کیس ملک دا شہری اے ' لے آ جاندا اے۔ نہ کہ او لوک لئے جاندے نے جنہاں دی اکو جئی زبان ' اکو جئی تہذیب تے اکو جئی ثقافت ھووے۔ ایس لیے قومیت دے خانے وچ "پاکستانی" لکھن دا مطلب ھوندا اے کہ اے پاکستان دا شہری اے۔ ایس دا بندے دی نسل ' برادری ‘ ذات  ' قبیلے ' قوم یا مذھب نال کوئی واسطہ نئیں ھوندا۔