لوکاں نال ورتا دا طریقہ آݨا چائی دا اے۔

عزت ' آرام تے سکون والی زندگی گزارݨ لئی ضروری اے کہ لوکاں نال ورتا دا طریقہ آݨا چائی دا اے۔ تاکہ بندہ لوکاں نال تعلقات دے مطابق ورتا کرکے اپݨا وقت وی خراب نہ کرے۔ اپݨے گھر تے کاروبار تے دھیان دیݨ دے نال نال سماج نال رابطہ وی چنگا رکھ سکے۔

دل دا رشتہ ' نفس دا ناطہ تے جسم دا واسطہ ھوندا اے۔ سجݨاں تے بیلیاں نال دل دا رشتہ ھوندا اے۔ سنگیاں تے ساتھیاں نال نفس دا ناطہ ھوندا اے۔ اݨ واقف لوکاں تے جاݨ سنجاݨ والے لوکاں نال جسم دا واسطہ ھوندا اے۔

واسطہ تے ھو جایا کردا اے پر ناطہ بݨاݨا پیندا اے۔ جد کہ رشتہ لاݨا پیندا اے۔ ایس دے باوجود لوکائی وچ مسئلہ اے ریہندا اے کہ؛ جاݨ سنجاݨ والے لوکی تے کی اݨ واقف لوکی وی چاھندے نے کہ انہاں نال بیلیاں والا نہ وی سئی پر گھٹ توں گھٹ سجݨاں والا ورتا کیتا جاووے۔ جد کہ انہاں نال ساتھیاں والا تے کی سنگیاں والا ورتا وی نئیں کیتا جاسکدا۔

ورتا وھنوار دے حساب نال ای کیتا جاسکدا اے۔ جیس دا جنا حق اے۔ اوس نوں اونا ای دتا تے اوس کولوں لتا جاسکدا اے۔ کیونکہ دنیا دی آبادی 7 ارب اے۔ اک بہت زیادہ صلاحیت والا بندہ وی ساری زندگی وچ اک لکھ توں زیادہ جاݨ سنجاݨ والے لوکاں نال واسطہ نئیں رکھ سکدا۔ دس ھزار توں زیادہ سنگیاں تے اک ھزار توں زیادہ ساتھیاں نال ناطہ نئیں بݨا سکدا۔ اک سو توں زیادہ سجݨاں تے دس توں زیادہ بیلیاں نال رشتہ نئیں نبھا سکدا۔

سب توں سوکھا کم اݨ واقف لوکاں تے جاݨ سنجاݨ والے لوکاں وچ وقت گزارنا اے۔ ایس توں اوکھا کم سنگیاں (میل ملاقات والے لوکاں) تے ساتھیاں (کٹھے کم کرن والے لوکاں) نوں وقت دینا اے۔ سب توں اوکھا کم سجݨاں (سکھ دا خیال رکھن والے آں) تے بیلیاں (سرپرستی کرن والے آں) لئی وقت کڈھنا اے۔

اݨ واقف لوکاں ' جاݨ سنجاݨ والے لوکاں ' سنگیاں وچ پھسیا بندہ کسے کم دا نئیں ھوندا۔ بندہ او ای چنگا جیس دا بیلی ' کجھ سجݨ ' کجھ ساتھی ھوݨ۔ تاکہ زندگی دی ضروتاں لئی آپس وچ اک دوجے نال لوڑ ویلے جسمانی ' مالی ' علمی لیݨ دیݨ کردے ریݨ۔

جیس دا بیلی ھووے اوس دی زندگی ودھیا ھوندی اے۔ کیونکہ زندگی دی ضروتاں لئی کوئی لوڑ پیݨ ویلے بیلی دا ورتا ودھیا ھوندا اے۔ بیلیاں دا آپس وچ دل دا رشتہ ھوندا اے۔ ایس لئی بیلی لوڑ پوری کرݨ لئی دکھ وی سہہ لیندا اے۔

