Saturday, 11 June 2016

پاکستان دے مسلمان پنجابی تے غیر مسلمان پنجابی دا آپس وچ ورتا۔

ورتا قوم دی بنیاد تے وی ھوندا اے۔
ورتا مذھب دی بنیاد تے وی ھوندا اے۔
ورتا سماجی حیثیت دی بنیاد تے وی ھوندا اے۔

سماجی حیثیت دی بنیاد تے ورتا دا فرق تے مسلمان پنجابی دا مسلمان پنجابی نال وی اے۔ ھندو پنجابی دا ھندو پنجابی نال وی اے۔ سکھ پنجابی دا سکھ پنجابی نال وی اے۔ عیسائی پنجابی دا عیسائی پنجابی نال وی اے۔ ایس لئی سماجی حیثیت دی بنیاد تے ورتا دے فرق نوں مذھب دے ناں تے ورتا دا فرق نئیں آکھیا جاسکدا۔

پنجابی قوم وچ مسلمان پنجابی 56٪ نے۔ ھندو پنجابی 26٪ نے۔ سکھ پنجابی 14٪ نے۔ عیسائی پنجابی 4٪ نے۔ جیہڑے 1947 وچ پنجاب دی ونڈ دے کرکے پاکستان تے بھارت وچ ونڈے گئے سن۔ ایس ویلے پاکستان وچ پنجابی دی آبادی پاکستان دی آبادی دا 60٪ اے تے بھارت وچ پنجابی دی آبادی بھارت دی آبادی دا 2٪ اے۔

پاکستان وچ مسلمان پنجابی بوھتے نے تے غیر مسلمان پنجابی گھٹ نے۔ پاکستان دے مسلمان پنجابی تے غیر مسلمان پنجابی دا آپس وچ قوم دی بنیاد تے ' تے مذھب دی بنیاد تے ورتا ایس طراں اے کہ؛

پاکستان وچ جد اک غیر مسلمان پنجابی ' مسلمان پنجابی نال پنجابی بن کے ورتا کردا اے تے فے مسلمان پنجابی وی پنجابی بن کے اوس نال ورتا کردا اے۔

پر جد اک غیر مسلمان پنجابی ' مسلمان پنجابی نال پنجابی بن کے ورتا کرن دے بجائے اپنے مذھب دی بنیاد تے مسلمان پنجابی نال پنگا لیندا اے تے فے مسلمان پنجابی وی اوس غیر مسلمان پنجابی نال پنجابی دے بجائے مسلمان بن کے ای ورتا کردا اے۔ اے ھور گل اے کے تونی کھان توں بعد او غیر مسلمان پنجابی ' پنجابی بن کے رولا پاندا اے کہ مسلمان پنجابی ' غیر مسلمان پنجابی نال چنگا ورتا نئیں کردا۔

پاکستان وچ ھندو پنجابی تے ھین ای نئیں۔ سکھ پنجابی بوھت گھٹ نے تے مسلمان پنجابی نال مذھب دے کرکے کدی کوئی جھگڑا نئیں ھویا۔ شاید ایس لئی کہ 1947 وچ مذھب دی بنیاد تے ھون والے جھگڑے دا نتیجہ سب نوں یاد اے۔ ایس لئی سکھ پنجابی تے مسلمان پنجابی دا شاید ھن کدے وی مذھب دی بنیاد تے آپس وچ جھگڑا نا ھووے۔ کیونکہ ھن سکھ پنجابی تے مسلمان پنجابی جد آپس وچ میل ملاقات کرن تے پنجابی دی بنیاد تے کردے نے نا کہ مذھب دی بنیاد تے۔ ایس لئی سکھ پنجابی تے مسلمان پنجابی مذھب نوں بنیاد بنا کے آپس وچ لڑن دے بجائے قوم نوں بنیاد بنا کے آپس وچ جڑن والے پاسے آندے جا رئے نے۔

عیسائی پنجابی پاکستان وچ بوھت نے تے مسلمان پنجابی دا عیسائی پنجابی دے نال پنجابی دی بنیاد تے ورتا وی چنگا اے۔ مسلمان پنجابی تے عیسائی پنجابی نوں آکھدے وی دیندار نے۔ پر کدی کدی گل اودوں خراب ھوجاندی اے جد پنجابی دے بجائے مذھب دی بنیاد تے کوئی مسئلہ کھڑا ھوجاوے۔

