Saturday, 24 September 2016

ماجھے دے پنجابی تے کراچی دے مھاجر دی یاری "بڑی مہنگی پئی"۔

پاکستان وچ پنجابی ' سینٹرل پنجاب وچ وی ریندے نے ' شمالی پنجاب وچ وی ریندے نے تے کراچی ' سندھ ' بلوچستان ' خیبر پختونخواہ تے ساؤتھ پنجاب وچ وی ریندے نے پر سینٹرل پنجاب دے پنجابی ' جنہاں نوں ماجھے دے پنجابی آکھیا جاندا اے ' اناں دی گل ای وکھری اے۔

سینٹرل پنجاب دے پنجابی ھون دے کرکے اے ماجھے دے پنجابی چاروں پاسے اوں پنجابیاں دے وچکال وچ نے ' ایس لئی اناں دا سارے پنجابیاں نال تے سارے پنجابیاں دا اناں نال رابطہ تے واسطہ ریندا اے۔ وڈے وڈے شھر وی ماجھے دے علاقے وچ نے تے سوکھے وی ماجھے دے پنجابی ای نے۔ پنجابی زبان دا کتابی لہجہ وی ماجھی ای اے۔ ایس کرکے پنجابی قوم وچ ماجھے دے پنجابی دا کردار وڈے بھرا والا اے۔ جیس دا فرض بن دا اے کہ چھوٹے تے دور رین والے بھراواں دا خیال کرے ' پر ماجھا اپنی ای مستی وچ مست اے۔


ماجھے دے پنجابی دی مھاجراں نال یاری دے کرکے ماجھے نوں؛ نہ سارے پنجاب دی فکر اے تے ناں پنجابی زبان دی فکر اے۔ نہ وڈا بھرا ھون دے کرکے چھوٹے بھرواں دی فکر اے تے نہ دور رین والے بھراواں دی فکر اے۔ بس اردو زبان تے پاکستان دی فکر اے۔ لگدا انج اے کہ مھاجراں نال یاری دے کرکے ' اے لاھور نوں لکھنو تے پاکستان نوں اتر پردیش بنان دے چکر وچ اے۔ ایس کرکے ' ایس نوں ایس دا پتہ ای نئیں کہ؛


پنجابیاں دے نال جیڑا سلوک کراچی وچ مھاجر ' سندھ وچ بلوچ۔سندھی ' بلوچستان دے بلوچ علاقے وچ بلوچ ' بلوچستان دے پشتون علاقے وچ پشتون ' خیبر پختونخواہ وچ پختون کر رئے سن تے ھن ساؤتھ پنجاب وچ آباد کردستانی بلوچاں ' عربستانی مخدوماں ' قریشیاں ' عباسیاں تے افغانستانی پٹھاناں نے سرائیکی دے ناں نال ساؤتھ پنجاب وچ اک نواں شوشہ کھڑا کرکے ' اناں سرائکیاں وی کرنا شروع کر دتا اے۔ ایہدا 2020 تائیں ری ایکشن بڑا خطرناک ھووے گا۔


اج جیس پنجابی دی عمر 20 توں 30 سال دے اندر اے ' اوہ بڑے غور نال کراچی وچ مھاجر ' سندھ وچ بلوچ۔سندھی ' بلوچستان دے بلوچ علاقے وچ بلوچ ' بلوچستان دے پشتون علاقے وچ پشتون ' خیبر پختونخواہ وچ پختون تے ساؤتھ پنجاب وچ سرائیکی دے سلوک نوں ویخ وی رئے نے تے بھوگت وی رئے نے۔


ماجھے دے پنجابیاں دے پنجابی زبان دے بجائے صرف اردو تے دھیان دین دے کرکے تے پنجاب دی ترقی تے دھیان دین دے بجائے سارے پاکستان نوں ترقی دین دے چکر وچ پین دے کر کے ' ایہہ سب کجھ ھو ریا اے۔