جیس دا بیلی نہ وی ھووے پر سجݨ ھووݨ تے فے اوس دی زندگی ودھیا نہ وی ھووے تے فے وی چنگی ضرور ھوندی اے۔ کیونکہ زندگی دی ضروتاں لئی کوئی لوڑ پیݨ ویلے سجݨاں دا ورتا چنگا ھوندا اے۔ سجݨاں دا آپس وچ دل دا رشتہ ھوندا اے۔ ایس لئی سجݨ لوڑ پوری کرݨ لئی اپنا سکھ وی گنوا دیندے نے۔

جیس دا نہ بیلی ھووے تے نہ سجݨ ھووݨ۔ صرف ساتھی ای ھووݨ تے فے او ودھیا یا چنگی نہ وی سئی پر گزارے جئی زندگی گزار ای لیندا اے۔ کیونکہ زندگی دی ضروتاں لئی کوئی لوڑ پیݨ ویلے ساتھیاں دا ورتا گزارے جیہا ھوندا اے۔ ساتھیاں دا آپس وچ نفس دا ناطہ ھوندا اے۔ ایس لئی ساتھی لوڑ پوری نہ وی کرسکن تے فے وی ھتھ ونڈا دیندے نے۔

جیس دا نہ بیلی ھووے ' نہ سجݨ ھوݨ تے نہ ساتھی ھووݨ۔ صرف سنگی ای ھووݨ تے فے او ودھیا یا چنگی یا گزارے جئی زندگی گزارݨ دے بجائے مندی زندگی ای گزاردا اے۔ کیونکہ زندگی دی ضروتاں لئی کوئی لوڑ پیݨ ویلے سنگیاں دا ورتا مندا لگدا اے۔ سنگیاں دا آپس وچ نفس دا ناطہ ھوندا اے۔ ایس لئی سنگی ودھ توں ودھ سانجھ تے کر دیندے نے پر لوڑ پوری نئیں کردے ھوندے۔

جیس دا نہ بیلی ھووے ' نہ سجݨ ھوݨ ۔ نہ ساتھی ھووݨ تے نہ سنگی ھووݨ۔ صرف جاݨ سنجاݨ والے لوکی ای ھووݨ تے فے او ودھیا یا چنگی۔ گزارے جئی یا مندی زندگی گزارݨ دے بجائے بڑی اوکھی زندگی گزاردا اے۔ کیونکہ زندگی دی ضروتاں لئی کوئی لوڑ پیݨ ویلے جاݨ سنجاݨ والے لوکاں دا ورتا اوکھا لگدا اے۔ جاݨ سنجاݨ والے لوکاں دا آپس وچ جسم دا واسطہ ھوندا اے۔ ایس لئی جاݨ سنجاݨ والے لوکی ودھ توں ودھ چنگائی تے کر دیندے نے پر لوڑ پوری نئیں کردے ھوندے۔

دنیا دے 7 ارب لوکاں چوں اپنے اپنے جاݨ سنجاݨ والے لوکاں ' سنگیاں ' ساتھیاں ' سجݨاں ' بیلیاں تے ضرورت دے مطابق دھیان رکھݨ والے بندے دی آں ای ستے خیراں ھوندیاں نے تے او موجاں کردا اے۔ ایس لئی؛

1۔ اݨ واقف لوکاں نال چنگی طراں گل کر لے آ کرو۔

2۔ جاݨ سنجاݨ والے لوکاں نال چنگی طراں گل کرݨ دے نال نال چنگائی وی کر دے آ کرو۔

3۔ سنگیاں نال چنگی طراں گل تے چنگائی کرݨ دے نال نال سانجھ وی کریا کرو۔

4۔ ساتھیاں نال چنگی طراں گل کرݨ ' چنگائی کرݨ تے سانجھ کرݨ دے نال نال ھتھ وی ونڈایا کرو۔

5۔ سجݨاں نال چنگی طراں گل کرݨ ' چنگائی کرݨ ' سانجھ کرݨ تے ھتھ ونڈاݨ دے نال نال سجݨاں نوں سکھ وی دے آ کرو۔

6۔ بیلیاں نال چنگی طراں گل کرݨ ' چنگائی کرݨ ' سانجھ کرݨ ' ھتھ ونڈاݨ تے سکھ دیݨ دے نال نال بیلیاں دے دکھ وی ونڈایا کرو۔