پنجابی نیشنلسٹ فورم دی ٹیم نے کیہو جئے پنجابی لبھنے نے؟

پاکستان وچ پنجابی 12 کروڑ نے پر او پنجابی جنہاں وچ پنجابی قوم پرستی وی ھووے گی۔ او لکھاں وچ ای ھون گے۔ جد کہ جنہاں پنجابیاں وچ پنجابی قوم پرستی دے نال نال سیاسی شعور وی ھووے گا۔ او ھزاراں وچ ای ھون گے۔

ھر قوم وچ ایداں ای ھوندا اے۔ نہ تے ھر قوم دے سارے لوکاں وچ قوم پرستی ھوندی اے۔ نہ سیاسی شعور ھوندا اے۔ جد کہ ھر قوم وچ کم والے بندے او ھوندے نے جیہڑے سیاست دے ماھر کھلاڑی وی ھوندے نے۔ او ھر قوم وچ سینکڑاں دی تعداد وچ ای ھوندے نے۔

سماجی عزت ' معاشی خوشحالی ' انتظامی بالادستی ' اقتصادی ترقی انہاں قوماں دی ھوندی اے جنہاں نوں حکومت لینی آندی ھووے پر حکومت لین لئی سیاست دا ماھر کھلاڑی ھونا ضروری اے ۔ پنجابی نیشنسلسٹ فورم تے پنجابی قوم پرستاں نوں تیاری کروانی اے۔ سیاسی شعور والے پنجابیاں نوں سیاست دا ماھر کھلاڑی بنانا اے۔

پنجابی نیشنسلٹ فورم دی ٹیم نے سیاست دا ماھر کھلاڑی بن کے انشاء اللہ حکومت وی سمبھالنی اے تے پنجابی قوم نوں سماجی عزت وی دوانی اے۔ معاشی خوشحالی وی دوانی اے۔ انتظامی بالادستی وی دوانی اے۔ اقتصادی ترقی وی دوانی اے۔

ایس لئی پنجابی نیشنلسٹ فورم دی ٹیم نے او پنجابی لبھنے نے جیہڑے سیاست دے ماھر کھلاڑی نہ وی ھون تے فے وی گھٹ توں گھٹ سیاسی شعور والے پنجابی ضرور ھون۔ تاکہ انہاں سیاسی شعور والے پنجابیاں نوں سیاست دا ماھر کھلاڑی بنایا جاسکے۔

او پنجابی جنہاں وچ پنجابی قوم پرستی نئیں اے۔ او پنجابی نیشنلسٹ فورم دے کم دے نئیں نے۔ جد کہ جنہاں پنجابیاں وچ سیاسی شعور نئیں اے۔ اناں نے پنجابی نیشنلسٹ فورم دی ٹیم دا وقت ای خراب کرنا اے۔