Saturday, 24 June 2017

ساڈے سکول سمجھان لئی نئیں نے پڑھان لئی نے۔

نکے ھوندیاں پنڈ دے سکول دا ماسٹر جد اردو وچ پڑھاندا سی تے میں سوچدا سی کہ؛
ماسٹر پنجابی وچ کیوں نئیں پڑھاندا؟
تاکہ ماسٹر جو پڑھاندا اے ' او سمجھ وی آوے۔

فے سوچدا سی کہ؛
مولوی وی تے انج ای کردا اے۔
سپارا پڑھا دیندا اے تے میں یاد کرلیندا واں۔
نہ مولوی سمجھاندا اے تے نہ میں سمجھدا واں۔

ماسٹر دا پڑھایا سمجھ تے آندا نئیں سی پر سبق یاد کر ای لئی دا سی۔
پنڈ دے نکے سکول چوں وڈے سکول وچ وی اینج ای ھوندا ریا۔

شہر وچ آکے پڑھن ویلے اردو دے نال نال انگریجی وی پڑھنی پے گئی۔
پنڈ وچ ای سمجھ دے بجائے یاد کرن دی عادت پے گئی سی۔
ایس لئی کالج وچ آکے انگریجی وچ پڑھایا وی یاد کرنا اوکھا نئی لگیا۔
بس لیکچرار پڑھا دیندے سن تے میں یاد کرلیندا سی۔
نہ لیکچراراں نوں سمجھان دی لوڑ پیندی سی۔
نہ مینوں سمجھن دی۔
بس یاد کر لئی دا سی۔

زندگی کجھ ایہو جئی ھوگئی کہ'
یاد کرنا سوکھا ھوگیا۔
سمجھن دی لوڑ نہ رئی۔

میرے یار بیلی وی میرے ورگے ای نے
پڑھیا ھویا تے بوھت اے
سمجھ کجھ آندی نئیں
ایس لئی جد گل بات کری دی اے تے بڑا مزا آندا اے
ھر کوئی اپنی اپنی ماردا اے
نہ کوئی کسے دی گل سمجھدا اے
نہ کوئی کسے نوں گل سمجھاندا اے
ھر کوئی اک دوجے دی گل سندا اے
ھر کوئی اک دوجے نوں گل سنادا اے
نہ کسے نوں گل سمجھان دی لوڑ پیندی اے
نہ کسے نوں کسے دی گل سمجھن دی لوڑ پیندی اے
کوئی برا وی نئیں منادا کہ توں گل سمجھی کیوں نئیں؟
کوئی برا وی نئیں منادا کہ توں گل سمجھائی کیوں نئیں؟

ھن جد پنجاب دے پنڈاں وچ جانا ھوندا اے تے سوچدا واں کہ؛
جد کجھ سمجھانا ای نئی تے فے یاد کیوں کروایا جاندا اے؟

فے سوچدا واں کہ؛
ساڈے سکول سمجھان لئی نئیں نے
پڑھان لئی نے۔
ایس لئی ای اسیں روبوٹ آں
تے ساڈے اندر پروگرام فیڈ اے
اے فیڈ پرگرام ای سانوں کھچی پھردا اے۔

جے نکے ھوندیاں ای سکول وچ؛
پڑھا کے یاد کران دی عادت دے بجائے
پڑھا کے سمجھن دی عادت پا دتی گئی ھوندی
تے فے اساں روبوٹ نئیں سی ھونا
اساں سمجھدار انسان ھونا سی۔

سمجھدار ھون دے کرکے؛
اساں اشرف المخلوقات ھونا سی
اساں اسفل السافلین نئیں سی ھونا۔