Friday, 16 June 2017

قوم وچ قوم پرستاں ' مفاد پرستاں تے شغل پرستاں دا کردار کی ھوندا اے؟

ھر قوم وچ 3 طراں دے بندے ھوندے نے۔ اک تے قوم پرست ' دوجے مفاد پرست تے تیجے شغل پرست۔ ھر قوم وچ قوم پرست تھوڑے ھوندے نے ' مفاد پرست بوھتے ھوندے نے تے شغل پرست سب توں بوھتے ھوندے نے۔

قوم پرست اپنی قوم دے لوکاں دا سیاسی شعور ودھاندا اے تاکہ قوم دے لوک مفاد پرست یا شغل پرست بنن دے بجائے قوم پرست بنن تے اناں وچ قوم دے حقاں دا دفاع کرن والی سوچ جاگے۔ کیونکہ قوم پرست قوم دے لوکاں ' قوم دی زبان ' قوم دی تہذیب ' قوم دی ثقافت ' قوم دی زمین دے نال محبت کردا اے۔ اپنے آپ نوں قوم لئی وقف کر دیندا اے۔ قوم دے مفاداں دی حفاظت کردا اے۔ قوم دے حقاں دا دفاع کردا اے۔

ایس دے مقابلے وچ مفاد پرست وچ قوم دی زبان ' قوم دی تہذیب ' قوم دی ثقافت ' قوم دی زمین دے نال محبت دے نہ ھون دے کرکے قوم دے حقاں دا دفاع کرن والی سوچ دے بجائے اپنے ذاتی مفاد حاصل کرن والی سوچ ھوندی اے۔ ایس لئی مفاد پرست ' قوم دے بجائے اپنے ذاتی مفاداں تک محدود ریندا اے۔ جے مفاد پرست نوں قوم پرستی دا فائدہ ھووے تے فے او قوم پرست وی بن جاندا اے پر جے نقصان دا خدشہ ھووے تے اپنی ای قوم دے خلاف ھون لئی دیر نئیں لاندا۔

جد کہ شغل پرست وچ اینا شعور تے ھوندا نئیں کہ اوس وچ قوم دی زبان ' قوم دی تہذیب ' قوم دی ثقافت ' قوم دی زمین دے نال محبت ھووے تے قوم دے حقاں دا دفاع کرن والی سوچ ھووے پر اوس کول اپنے ذاتی مفاداں نوں حاصل کرلین دی وی صلاحیت نئیں ھوندی۔ پنجابی دی کہاوت اے کہ "جیدے گھر دانے ' اوس دے کملے وی سیانے"۔ ایس لئی قوم دے شغل پرست قوم دے مفاد پرستاں نوں سیانا سمجھ کے اناں دے آلے دوالے پھردے ریندے نے۔ اے ھور گل اے کہ مفاد پرستاں دے آلے دوالے پھرکے وی نہ اوناں نوں عزت ملدی اے ' نہ اناں دی ترقی ھوندی اے تے نہ او خوشحال ھوپاندے نے ' پر فے وی شعور نہ ھون دے کرکے مفاد پرستاں دے آلے دوالے ای پھردے ریندے نے۔

قوم دی عزت ' قوم دی ترقی تے قوم دی خوشحالی اودوں ھوندی اے جد قوم دے مفاد پرستاں دے بجائے قوم دے قوم پرستاں کول حکومتی اختیار وی ھووے تے مالی وسائل وی ھون۔ نئیں تے قوم اتے قوم دے مفاد پرستاں دا ای راج ریندا اے تے شغل پرست اناں دے آلے دوالے پھردے ریندے نے۔ ایس کرکے مفاد پرستاں دی عزت وی ھوندی اے۔ مفاد پرست ترقی وی کردے نے تے مفاد پرست خوشحال وی ھوندے نے۔ جد کہ قوم دی نہ عزت ھوندی اے ' نہ قوم ترقی کردی اے تے نہ قوم خوشحال ھوندی اے۔

قوم پرستی دا مشن قوم دے لوکاں دے شعور نوں بیدار کیتے بغیر ' ٹیم ورک کیتے بغیر ' قوم پرستاں نوں حکومتی طاقت دوائے بغیر پورا نئیں ھو سکدا۔ ایس لئی؛

پنجابی قوم پرستی دا پہلا مرحلہ پنجابیاں دا پنجاب ' پنجابیاں ' پنجابی زبان ' پنجابی ثقافت ' پنجابی تہذیب بارے شعور ودھانا اے۔ ایس تے کم ھو ریا اے۔

پنجابی قوم پرستی دا دوسرا مرحلہ پنجابی قوم پرستی لئی کم کرن والے آں دی آں ٹیماں بنوا کے پنجابی قوم پرستی دا کم کرنا اے۔ ایس تے کم شروع کیتا جا ریا اے تے 2020 تک پورا ھو جاوے گا۔ انشاء اللہ

پنجابی قوم پرستی دا تیسرا مرحلہ پنجابی قوم پرستاں نوں سنیٹر ' قومی اسمبلی دے میمبر ' صوبائی اسمبلی دے میمبر ' وزیر ' مشیر بنوانا تے سرکاری اداریاں وچ ذمہ دار عہدیاں تک اپڑاناں اے۔ ایس تے 2020 توں کم شروع ھووے گا۔ انشاء اللہ

ھجے سارے پاکستان وچ پنجابی قوم پرست تیار کیتے جا رئے نے۔ انشاء اللہ 2020 وچ اناں پنجابی قوم پرستاں چوں 1000 پنجابی قوم پرست لاھور وچ کٹھے ھون گے۔

پنجابیاں نوں چائی دا اے کہ پنجابی قوم پرستاں دی عزت کریا کرن۔ پنجابی قوم پرستاں دا ھتھ ونڈایا کرن۔ پنجابی قوم پرستاں دا ساتھ دیا کرن۔