پی این ایف وچ کیس پنجابی نوں کیس سطح تے اھمیت دتی جاندی اے؟

جیس طراں ددھ وچ مکھن گھٹ تے لسی بوھتی ھوندی اے۔ انج ای قوماں وچ وی کم والے بندے (مکھن) گھٹ تے صلاحواں دین یا رولا پان والے (لسی) بوھتی ھوندی اے۔

جیوں ددھ چوں مکھن کڈھن لئی ددھ نوں پہلے کاڑھنا پیندا اے ' فے جاگ لانا پیندا اے ' فے رڑکنا پیندا اے ' فے جاکے کدھرے مکھن نکلدا اے ۔ قوم چوں کم دے بندے کڈھن لئی وی انج ای کرنا پیندا اے۔

ھر قوم وچ علمی صلاحیت والے ودھ توں ودھ ھزاراں تے مالی وسائل والے لکھاں ' جد کہ عوامی تعلقات والے کروڑاں دی تعداد وچ ھوندے نے۔

پنجابی نیشنلسٹ فورم وچ سیاسی شعور تے علمی صلاحیت والے پنجابیاں نوں زون دی سطح تے۔ مالی وسائل والے پنجابیاں نوں ڈسٹرکٹ دی سطح تے۔ عوامی تعلقات والے پنجابیاں نوں تحصیل دی سطح تے اھمیت دتی جاندی اے۔

جنہاں پنجابیاں کول مالی وسائل تے عوامی تعلقات نہ وی ھون پر سیاسی شعور تے علمی صلاحیت دی وجہ نال انہاں پنجابیاں نوں پنجابی نیشنلسٹ فورم دے زونل آرگنائزر تے زونل ایگزیکٹو کمیٹی دا میمبر بنایا گیا اے۔

جنہاں پنجابیاں کول علمی صلاحیت تے عوامی تعلقات نہ وی ھون پر سیاسی شعور تے مالی وسائل دی وجہ نال انہاں پنجابیاں نوں پنجابی نیشنلسٹ فورم
دی ڈسٹرکٹ ایگزیکٹو کمیٹی دا میمبر بنایا جا ریہیا اے تے 2021 وچ انہاں چوں زیادہ قابلت تے صلاحیت والے آں نوں ڈسٹرکٹ آرگنائزر بنایا جائے گا۔

جنہاں پنجابیاں کول علمی صلاحیت تے مالی وسائل نہ وی ھون پر سیاسی شعور تے عوامی تعلقات دی وجہ نال انہاں پنجابیاں نوں 2022 وچ پنجابی نیشنلسٹ فورم دا تحصیل آرگنائزر تے تحصیل/ شھر دی ایگزیکٹو کمیٹی دا میمبر بنایا جائے گا۔

پی این ایف انشاء اللہ تنظیم سازی مکمل کرن توں بعد 2023 توں پنجابی قوم دی سماجی عزت تے معاشی خوشحالی جد کہ پنجاب دی انتظامی بہتری تے اقتصادی ترقی لئی عوامی سطح تے جدوجہد شروع کرکے "پنجابی راج" قائم کروائے گا۔