پنجابی سید تے پنجاب وچ رین والے غیر پنجابی سید وچ فرق کی اے؟

بابا فرید ' بلھے شاہ تے وارث شاہ نوں پنجابی منیا جاندا اے جد کہ سید یوسف رضا گیلانی ' شاہ محمود قریشی تے سیدہ عالیہ کاظمی نوں پنجاب وچ رین والے غیر پنجابی منیا جاندا اے۔ سید یوسف رضا گیلانی نے پنجاب وچ رین والا ھون دے باوجود پاکستان دا وزیر اعظم بنن توں بعد پنجابی دے بجائے سرائیکی بن کے پنجاب نوں ونڈن دی کوشش کیتی۔ شاہ محمود قریشی نے پنجاب نوں ونڈ کے جنوبی پنجاب صوبہ بنان دی کوشش کیتی۔ جد کہ سیدہ عالیہ کاظمی نے اسلام آباد وچ پنجابی زبان نوں گندی زبان آکھ کے پنجابی زبان تے پنجابی قوم دی توھین کیتی اے۔

پنجابی قوم دی بنیاد نسل ' قبائل تے مذھب توں اتاں ھوکے روایتی طور تے لسانی ' جغرافیائی ' تہذیبی تے ثقافتی اے۔ پنجابی قوم پرستی دے آغاز توں ای پنجابی تشخص دی بنیاد پنجاب دے علاقے وچ رین والے اوہ افرد نے جیہڑے پنجابی زبان نوں پہلی زبان دے طور تے بولدے نے ' پنجابی تہذیب اختیار کیتے ھوئے نے' پنجابی ثقافت دے تحت زندگی دے امور انجام دیندے نے ' مراد لے آ جاتدا اے۔

پنجابی قوم نوں مختلف پنجابی ذاتاں تے برادری آں وچ تقسیم کیتا جاتدا اے پر جناں لوکاں دا پنجاب دی تاریخی ذاتاں تے برادری آں چوں کسے نال تعلق نئیں اے ' اناں نوں وی پنجاب دے علاقے وچ رین ' پنجابی زبان نوں پہلی زبان دے طور تے بولن ' پنجابی تہذیب اختیار کرلین ' پنجابی ثقافت دے تحت زندگی دے امور انجام دین دے کرکے پنجابی تشخص وچ ای شامل کیتا جاتدا اے۔ وقت دے نال نال ذاتاں تے برادری آں دا ڈھانچہ کمزور تے قوم دا تشخص بوھتا مظبوط ھوندا جارے آ اے۔ جیس دی وجہ نال پنجابی قوم وچ بوھتی ھم آھنگی پیدا ھوندی جا رئی اے تے پنجابی معاشرتی اقدار بہتر طور تے ودھدے جا رئے نے۔

پنجاب دی زمین تے رھن والا ' جیس نسل دا وی ھووے ' جیس ذات دا وی ھووے ' جیس مذھب دا وی ھووے ' جے پنجاب نوں اپنا دیش سمجھدا اے ' پنجابی اوس دی زبان اے ' پنجابی تہذیب اختیار کیتی ھوئی اے ' پنجابی ثقافت دے تحت زندگی دے امور انجام دیندا اے ' تے اوہ پنجابی ای اے تے پنجابی قوم دا ای حصہ اے۔

پنجابی قوم دی تشکیل مشترکہ زمین ' اکو جئی زبان ' تہذیب  تے ثقافت دی بنیاد تے ھیگی تے مختلف مذاھب تے مشتمل اک قوم اے- مذاھب دے مختلف ھون دے باوجود اک ای زمین تے رھن ' اکو جئی زبان ' تہذیب تے ثقافت دے ھون دے کرکے پنجابیاں دے مشترکہ سیاسی تے دنیاوی مفادات نے۔

