پنجابی زبان دا پوٹھوھاری لہجہ

پوٹھوھاری لہجے دا علاقہ شمال مغرب والے پاسیوں ماجھی لہجے دے علاقے نال جڑدا اے۔ اے علاقہ پاکستانی پنجاب دے 3 ضلعے؛ جہلم ’ راولپنڈی ’ اٹک تے آزاد کشمیر دا اک ضلع؛ مظفرآباد نے. پوٹھوھاری لہجہ بنیادی طور تے سطح مرتفع پوٹھوھار وچ بولیا جاندا اے۔ پوٹھوھار توں ای ایس لہجے دا ناں پوٹھوھاری رکھیا گیا اے۔ پوٹھوھاری لہجہ جنوب وچ جہلم ' گوجرخان ' روات ' راولپنڈی تے مری وچ بولیا جاندا اے۔ شمال وچ بھمبر تے راولا کوٹ وچ بولیا جاندا اے۔ چیبھالی تے ڈھونڈی - کیرالی لہجے وی پوٹھوھاری نال ملدے جلدے نے۔

پنجابی زبان دے پوٹھوھاری لہجہ دے ذیلی لہجے

1۔ گوجری پنجابی لہجہ

گوجری لہجہ پنجابی زبان دے ضمنی لہجے پوٹھوھاری دا ذیلی لہجہ اے۔ اے لہجہ پنجاب دے وچکال والے علاقے ماجھے دے شمال مغرب والے پاسے پنجاب دے سرے دے علاقے جنوبی آزاد کشمیر تے شمالی مغربی پنجاب وچ بولیا جاندا اے۔

2۔ آوانکاری پنجابی لہجہ

آوانکاری لہجہ پنجابی زبان دے ضمنی لہجے پوٹھوھاری دا ذیلی لہجہ اے تے پوٹھوھاری دے ذیلی لہجے گھیبی نال رلدا ملدا اے۔ اے لہجہ پنجاب دے وچکال والے علاقے ماجھے دے شمال مغرب والے پاسے پنجاب دے سرے دے علاقے میانوالی وچ بولیا جاندا اے۔

3۔ گھیبی پنجابی لہجہ

گھیبی لہجہ پنجابی زبان دے ضمنی لہجے پوٹھوھاری دا ذیلی لہجہ اے۔ اے لہجہ پنجاب دے وچکال والے علاقے ماجھے دے شمال مغرب والے پاسے پنجاب دے سرے دے علاقے میانوالی دی تحصیل فتح جنگ تے تحصیل پنڈی گھیب وچ بولیا جاندا اے تے پوٹھوھاری دے ذیلی لہجے آوانکاری نال رلدا ملدا اے۔ گھیبہ قوم جیہڑی اناں علاقیاں تے حکومت کردی رئی اے۔ اوسدی نسبت نال پنڈی گھیب شہر دا وی ناں پیا تے اوسے دی نسبت نال ایس لہجے نوں وی گھیبی لہجے دا ناں دتا گيا اے۔

4۔ چھاچھی پنجابی لہجہ

چھاچھی لہجہ پنجابی زبان دے ضمنی لہجے پوٹھوھاری دا ذیلی لہجہ اے تے ہندکو نال وی رلدا ملدا اے۔ اے لہجہ پنجاب دے وچکال والے علاقے ماجھے دے شمال مغرب والے پاسے پنجاب دے سرے دے علاقے ضلع اٹک ' ہزارہ ڈویژن تے آلے دوالے دے صوبہ پنجاب تے خیبر پختوا دے علاقیاں وچ بولیا جاندا اے۔ چھاچھی لہجہ دا ناں ضلع اٹک دے علاقے چھاچھ توں لتا گیا اے۔