ماجھے دے پنجابیاں کدے وی نئیں سوچیا کہ کراچی وچ مھاجر ' سندھ وچ بلوچ۔سندھی ' بلوچستان دے بلوچ علاقے وچ بلوچ ' بلوچستان دے پشتون علاقے وچ پشتون ' خیبر پختونخواہ وچ پختون تے ساؤتھ پنجاب وچ سرائیکی ' اوتھے رین والے پنجابیاں نال کر کی رئے نے؟


ماجھے دا پنجابی بھاویں ھجے وی راہ تے نہ آوے تے کراچی ' سندھ ' بلوچستان ' خیبر پختونخواہ تے ساؤتھ پنجاب دے پنجابیاں دا خیال نہ کرے  تے نہ اناں لئی واج چکے پر ھن کراچی ' سندھ ' بلوچستان ' خیبر پختونخواہ  تے ساؤتھ پنجاب دا پنجابی ' گالاں کھا کھا کے ' نا انصافیاں برداشت کر کر کے ' ظلم سہہ سہہ کے ' ھمت وی پھڑدا جا ریا اے  تے آپس وچ رابطے ودھا کے کٹھا وی ھوندا جا ریا اے  تے تگڑا وی ھوندا جا ریا اے۔


پاکستان بنن توں  لے  کے ای پرنٹ  تے الیکٹرونک میڈیا “اردو بولنے والی مھاجر مافیا” دے کنٹرول وچ رئے نے۔ ایس کر کے پرنٹ تے الیکٹرونک میڈیا تے پنجابی قوم پرستی تے پنجابیاں دے مسئلیاں دی گل کرن دی کدی وی اجازت نئیں دتی گئی۔ جیس دے کر کے کراچی ' سندھ ' بلوچستان ' خیبر پختونخواہ تے ساؤتھ پنجاب دے پنجابیاں دے سینیاں وچ بھانبھڑ مچے ھوئے نے۔


کراچی ' سندھ ' بلوچستان ' خیبر پختونخواہ تے ساؤتھ پنجاب دے پنجابی وی 70 سالاں توں پنجاب تے پنجابیاں دے نال ھون‌ والے ظلم تے زیادتیاں نوں سنانا چاندے نے۔ پنجاب تے پنجابیاں دے حقاں واسطے کجھ کرنا چاندے نے۔ ایس لئی 2020 تائیں ' انٹرنیٹ دے ذریعے ' جتھے مھاجر مافیا دا کنٹرول نئیں ' انہاں کراچی ' سندھ ' بلوچستان ' خیبر پختونخواہ تے ساؤتھ پنجاب دے پنجابیاں نے ھم خیال ھو جانا اے تے پروگرام بنا کے اوہ " پنجابی دھماکہ " کرنا اے کہ مھاجر ' بلوچ۔سندھی ' بلوچ ' پشتون ' پختون تے سرائیکی نسلاں تک یاد رکھن گے۔


ھجے وی ویلا اے کہ؛ کراچی ' سندھ ' بلوچستان ' خیبر پختونخواہ تے ساؤتھ پنجاب وچ پنجابیاں نوں کندھ نال نہ لایا جائے۔ دوجے درجے دا شھری نہ بنایا جائے۔ نالے ماجھے دا پنجابی وی ھن تے کجھ عقل نوں ھتھ مار لے۔ نئیں تے ' رگڑیا اوھناں وی جانا اے۔ کیوں کہ کراچی ' سندھ ' بلوچستان ' خیبر پختونخواہ تے ساؤتھ پنجاب دے پنجابی نوں ھن آپس وچ رابطہ کرکے ' اپنے مستقبل دا پروگرام بنان توں کوئی روک نئیں سکدا تے ماجھے دے پنجابی دا آسرا ھن انہاں کرنا نئیں۔ کیوں کہ؛ ماجھے دے پنجابی تے کراچی دے مھاجر دی یاری ' کراچی ' سندھ ' بلوچستان ' خیبر پختونخواہ تے ساؤتھ پنجاب دے پنجابی نوں " بڑی مہنگی پئی " تے ھن وی پے رئی اے۔