پاکستان وچ پنجابی مسلمان توں علاوہ غیر پنجابی مسلمان وی نے تے پنجابی عیسائی توں علاوہ غیر پنجابی عیسائی وی نے۔ جیہڑے قوم دے بجائے کدی کدی مذھب دا مسئلہ کھڑا کردیندے نیں۔ کیونکہ ' انج تے پاکستان دی 97٪ آبادی مسلمان اے پر 60٪ آبادی پنجابی اے۔ جیسدے کرکے پاکستان تے کنٹرول پنجابی دا اے۔ ایس لئی خاص کرکے غیر پنجابی مسلماناں چوں اردو بولنے والے ھندوستانی مھاجر تے افغانستانی پٹھان ایس کوشش وچ ریندے نے کہ مسلمان پنجابی تے غیر مسلمان پنجابی نوں قوم دی بنیاد تے آپس وچ جڑن دے بجائے مذھب دی بنیاد تے آپس وچ لڑایا جائے۔

پاکستان دے غیر پنجابی مسلمان ایس فکر وچ وی ریندے نے کہ پاکستان دے مسلمان پنجابی تے غیر مسلمان پنجابی جے آپس وچ جڑ گئے تے کدھرے ونڈیا ھویا پنجاب تے پنجابی قوم ای آپس وچ نا جڑ جائے۔ جے ایداں ھوگیا تے فے پاکستان وچ پنجابی قوم دی آبادی 60٪ توں ودھ کے 85٪ ھو جانی اے تے پاکستان نے 97٪ مسلماناں دے بجائے 85٪ پنجابی قوم دا سیکولر ملک بن جانا اے۔ جیس وچ غیر پنجابی مسلمان نے اقلیت ھونا اے۔

پاکستان وچ مسلمان پنجابی تے غیر مسلمان پنجابی توں علاوہ غیر پنجابی مسلمان وی ریندے نے تے اناں دے آپس وچ اختلاف وی ھوندے ریندے نے۔ ایس لئی اختلاف جد قوم دی بنیاد تے ھووے تے مسلمان پنجابی ' غیر پنجابی مسلمان دے بجائے غیر مسلمان پنجابی دا ای ساتھ دیندا اے پر غیر مسلمان پنجابی جد پنجابی دے بجائے مذھب دی بنیاد تے کوئی مسئلہ کھڑا کردیندے نیں تے فے مسلمان پنجابی ' غیر مسلمان پنجابی دے بجائے غیر پنجابی مسلمان دا ای ساتھ دیندا اے۔

اصل وچ مذھب تے قوم وکھ وکھ سبجیکٹ نے۔ ایس لئی کوئی وی بندہ؛
نا اپنا مذھب چھڈ سکدا اے۔
نا قوم توں وکھ ھوسکدا اے۔

پنجابی قومپرست بنن لئی ضروری نئیں کہ اپنے مذھب نوں چھڈ دتا جاوے۔
نا مذھب تے عمل کرن لئی ضروری اے کہ اپنی قوم نوں ای چھڈ دتا جاوے۔
جتھے گل مذھب دی ھووے اوتھے مسلمان پنجابی نوں مسلمان ای بننا پیندا اے۔
پر جتھے گل پنجابی قوم دی ھووے ' اوتھے مسلمان پنجابی نوں پنجابی ای بننا پیندا اے۔

جے اک غیر مسلمان پنجابی ' مسلمان پنجابی نال پنجابی بن کے ورتا کرن دے بجائے اپنے مذھب دی بنیاد تے ورتا کردا اے تے مسلمان پنجابی نوں وی اوس غیر مسلمان پنجابی نال مسلمان بن کے ای ورتا کرنا پیندا اے۔ پر جے اک غیر مسلمان پنجابی ' مسلمان پنجابی نال پنجابی بن کے ورتا کردا اے تے مسلمان پنجابی وی پنجابی بن کے ای ورتا کردا اے۔