Tuesday, 7 February 2017

پنجاب دی ونڈ تے امرتا پریتم دا نوحہ

اج آکھاں وارث شاہ نوں کِتوں قبراں وچوں بول
تے اج کتابِ عشق دا کوئی اگلا ورقا پھول

اک روئی سی دھی پنجاب دی تو لِکھ لِکھ مارے وين
اج لکھاں دھياں روندياں تينوں وارث شاہ نوں کین

اٹھ دردمنداں دیا درديا اٹھ تک اپنا پنجاب
اج بيلے لاشاں وچھياں تے لہو دی بھری چناب

کسے نے پنجاں پانیاں وچ دتی زہر رلا
تے اونہاں پانیاں دھرتی نوں دتا پانی لا

اس زرخیز زمین دے لوں لوں پھٹیا زھر
گٹھ گٹھ چڑھیاں لالیاں فٹ فٹ چڑھیا قہر

ویہو ولسی وا فیر ون ون وگی جا
اوہنے ہر اک بانس دی ونجلی دتی ناگ بنا

ناگاں کیلے لوک منء بس فر ڈنگ ہی ڈنگ
پلو پلی پنجاب دے پھر نیلے پے گۓ انگ

گلیوں ٹٹے گیت فیر ترکلیوں ٹٹی تند
ترنجنوں ٹٹیاں سہیلیاں چرخے کوکر بند

سنے سیج دی بیریاں لڈن دتیاں روڑ
سنے ڈالیاں پینگ اج پپلاں دتی توڑ

جتھے وجدی سی پھوک پیار دی او ونجھلی گئی گواچ
رانجھے دے سب ویر بھل گۓ اودھی جاچ

دھرتی تے لہو وسیا قبراں پیاں چون
پریت دیاں شاہزادیاں اج وچ مزاراں رون

اج سبھے کيدو بن گئے ايتھے حُسن عشق دے چور
اج کتھوں لياواں لبھ کے ميں وارث شاہ جيا ہور

اج آکھاں وراث شاہ نوں کِتوں قبراں وچوں بول
تے اج کتابِ عشق دا کوئی اگلا ورقا پھول