"پی این ایف" دی ٹیم "پنجابی قوم پرست" تیار کر رئی اے۔

قوم پرست قوم دے لوکاں ' قوم دی زبان ' قوم دی تہذیب ' قوم دی ثقافت ' قوم دی زمین دے نال محبت کردا اے۔ اپنے آپ نوں قوم دی سماجی عزت ' معاشی خوشحالی ' سیاسی استحکام ' انتظامی بالادستی لئی وقف کر دیندا اے۔ قوم دے مفاداں دی حفاظت کردا اے۔ قوم دے حقاں دا دفاع کردا اے۔

قوم پرستی دا مشن قوم دے لوکاں دے شعور نوں بیدار کیتے بغیر ' ٹیم ورک کیتے بغیر ' قوم پرستاں نوں حکومتی طاقت دوائے بغیر پورا نئیں ھو سکدا۔ ایس لئی؛

پنجابی قوم پرستی دا پہلا مرحلہ پنجابیاں دا پنجاب ' پنجابیاں ' پنجابی زبان ' پنجابی ثقافت ' پنجابی تہذیب بارے شعور ودھانا سی۔ ایس تے 2012 توں کم ھو ریا سی۔

پنجابی قوم پرستی دا دوسرا مرحلہ پنجابی قوم پرستی لئی کم کرن والے آں نوں منظم کرکے پنجابی قوم پرستی دا کم کرنا سی۔ ایس تے 2020 توں پی این ایف (پنجابی نیشنلسٹ فورم) بنا کے کم کیتا جا ریہیا اے۔

پنجابی قوم پرستی دا تیسرا مرحلہ پنجابی قوم پرستاں نوں سنیٹر ' قومی اسمبلی دے میمبر ' صوبائی اسمبلی دے میمبر ' وزیر ' مشیر بنوانا تے سرکاری اداریاں وچ ذمہ دار عہدیاں تک اپڑاناں اے۔ ایس تے 2022 توں کم شروع ھووے گا۔ انشاء اللہ

پی این ایف "پنجابی نیشنسلٹ فورم" دے پلیٹ فارم توں تیار ھون والے پنجابی قوم پرست لیڈر قومی تے صوبائی سطح تے علمی دلائل تے سیاسی مھارت دے نال پنجابی قوم دے لوکاں دی سماجی عزت ' معاشی خوشحالی ' انتظامی بالادستی ' اقتصادی ترقی نوں یقینی بنان گے۔

قومی تے صوبائی سطح تے پنجابی قوم دی قیادت کرن والے 100 پنجابی قوم پرست لیڈر پی این ایف "پنجابی نیشنسلٹ فورم" دے زونل آرگنائزراں ' زونل ایگزیکٹو کمیٹی دے میمبراں تے ڈسٹرکٹ آرگنائزراں چوں ھون گے۔ ایس لئی پی این ایف دی ٹیم وچ شامل کرن توں پہلوں تعلیمی قابلیت ' سیاسی شعور ' قائدانہ صلاحیت تے پنجابی قوم لئی کم کرن دے جذبے نوں ویکھیا تے پرکھیا جاندا اے۔

پی این ایف دے 8 زون ھجے سارے پاکستان وچ پنجابی قوم پرست تیار کر رئے نے۔ 2022 وچ اناں پنجابی قوم پرستاں چوں 1000 پنجابی قوم پرست لاھور وچ کٹھے ھون گے۔ انشاء اللہ

پنجابیاں نوں چائی دا اے کہ؛ پنجابی قوم پرستاں دی عزت کریا کرن۔ پنجابی قوم پرستاں دا ھتھ ونڈایا کرن۔ پنجابی قوم پرستاں دا ساتھ دیا کرن۔