پنجابی زبان دا مالوی لہجہ

مالوی لہجے دا علاقہ جنوب مشرق والے پاسیوں ماجھی لہجے دے علاقے نال جڑدا اے۔ اے علاقہ بھارتی پنجاب دے 17 ضلعے؛ انبالہ ’ برنالا ’ بھٹنڈا ’ پٹیالہ ’ فرید کوٹ ’ فتح گڑہ صاحب ’ فیروز پور ’ گنگا نگر’ حصار ’کروکشیترہ ’ لدھیانہ ’ ملیر کوٹلہ ’ مانسہ ’ موگا ’ سری مکتسر صاحب ’ روپر ’ سنگرور نے. جد کہ مالوی لہجہ ھریانہ دے شمالی حصیاں تے پاکستانی پنجاب دے مشرقی حصے وچ ضلع وھاڑی تے بہاولنگر دے سرحدی علاقے وچ وی بولیا جاندا اے۔ ملوئی یا مالوی لفظ مالو توں بنیا اے۔ مالو آریہ لوکاں دی اک پرانی ذات سی۔ مہا بھارت وچ مالو لوک راج دا ذکر ہویا اے۔ ملوئی لہجے وچ پرانی ویدک بولی دے کئی لفظ ملدے نے۔ ایس دے کرکے ایس لہجے نوں مالوی لہجہ دا ناں دتا گيا اے۔

پنجابی زبان دے مالوی لہجہ دے ذیلی لہجے

1۔ پوادھی پنجابی لہجہ

پوادھی لہجہ پنجابی زبان دے ضمنی لہجے مالوی وچ گوانڈھ دے علاقے دی ھریانوی زبان دے لفظاں دے اثر دے کرکے وجود وچ آیا۔ اے لہجہ پنجاب دے مرکزی علاقے ماجھے دے جنوب مشرق والے پاسے پنجاب دے سرے دے علاقے بھارتی پنجاب دے ضلعیاں؛ کھرار ' کورالی ' روپر ' نورپور بیدی ' مورنڈہ ' پیل ' راجپورہ ' سمرالا وچ بولیا جاندا اے۔ سنسکرت دے لفظ "پوروَ اردھ" دا مطلب اے "مشرق والے پاسے دے علاقے دا ادھا حصہ"۔ ایس لئی ماجھے دے مشرق والے پاسے پنجاب دے سرے دے علاقے دے ادھے حصے دے لوکاں نوں "پوادھیئے" آکھیا جاندا اے تے اوتھے بولے جان والے لہجے نوں "پوادھ دی بولی" یا پوادھی آکھیا جاندا اے۔

2۔ بانوالی پنجابی لہجہ

بانوالی لہجہ پنجابی زبان دے ضمنی لہجے مالوی وچ ھریانہ دے علاقے دی ھریانوی زبان دے لفظاں دے اثر دے کرکے وجود وچ آیا۔ اے لہجہ پنجاب دے مرکزی علاقے ماجھے دے جنوب مشرق والے پاسے پنجاب دے سرے دے علاقے ھریانہ دے علاقے بانوالی وچ بولیا جاندا اے۔ بانوالی دے ھریانہ وچ ھون دے کرکے بانوالی لہجہ وچ ھریانوی زبان دے لفظاں دا اثر بوھتا اے۔

3۔ بھٹیانی پنجابی لہجہ

بھٹیانی لہجہ پنجابی زبان دے ضمنی لہجے مالوی وچ ھریانہ دے علاقے دی ھریانوی تے بیکانیر دے علاقے دی مارواڑی زبان دے لفظاں دا اثر ھون دے کرکے وجود وچ آیا۔ اے لہجہ پنجاب دے مرکزی علاقے ماجھے دے جنوب مشرق والے پاسے پنجاب دے سرے دے علاقے ھریانہ دے ضلع حصار وچ بولیا جاندا اے نالے بیکانیر دے راٹھے بولدے نے۔

4۔ باگڑی پنجابی لہجہ

باگڑی لہجہ پنجابی زبان دے ضمنی لہجے مالوی وچ مارواڑی زبان دے لفظاں دا اثر ھون دے کرکے وجود وچ آیا۔ اے لہجہ پنجاب دے مرکزی علاقے ماجھے دے جنوب مشرق والے پاسے پنجاب دے سرے دے علاقے بھارتی پنجاب دے ضلع فیروز پور وچ بولیا جاندا اے نالے بیکانیر دے باگڑی تے راٹھور بولدے نے۔

5۔ لبانکی پنجابی لہجہ

لبانکی لہجہ پنجابی زبان دے ضمنی لہجے مالوی وچ راجستھانی زبان دے لفظاں دا اثر ھون دے کرکے وجود وچ آیا تے مالوی دے ذیلی لہجے باگڑی نال وی میل رکھدا اے۔ اے لہجہ پنجاب دے مرکزی علاقے ماجھے دے جنوب مشرق والے پاسے راجستھان ' گجرات تے پاکستانی پنجاب دے جنوب دے علاقے دے لبانہ قبیلے دے لوگ بولدے نے۔