مذاھب دے فرق دے باوجود اک ای زمین تے رین توں علاوہ زبان ' تہذیب تے ثقافت دے اکو جے آ ھون دے کرکے مسلمان پنجابی ' ھندو پنجابی ' سکھ پنجابی ' عیسائی پنجابی ' احمدی پنجابی اک ای قوم نال واسطہ رکھدے نے۔ مذھب ھر فرد دا اپنا تے اوس دے رب دا معاملہ اے کہ؛ اوہ کیس مذھب دی تعلیمات حاصل کر کے اپنا اخلاق ٹھیک کرکے تے روحانی نشو نما کر کے ' اپنی جسمانی حرکات ' نفسانی خواھشات تے قلبی خیالات دی اصلاح کرکے ' اپنی دنیا تے آخِرَت سنواردا اے۔ جدکہ قوم دا معاملہ پنجابیاں دے سماجی احترام ' سیاسی استحکام تے پنجاب دی اقتصادی ترقی ' معاشی خوشحالی جئے دنیاوی زندگی دے اجتماعی معاملے آں نال اے۔

پنجابی قوم جٹ ' ارائیں ' راجپوت ' گجر ' اعوان وغیرہ جئی مختلف برادریاں تے مشتمل اے۔ جدکہ پنجاب وچ رین والے یا پنجاب نال تعلق رکھن والے لوک جے پنجابی زبان نئیں بولدے ' پنجابی تہذیب اختیار نئیں کردے  ' پنجابی ثقافت دے تحت زندگی دے کم انجام نئیں دیندے '  فے اناں لوکاں نوں پنجاب وچ رین والے دے طور تے تسلیم کیتا جاتدا اے پر اوس دا شمار پنجابی قوم وچ نئیں ھوندا۔ جدکہ پنجاب نوں اپنی دھرتی دے طور تے قبول کرن ' پنجابی زبان نوں مادری زبان دے طور تے اپنان ' پنجابی تہذیب نوں اختیار کرلین ' پنجابی ثقافت دے تحت زندگی دے امور انجام دین دے کرکے غیر پنجابی ذاتاں تے برادری آں دے لوکاں نوں وی پنجابی تسلیم کیتا جاتدا اے تے پنجابی قوم دا فرد شمار کیتا جاتدا اے۔

بابا فرید ' بلھے شاہ ' وارث شاہ دا عربی پس منظر سی۔ بابا فرید پنجابی زبان دے پہلے شاعر سن۔ وارث شاہ نوں پنجابی زبان دے شیکسپیئر دے طور تے تصور کیتا جاتدا اے۔ بابا فرید ' بلھے شاہ ' وارث شاہ نوں نہ صرف مسلمان پنجابی بلکہ ھندو پنجابی ' سکھ پنجابی ' عیسائی پنجابی وی پنجابی قوم دے روحانی رھنماواں دے طور تے تسلیم کردے نے تے عزت و احترام وی کردے نے۔

پنچ دریاواں دی زمین وچ عربی پس منظر والے آں نوں چائی دا اے کہ؛ پنجاب دی دھرتی ' پنجابی زبان ' پنجابی تہذیب تے پنجابی ثقافت وچ اپنے آپ نوں ضم کرکے بابا فرید ' بلھے شاہ ' وارث شاہ دے نقش قدم دی پیروی کردے ھوئے پنجابی زبان ' تہذیب ' ثقافت دے فروغ ' پنجابیاں دے سماجی احترام ' پنجابی قوم دے سیاسی استحکام تے پنجاب دی خوشحالی وچ اپنا کردار ادا کرن۔ جدکہ پنجابی قوم دی جٹ ' ارائیں ' راجپوت ' گجر ' اعوان وغیرہ ' مختلف برادریاں نوں چائی دا اے کہ؛ ذات تے برادری تک محدود رہ کے آپس وچ محاذ آرائی کرن دے بجائے ' پنجابی قوم پرست بن کے اپنا دھیان پنجاب دی زمین ' زبان ' تہذیب ' ثقافت تے دے کے ' پنجابی قوم نوں سیاسی تے سماجی طور تے مضبوط قوم تے پنجاب نوں معاشی تے اقتصادی طور تے مستحکم دیش بنان۔