نویں نویں "پنجابی قوم پرست" دا حال کی ھوندا اے؟

کسے وی قوم وچ سارے لوک ای قیادت دی صلاحیت نئیں رکھدے ھوندے۔ کسے وی قوم وچ سارے لوکاں دا شعور اینا نئیں ھوندا کہ؛ او قوم دی سماجی عزت ' سیاسی شعور ' معاشی استحکام ' انتظامی بالادستی بارے سوچ سمجھ رکھدے ھون۔ اناں نوں سمجھ ھووے کہ؛ قوم دے ویری کون نے تے اناں نال کنج نبڑنا چائی دا اے؟ نالے قوم نوں منظم ' متحد تے مظبوط کنج کرنا چائی دا اے؟

اکثر ایداں ھوندا اے کہ؛ نواں نواں نماز پڑھن والا جد نماز پڑھن لگدا اے تے او ھر بندے نوں آکھدا ریندا اے کہ نماز پڑھی اے؟ نماز کیوں نئیں پڑھدے؟ ایس نویں نویں نماز پڑھن والے نوں اسلام دا بس اینا ای پتہ ھوندا اے کہ؛ نماز پڑھی جاووے۔ ھور کجھ کرن دی لوڑ نئیں۔

انج ای نویں نویں پنجابی قوم پرستی دا کم کرن والے پنجابی بولن والے پنجابیاں نوں وی آکھدے ریندے نے کہ؛ پنجابی بولیا کرو۔ پنجابی کیوں نئیں بولدے؟ ایس نویں نویں پنجابی قوم پرست نوں پنجابی قوم پرستی دا بس اینا ای پتہ ھوندا اے کہ؛ پنجابی بولی جاووے۔ ھور کجھ کرن دی لوڑ نئیں۔

گل اے وے کہ؛ پنجابی قوم پرست نوں پنجابی بولن دا آکھن توں اگے دی وی گل کرنی چائی دی اے کہ؛

1۔ پنجابی قوم دی سماجی عزت ' سیاسی شعور ' معاشی استحکام ' انتظامی بالادستی بارے کی کرنا چائی دا اے؟

2۔ قوم دے ویری کون نے تے اناں نال کنج نبڑنا چائی دا اے؟

3۔ قوم نوں منظم ' متحد تے مظبوط کنج کرنا چائی دا اے؟