پنجاب دے پنجابیاں نوں پنجاب توں بار دے پنجابیاں نوں فائدہ دینا پووے گا۔

 ایس ویلے پنجاب وچ صرف پنجابی ای نئیں ریندے۔ پنجاب وچ پٹھان ' بلوچ ' ھندوستانی مھاجر وی ریہندے نے تے پنجابی ایس ویلے پنجاب توں بار وی ریندے نے۔ پاکستان وچ رین والے پنجابیاں دے اپنے اپنے علاقے دے حساب نال سماجی ' سیاسی ' انتظامی ' معاشی معاملات تے مسئلے وکھ وکھ نے۔ ایس لئی اگے جا کے پنجابی قوم دا علاقے دی بنیاد تے آپس دا ٹکراؤ ھوسکدا اے۔ ایس لئی پنجابیاں نوں اپنے اپنے علاقے دے سماجی ' سیاسی ' انتظامی ' معاشی معاملات تے دھیان دینا چائی دا اے۔

اک علاقے دے پنجابیاں دے دوجے علاقے دے سماجی ' سیاسی ' انتظامی ' معاشی معاملات بارے موقف اختیار کرن نال پنجابی آپس وچ ٹکران لگ پین گے۔

اک علاقے وچ رین والے پنجابیاں نوں اپنے علاقے بارے سماجی ' سیاسی ' انتظامی ' معاشی موقف اختیار کرنا چائی دا اے۔ جد کہ دوجے علاقے دے سماجی ' سیاسی ' انتظامی ' معاشی ماحول بارے دوجے علاقیاں وچ رین والے پنجابیاں دے موقف نوں مننا چائی دا اے۔

انج کرن نال پنجابی قوم وچ سانجھ ودھے گی۔ اک علاقے وچ ریہن والے پنجابیاں دی دوجے علاقے وچ ریہن والے پنجابیاں نال صرف پنجابی زبان دی بنیاد تے سانجھ نئیں ھوسکدی۔ آپس وچ سانجھ لئی اک دوجے نوں سماجی ' سیاسی ' انتظامی ' معاشی فائدہ دینا پووے گا۔

پنجاب توں بار پنجابی خیبر پختونخوا ' بلوچستان دے پشتون علاقے ' بلوچستان دے براھوئی علاقے ' کراچی تے سندھ وچ ریہندے نے۔ ایتھے سندھ دے پنجابیاں دی مثال دے طور تے گل کردے آں کہ؛

سندھ دے پنجابیاں نوں پنجابی ای آکھیا جاندا اے تے او پنجابی بولدے وی نے پر سندھ دے پنجابیاں نوں پنجاب نال واسطہ رکھن دا سماجی ' سیاسی ' انتظامی ' معاشی فائدہ اے کہ نقصان اے؟

پنجاب توں بار پنجابی زبان ' پنجابی تہذیب ' پنجابی ثقافت دا سب توں بوھتا اثر سندھ وچ اے۔ سندھ وچ 1901 توں آباد پنجابی تے ھجے وی پنجابی بولدے نے بلکہ سندھ وچ جتھے جتھے پنجابی ریہندے نے۔ اوتھے دے علاقے وچ ریہن والے سندھی وی پنجابی بولنا سکھ گئے نے۔ سندھ وچ ریہن والے پنجابی اپنے آپ نوں اکھواندے وی پنجابی نے۔ سندھی وی انہاں نوں پنجابی ای آکھدے نے۔ ایس لئی سندھ دے پنجابی لئی اپنے آپ نوں پنجابی اکھوان دا تے پنجابی زبان نوں بچان دا مسئلہ نئیں اے۔

سندھ دے پنجابیاں دا مسئلہ اپنی عزت ' جان ' مال بچان دا اے۔ سندھ دے پنجابیاں دا مسئلہ اپنے سماجی ' سیاسی ' انتظامی ' معاشی حقوق دا اے۔ کیونکہ سندھ دے پنجابیاں دی نہ سماجی عزت کیتی جاندی اے۔ نہ سیاسی نمائندگی دتی جاندی اے۔ نہ انتظامی حق دتا جاندا اے۔ ایس لئی بغیر سماجی عزت ' سیاسی استحکام ' انتظامی بالادستی دے سندھ دے پنجابیاں دی معاشی خوشحالی کیویں ھوسکدی اے بلکہ سندھ دے پنجابیاں دی عزت ' جان ' مال کنج محفوظ رہ سکدی اے؟

سندھ دے پنجابیاں نوں پنجابی ھون دے کرکے پنجاب دے پنجابیاں دی آں سندھ وچ یا سندھ نال حرکتاں دا سندھیاں نوں حساب دینا پیندا اے۔ جد کہ پنجاب دا بیورو کریٹ ' پنجاب دا فوجی ' پنجاب دا سیاستدان ' پنجاب دا صحافی ' پنجاب دا صنعتکار سندھ دے پنجابیاں دی سماجی ' سیاسی ' انتظامی مدد کرن دے بجائے سندھی اشرافیہ نال یاری رکھدا اے۔ سندھی اشرافیہ دی سماجی ' سیاسی ' انتظامی مدد کردا اے۔ ایس طراں سندھ دا پنجابی چکی دے 2 پاٹاں وچ پس ریہیا اے۔

سندھ دے پنجابیاں بارے مزید تفصیل پی این ایف سندھ زون دے زونل آرگنائزر جناب Afzal Punjabi صاحب دے سکدے نے۔

خیبر پختونخوا دے پنجابیاں بارے تفصیل پی این ایف خیبر پختونخوا زون دے زونل آرگنائزر جناب Mazloom Punjabi صاحب دے سکدے نے۔

بلوچستان دے پشتون علاقے دے پنجابیاں بارے تفصیل پی این ایف بلوچستان دے پشتون علاقے دے زون دے زونل آرگنائزر جناب Sheraz Rajpoot صاحب دے سکدے نے۔

بلوچستان دے براھوئی علاقے دے پنجابیاں بارے تفصیل پی این ایف بلوچستان دے براھوئی علاقے دے زون دے زونل آرگنائزر جناب Mansoor Ahmad صاحب دے سکدے نے۔

کراچی دے پنجابیاں بارے تفصیل پی این ایف کراچی زون دے زونل آرگنائزر جناب Saleem Ilyas صاحب دے سکدے نے۔